Top News

Forbes မဂ္ဂဇင်း၏ ဖော်ပြမှုအရ အဆိုတော်ရီဟားနားသည် လက်ရှိအချိန်တွင် တရားဝင်ဘီလျံနာတစ်ဦး၊ အချမ်းသာဆုံး အမျိုးသမီးအဆိုရှင်တစ်ဦးဖြစ်လာပြီ ဖြစ်သည်။

ပေါ့ပ်စတား ရီဟားနား၏ ပိုင်ဆိုင်မှုသည် အမေရိကန်ဒေါ်လာ ၁ ဒသမ ၇ ဘီလျံရှိပြီး ထိုအထဲမှ ခန့်မှန်းခြေ ဒေါ်လာ ၁ ဒသမ ၄ ဘီလျံသည် သူမတည်ထောင်ထားသည့်  Fenty Beauty အလှကုန်ကုမ္ပဏီမှ ရရှိလာခြင်းဖြစ်ကာ ကျန်ပိုင်ဆိုင်မှုအများစုက သူမ၏အမျိုးသမီးအတွင်းခံကုမ္ပဏီ Savage X Fenty နှင့် အဆိုပိုင်း ၊ သရုပ်ဆောင်ပိုင်းတို့မှ ရထားခြင်းဖြစ်သည်။

ရီဟားနားသည်  အော်ပရာဝင်းဖရေးပြီးလျှင် ကမ္ဘာ့အချမ်းသာဆုံး အမျိုးသမီးဖျော်ဖြေသူလည်းဖြစ်သည်။

အမည်ရင်း Robyn Fenty ဟုခေါ်သည့် ရီဟားနားသည် Fenty Beauty ကုမ္ပဏီကို ၂၀၁၇ ခုနှစ်တွင် LVMH နှင့်တွဲဖက်တည်ထောင်ခဲ့ပြီး သူမ၏အလှကုန်များသည် အမျိုးသမီးအားလုံးအတွက် ရည်ရွယ်သည်ဟုဆိုကာ ဖောင်ဒေးရှင်းအမျိုး ၄၀ အထိ ထုတ်လုပ်ခဲ့သည်။ LVMH အဆိုအရ ပထမတစ်နှစ်အတွင်းမှာပင် ထိုကုမ္ပဏီမှ ဒေါ်လာသန်း ၅၅၀ ကျော် ရရှိခဲ့သည်။

ရီဟားနား၏ လုပ်ငန်းတိုင်း အောင်မြင်သည်ဆိုခြင်းကား မဟုတ်ပေ။

ယခုနှစ် ဖေဖော်ဝါရီတွင် Fenty အဝတ်အထည်လုပ်ငန်းကိုပိတ်ရန် LVMH နှင့် ရီဟားနားတို့ သဘောတူလိုက်ကြသည်။သို့သော် Savage X Fenty အတွင်းခံလုပ်ငန်းနှင့် အလှကုန်ပိုင်းဖြစ်သည့် Fenty Beauty နှင့် Fenty Skin လုပ်ငန်းများက ဆက်လက်ရှိနေခဲ့သည်။

အဆိုပိုင်းတွင်လည်း အသက် ၃၃ နှစ်ရှိပြီဖြစ်သည့် သူမသည် ၂၀၁၆ ခုနှစ်က Anti အမည်ဖြင့် စတူဒီယိုအယ်လ်ဘမ်ထွက်ပြီးနောက်ပိုင်း အသစ်ထွက်မလာတော့ပေ။

လက်ရှိတွင်ရီဟားနားတစ်ယောက် ချစ်သူအမေရိကန်ရက်ပါ A$AP Rocky နှင့် သီချင်းဗီဒီယိုတစ်ပုဒ် ရိုက်ကူးထားသည်။ A$AP က အင်တာဗျူးတစ်ခုတွင် ရီဟားနားကို “the love of my life” ဟုလည်း ပြောထားသူဖြစ်သည်။

ရီဟားနား၏ Diamonds ကမ္ဘာလှည့် ဖျော်ဖြေပွဲအတွက် A$AP က ကူညီပေးခဲ့ပြီး ၂၀၁၃ ခုနှစ် အစောပိုင်းလောက်ကတည်းက သူတို့နှစ်ဦးတွဲခုတ်နေသည်ဆိုသည့် သတင်းများ ထွက်ပေါ်လာခဲ့သည်။

သို့သော်သူတို့နှစ်ဦးပတ်သက်မှုသည် မနှစ်ကစတင်ခဲ့ဖွယ်ရှိသည်။ A$AP နှင့် မတွဲမီက ရီဟားနားသည် ဆော်ဒီစီးပွားရေး လုပ်ငန်းရှင်ဘီလျံနာ Hassan Jameel နှင့် သုံးနှစ်ကြာ တွဲခဲ့သည်။