Top News

Netflix က ဖြန့်ချိခဲ့သည့် ဒရာမာဇာတ် မြူးဇာတ်ကား Marriage Story သည် ဒီဇင်ဘာ ၉ ရက်က ထုတ်ပြန်ခဲ့သည့် ရွှေကမ္ဘာလုံးဆု ဆန်ခါတင်စာရင်းတွင်  အကောင်းဆုံးဇာတ်ကားဆု အပါအဝင် ဆုခြောက်ဆုအတွက် ဦးဆောင်ခဲ့သည်။

ဟောလိဝုဒ်၏ ထိပ်တန်းရုပ်ရှင်ဒါရိုက်တာများနှင့် သရုပ်ဆောင်များကို ဆွဲဆောင်ရန် ဒေါ်လာ ဘီလျံများစွာ အသုံးပြုခဲ့ပြီး ဆုပေးပွဲ ရာသီလှုပ်ရှားမှုများအတွက် ရန်ပုံငွေရက်ရက် ရောရောအသုံးပြုခဲ့သည့် အွန်လိုင်းရုပ်သံနှင့် ထုတ်လုပ်ရေးကုမ္ပဏီ Netflix က ဆန်ခါတင်ဆု ၁၇ ဆုဖြင့် ဟောလိဝုဒ်ထုတ်လုပ်ရေး စတူဒီယိုများကို အပြတ်အသတ်ကျော်တက်ခဲ့သည်။

ဒါရိုက်တာမာတင်စကော့ဆေးဆေး ရိုက်ကူးသည့် The Irishman ဇာတ်ကားနှင့် ဒါရိုက်တာ ကွန်တင်တာရန်တီနိုရိုက်ကူးသည့် Once Upon a Time in Hollywood ဇာတ်ကားသည် ဆုငါးဆုစီအတွက် ဆန်ခါတင်စာရင်းတွင် ဖော်ပြခံခဲ့ရသည်။ မှုခင်းဇာတ်ကား The Irishman သည်လည်း Netflix က ထုတ်လုပ်သည့် ဇာတ်ကားဖြစ်သည်။

Netflix တွင် ထုတ်လွှင့်သည့် အတ္ထုပ္ပတ္တိ ဒရာမာဇာတ်ကား The Two Popes သည်လည်း အဓိကအမျိုးသားသရုပ်ဆောင်ဆုနှင့် အမျိုးသားဇာတ်ပို့သရုပ်ဆောင်ဆုအတွက် လျာထားခံခဲ့ရသည်။

Netflix ၏ အတ္ထုပ္ပတ္တိ ဇာတ်မြူးဇာတ်ကားဖြစ်သည့် Dolemite Is My Name ဇာတ်ကားသည်လည်း အကောင်းဆုံးဇာတ်ကားဆု (ဂီတပဒေသာ/ ဇာတ်မြူး) နှင့် အက်ဒီမာဖီအတွက် အကောင်းဆုံး အမျိုးသားသရုပ်ဆောင်ဆုအတွက် လျာထားခံခဲ့ရသည်။

ကမ္ဘာတစ်ဝန်း လက်မှတ်ရောင်းချမှု ဝင်ငွေ ဒေါ်လာ တစ်ဘီလျံကျော် ရရှိခဲ့သည့် Joker ဇာတ်ကားသည် အကောင်းဆုံးဒရာမာ ဇာတ်ကားဆု၊ ဒါရိုက်တာဆုနှင့် အမျိုးသား သရုပ်ဆောင်ဆုတို့အတွက် လျာထားခံခဲ့ရသည်။

အဆိုတော် ဘီယွန်းစေး၊ တေလာဆွစ်နှင့် ဂျနီဖာလိုပက်ဇ်တို့သည် best original Song ဆုအတွက် ဆန်ခါတင်စာရင်းတွင် ဖော်ပြခံခဲ့ရသည်။ တောင်ကိုရီးယားဒါရိုက်တာ Bong Joon-ho ၏ Parasite ဇာတ်ကားက အကောင်းဆုံးနိုင်ငံခြား ဘာသာစကားပြောဇာတ်ကားဆု၊ ဒါရိုက်တာဆုနှင့် ဇာတ်ညွှန်းဆုအတွက် လျာထားခံခဲ့ရသည်။

ရွှေကမ္ဘာလုံးဆုသည် ဖေဖော်ဝါရီတွင် ကျင်းပမည့် အော်စကာဆုပေးပွဲအတွက် အရေးပါသည့် ဆုပေးပွဲတစ်ခုအဖြစ် ယူဆခံခဲ့ရသည်။ ရွှေကမ္ဘာလုံးဆုပေးပွဲသည် ဒရာမာဇာတ်ကား၊ ဂီတပဒေသာ/ ဇာတ်မြူးဇာတ်ကားများအတွက် ဆုကို သီးခြားစီ ရွေးချယ် ချီးမြှင့်သည့် ဆုပေးပွဲဖြစ်သည်။ Hollywood Foreign Press Association က ၂၀၁၉ ခုနှစ်အတွင်း ဖြန့်ချိ၊ ထုတ်လွှင့်ခဲ့သည့် ဇာတ်ကားနှင့် ဇာတ်လမ်းတွဲများထဲမှ အကောင်းဆုံးများကို ရွေးချယ်ချီးမြှင့်သည့် ရွှေကမ္ဘာလုံးဆုပေးပွဲကို  ၂၀၂၀ ပြည့်နှစ် ဇန်နဝါရီ  ၅ ရက် တွင် ကျင်းပမည်ဖြစ်သည်။