Top News

ပြီးခဲ့သည့် ၂၀၁၉-၂၀၂၀ ဘဏ္ဍာနှစ်အစတွင် ပို့ကုန်မြင့်တက်ခဲ့ပြီး ကုန်သွယ်မှု ပိုငွေဖြစ်ပေါ်ခဲ့သော်လည်း လက်ရှိဘဏ္ဍာနှစ် တစ်လကျော်တွင် ယခင်နှစ်ကာလတူထက် ပို့ကုန်တင်ပို့မှု ထက်ဝက်ကျော်လျော့ကျခဲ့ပြီး ကုန်သွယ်မှုလိုငွေ ဒေါ်လာသန်း ၄၆၀ ကျော် ဖြစ်ပေါ်ခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသည့် စာရင်းများအရ သိရသည်။

လက်ရှိ ၂၀၂၀-၂၀၂၁ ဘဏ္ဍာနှစ် အောက်တိုဘာ ၁ ရက်မှ နိုဝင်ဘာ ၆ ရက်အထိ တစ်လကျော်အတွင်း ပြည်ပသို့ ပို့ကုန်တင်ပို့မှုသည် ဒေါ်လာ တစ်ဘီလျံကျော်သာရှိပြီး ယခင်နှစ်ကာလတူထက် တင်ပို့မှုဒေါ်လာ တစ်ဘီလျံကျော်အထိ (ထက်ဝက်ကျော်) လျော့ကျခဲ့သည်။ သွင်းကုန်တင်သွင်းမှုမှာ ဒေါ်လာ ၁ ဒသမ ၅ ဘီလျံနီးပါးရှိပြီး ယခင်နှစ်ကာလတူထက် ဒေါ်လာသန်း ၃၇၀ ကျော်လျော့ကျခဲ့သည်။

ကုန်သွယ်မှုလိုငွေဆိုသည်မှာ မြန်မာနိုင်ငံက တင်ပို့ထားသည့် ပို့ကုန်ပမာဏထက် ပြည်ပနိုင်ငံများမှ တင်သွင်းထားသည့် သွင်းကုန်ပမာဏ ပို၍များနေခြင်းကို ဆိုလိုသည်။

ပြီးခဲ့သည့် ၂၀၁၉-၂၀၂၀ ဘဏ္ဍာနှစ်အစ တစ်လအတွင်း ပို့ကုန်တင်ပို့မှုသည် ဒေါ်လာ ၂ ဒသမ ၁၂၄ ဘီလျံအထိရှိပြီး သွင်းကုန်ပမာဏမှာ ဒေါ်လာ ၁ ဒသမ ၈၆၈ ဘီလျံသာရှိသည်။ ပို့ကုန်ပမာဏသည် သွင်းကုန်ပမာဏထက် ဒေါ်လာ ၂၅၆ ဒသမ ၆၄၃ သန်းအထိ ပိုမိုတင်ပို့ထားနိုင်ခဲ့သည်။

ထို့ကြောင့် ပြီးခဲ့သည့် ၂၀၁၉-၂၀၂၀ ဘဏ္ဍာနှစ်အစတွင် ကုန်သွယ်မှုပိုငွေ ဒေါ်လာ ၂၅၆ ဒသမ ၆၄၃ သန်းအထိ ဖြစ်ပေါ်ခဲ့သည်။

သို့သော်လက်ရှိဘဏ္ဍာနှစ် တစ်လတွင် မြန်မာနိုုင်ငံ၏ ပို့ကုန်ပမာဏသည် ဒေါ်လာ ၁ ဒသမ ၀၃၂ ဘီလျံသာရှိပြီး သွင်းကုန်ပမာဏသည် ဒေါ်လာ ၁ ဒသမ ၄၉၈ ဘီလျံအထိ ရှိသည်။ သွင်းကုန်ပမာဏသည် ပို့ကုန်ပမာဏထက် ဒေါ်လာ ၄၆၅ ဒသမ ၈၁၃ သန်း ပိုမိုတင်သွင်းထားသည်။

ထို့ကြောင့် လက်ရှိဘဏ္ဍာနှစ် တစ်လတွင် ကုန်သွယ်မှုလိုငွေမှာ ဒေါ်လာ ၄၆၅ ဒသမ ၈၁၃ သန်းအထိ ဖြစ်ပေါ်ခဲ့သည်။

COVID-19 ကာလတွင် ကုန်သွယ်မှုကဏ္ဍ၌ ထိခိုက်မှုနည်းပါးသည်ဟု ယူဆနိုင်သော်လည်း ၂၀၂၀-၂၀၂၁ ဘဏ္ဍာနှစ်တွင် ထိခိုက်မှုများရှိလာနိုင်သည့်အတွက် ကြိုတင်ပြင်ဆင်ထားရန်နှင့် COVID-19 အလွန်ကာလ၌ ကုန်သွယ်မှုတိုးမြှင့်နိုင်ရန်တို့အတွက် အစီအမံများချမှတ်ဆောင်ရွက်သွားရန် လိုအပ်ကြောင်း အောက်တိုဘာ၂၉ ရက်က ပြုလုပ်သည့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ လုပ်ငန်းညှိနှိုင်းအစည်းအဝေးတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

မြန်မာနိုင်ငံ၏ပြည်ပပို့ကုန်တိုးမြှင့်ရေးအတွက် အမျိုးသားပို့ကုန်မဟာဗျူဟာစီမံကိန်း ရေးဆွဲအကောင်အထည်ဖော်လျက် ရှိသည်။