Top News

မြန်မာနှင့် ထိုင်းနိုင်ငံတို့မှ အနုပညာရှင်များ ပါဝင်ထားသည့်  From Bangkok To Mandalay ရုပ်ရှင်ဇာတ်ကားကို နိုဝင်ဘာ ၄ ရက်မှစတင်ကာ ရန်ကုန်မြို့ရှိ ရှေ့ဆောင်၊ သွင်၊ မင်္ဂလာ ၂၊ မင်္ဂလာ စံပြ၊ Junction Square& Mawtin JCGV ၊ နဝဒေး၊ ရွှေဗဟို၊ မြရတနာ၊ ကန်သာယာ၊ မင်္ဂလာဝဇီရာ၊ Minglar Cineplex (ဂမုန်းပွင့်)၊ မန္တလေးမြို့ရှိ  မြို့ဂုဏ်ရောင်၊ JCGV ၊ နေပြည်တော်ရှိ JCGV ၊ ဇေယျသီရိ၊ အောင်သပြေ၊ ပြည်မြို့ရှိ မင်္ဂလာထွန်းသီရိ၊ ပဲခူးမြို့ရှိ Minglar Cineplex ၊ တောင်ငူမြို့ရှိ New 3D Cinema ၊ တောင်ကြီးရှိ မြသုခ၊ လားရှိုး မြို့ရှိ သီတာအေး၊ သိန်းထိုက်၊ အောင်သီရိ၊ ပြင်ဦးလွင်မြို့ရှိ Movie Planet ၊ ချယ်ရီလွင်၊ မော်လမြိုင်ရှိ JCGV ၊ ပခုက္ကူရှိ သီဟ၊ ပုသိမ်ရှိ ရွှေပြည်တော်၊  ဘားအံရှိ တက်နေဝန်း၊ မြဝတီမြို့ရှိ သွန်းရွှေစင်၊ ရေနံချောင်းမြို့ရှိ ရတနာ နှင့် ဗန်းမော်မြို့ရှိ စတား အစရှိသည့် ရုပ်ရှင်ရုံများတွင် တစ်ပြိုင်နက် ရုံတင်ပြသထားသည်ဟု သိရသည်။
ထိုင်းနိုင်ငံ ဘန်ကောက်မြို့တွင် နေထိုင်သည့် မိန်းမချော လေး ‘ပင်’ သည် အဘိုးအဘွားများနှင့်အတူ ကြီးပြင်းလာခဲ့သူ ဖြစ်သည်။ အဘိုးဖြစ်သူ ကွယ်လွန်သွားပြီး ‘ပင်’ ချစ်ခင်အားကိုးရသည့် ပေါ့ပ်တစ်ယောက် ကားအက်ဆီးဒင့်ဖြစ်ကာ ဆုံးပါးသွားချိန်တွင် ပင်အတွက် အားကိုးချစ်ခင်စရာ အဘွားတစ်ယောက်သာ ရှိတော့သည်။ သို့သော် ပေါ့ပ်တစ်ယောက် ကွယ်လွန်ပြီး နှစ်နှစ်အကြာတွင် အဘွားဖြစ်သူလည်း ဆုံးပါးသွားခဲ့ရာ ‘ပင်’ သည် တစ်ယောက်တည်း အထီးကျန်ဘဝဖြင့် ဆက်လက်ရှင်သန်ရန် ဖြစ်လာခဲ့သည်။
ထိုအချိန်တွင် အဘွားဖြစ်သူ၏ ငယ်စဉ်အတိတ်ဘဝတစ်ခုကို ပြန်လည်ရှာဖွေနိုင်မည့် အစီအစဉ်တစ်ရပ် ပေါ်လာခဲ့သည်။ ယင်းမှာ အဘွားဖြစ်သူက ‘ပင်’ အတွက်ထားရစ်ခဲ့သည့် သေတမ်းစာတွင် ပါရှိသည့် မြန်မာပြည်မှာ ပေးပို့စာ ၁၀ စောင်ပင် ဖြစ်သည်။ ထိုစာ ၁၀ စောင် သည် နှစ် ၅၀ ဝန်းကျင်ကြာမြင့်ခဲ့သည့်တိုင်အောင် ဖွင့်ဖောက်ကာ ဖတ်ရှုထားခြင်းမရှိသည့်အပြင် ထိုစာများနှင့်အတူ သေတ္တာအတွင်း သိမ်းဆည်းထားသည့် မြန်မာ့ရုပ်သေး  မင်းသမီးရုပ်တစ်ရုပ်ကလည်း ထိုစာများအား ဖွင့်ဖောက်ဖတ်ရှုကာ အဘွားဖြစ်သူထားခဲ့သည့် သူမအတွက်သိစရာ အဖြစ်များကို လိုက်လံရှာဖွေရန် တွန်းအားတစ်ခု ဖြစ်နေခဲ့သည်။ မြန်မာပြည် ခရီးစဉ်တွင် ‘ပင်’ အားအကူအညီပေးနိုင်မည့် ဘန်ကောက်တွင် ကျောင်းလာတက်စဉ် ပင်၏အဘွားက အကူအညီပေးခဲ့သည့် မိုးနိုင်ဆိုသူ၏ လိပ်စာကိုလည်း သေတမ်းစာတွင် ထားရစ်ခဲ့သည်။ သို့နှင့် ‘ပင်’ တစ်ယောက် မြန်မာပြည်သို့ တစ်ကိုယ်တည်း ခရီးထွက်လာခဲ့တော့သည်။
ရန်ကုန်သို့ ရောက်ရှိလာသည့် ‘ပင်’ တစ်ယောက် မိုးနိုင်နှင့် တွေ့ဆုံပြီးနောက် ပထမဆုံးစာ၏ လိပ်စာဖြစ်သော ရန်ကုန်စာတိုက်ကြီးသို့ ရောက်ရှိကာ မြန်မာဘာသာဖြင့် ရေးသားထားသည့်စာကို မိုးနိုင်၏အကူအညီဖြင့် ဖွင့်ဖောက်ဖတ်ရှုတော့သည်။ ထိုစာတွင် နန္ဒဆိုသူ အမျိုးသားတစ်ဦးက သူဇာဆိုသည့် မိန်းကလေးတစ်ဦးထံ ရေးထားသည့်စာဖြစ်ရာ ‘ပင်’ တစ်ယောက်အံ့သြရတော့သည်။ အခြားစာများတွင်ပါသည့် လိပ်စာများအတိုင်း သွားရောက်ရန် မိုးနိုင်၏ ဂျစ်ကားဖြင့် ခရီးထွက်ခဲ့တော့သည်။
ပင်၏ အဘွားထားခဲ့သည့် စာများတွင် ပါရှိသည့် လိပ်စာများဖြစ်သည့် ပုဂံ၊ မင်းကွန်း၊ စစ်ကိုင်း၊ ပြင်ဦးလွင်နှင့် သီပေါမြို့များသို့ သွားရောက်ပြီး စာတွင်ပါရှိသည့် အကြောင်းအရာများအား ဖတ်ရှုရင်းမှ အဘွား၏ သူဇာဆိုသည့် အတိတ်ဘဝတစ်ခုနှင့်အတူ သူဇာနှင့်နန္ဒတို့၏ ချစ်မေတ္တာခရီး လမ်းအပိုင်းအစများကို ခြေရာခံရင်းမှ ဖြစ်ပေါ်လာသည်များကို ဇာတ်လမ်းဖွဲ့ ရိုက်ကူးထားသည်။