Top News

သမ္မတ ဗလာဒီမာပူတင်က အမေရိကန် အက်ရှင်သရုပ်ဆောင် စတီဗင်ဆီးဂဲလ်ကို ရုရှားနိုင်ငံသားအဖြစ် ခံယူခွင့်ပေးသည့်  အမိန့်တစ်ခုကို နိုဝင်ဘာ ၃ ရက်တွင် လက်မှတ်ရေးထိုးခဲ့သည်။
ဟောလိဝုဒ်စတား ဆီးဂဲလ်နှင့် ဂျူဒိုအားကစားကို နှစ်သက်သည့် ပူတင်သည် ပြီးခဲ့သည့်နှစ်များအတွင်း ရင်းနှီးသည့် ညီအစ်ကိုဆက်ဆံရေးကို တည်ဆောက်ခဲ့သည်။ ဆီးဂဲလ်သည် ရုရှားနိုင်ငံသို့ ကြိမ်ဖန်များစွာ သွားရောက်လည်ပတ်ခဲ့ပြီး ၂၀၁၄ ခုနှစ်တွင် ရုရှား၏ ယူကရိန်းထံမှ ခရိုင်းမီးယားအား တိုက်ခိုက်သိမ်းယူမှုကိုလည်း ကာကွယ်ပြောဆိုပေးခဲ့ သည်။ ယင်းဖြစ်စဉ်အပြီးတွင် ဆီးဂဲလ်က ပူတင်ကို ကမ္ဘာ့အကြီးမြတ်ဆုံး ခေါင်းဆောင်တစ်ဦးဟုလည်း ဖော်ပြခဲ့သည်။
ရုရှားကို သွားရောက်လည်ပတ်စဉ်အတွင်း ဆီးဂဲလ်က ယင်းနိုင်ငံ၌ တစ်နှစ်လျှင် လနှင့်ချီ နေထိုင်ချင်သည်ဟု ပြောကြားခဲ့ကြောင်း ရုရှားသတင်းဌာန TASS က ဖော်ပြခဲ့သည်။
ရုရှားနိုင်ငံနှင့် ပတ်သက်ပြီး ဆီးဂဲလ်၏ နွေးထွေးသည့် သဘောထားများကို သိထားပြီးဖြစ်ကြောင်း၊ နာမည်ကြီး သရုပ်ဆောင် တစ်ဦးဖြစ်ခြင်းသည် ၎င်းင်းကို နိုင်ငံသားဖြစ်ခွင့် ရရန်အတွက် အကြောင်းတစ်ခုဖြစ်ကြောင်း ပူတင်၏ ပြောခွင့်ရပုဂ္ဂိုလ် ဒီမီထရီပီကော့ဗ်က ပြောကြားခဲ့သည်။
ဆီးဂဲလ်သည် ပူတင်နှင့် မိတ်ဆွေဖြစ်ပြီးနောက် ရုရှားနိုင်ငံသားအဖြစ် ခံယူခွင့်ရရှိ သည့် အနောက်နိုင်ငံသား ထင်ရှားကျော်ကြားသူများထဲတွင် နောက်ဆုံးတစ်ယောက်ဖြစ်သည်။
ပြင်သစ်သရုပ်ဆောင် ဂျရက်ဒီပါဒရူးသည် မွေးရပ်နိုင်ငံတွင် အခွန်နှုန်းမြင့်တက်မှုအား ဒေါသထွက်ခဲ့ပြီး အခွန်တိမ်းရှောင်ခဲ့ပြီးနောက် ၂၀၁၃ ခုနှစ်တွင် ရုရှားနိုင်ငံကူးလက်မှတ် ရရှိခဲ့သည်။ ပူတင်သည် အမေရိကန် လက်ဝှေ့ကစားသမား ရွိုင်းဂျုန်းဂျူနီယာနှင့် အမေရိကန် mixed martial artist ဂျက်ဖ်မန်ဆန်ကိုလည်း နိုင်ငံသားအဖြစ် ခံယူခွင့် ပေးခဲ့သည်။
အသက် ၆၄ နှစ်အရွယ်ရှိ ဆီးဂဲလ်သည် ၁၉၈၀ ပြည့်လွန်နှစ်များနှောင်းပိုင်းနှင့် ၁၉၉၀ ပြည့်လွန်နှစ်များ အစောပိုင်းတွင် Under Siege၊ Above the Law  အစရှိသည့် ဇာတ်ကားများဖြင့် အောင်မြင်မှု အထွတ်အထိပ် ရောက်ရှိခဲ့သည်။ ဆီးဂဲလ်သည် ဥရောပအရှေ့ပိုင်းတွင် လူကြိုက်များနေဆဲဖြစ်ပြီး ဇန်နဝါရီတွင် ဆားဘီးယားနိုင်ငံသားအဖြစ် ခံယူခွင့်ရရှိခဲ့သည်။