Top News

အိမ်နီးချင်းနိုင်ငံများနှင့် နယ်စပ်ကုန်သွယ်ရန် ဖွင့်လှစ်ထားသည့် နယ်စပ်ကုန်သွယ်ရေးစခန်း ၁၅ ခုအနက် မူဆယ်၊ ကျိုင်းတုံ၊ တာချီလိတ်၊ မြိတ်နှင့် စစ်တွေစခန်းများ၏ နယ်စပ်ကုန်သွယ်မှု ပမာဏမှာ ယခင်ဘဏ္ဍာနှစ်ကာလတူနှင့် နှိုင်းယှဉ်ပါက  လျော့ကျနေကြောင်း ကုန်သွယ်ရေးဦးစီးဌာန၏ နယ်စပ်ကုန်သွယ်မှုဆိုင်ရာ စာရင်းများအရ သိရသည်။
 
၂၀၁၆-၂၀၁၇ ဘဏ္ဍာနှစ် ဧပြီ ၁ ရက်မှ ဇွန် ၁၇ ရက်အထိ နယ်စပ်စခန်းအားလုံး၏ စုစုပေါင်းကုန်သွယ်မှုပမာဏမှာ ဒေါ်လာ ၁၃၁၄ ဒသမ ၆၃၈ သန်းရှိပြီး ယခင်ဘဏ္ဍာနှစ်ကာလတူ ကုန်သွယ်မှု ပမာဏထက် ဒေါ် လာ ၁၉ သန်းကျော် လျော့ကျခဲ့ကြောင်း သိရသည်။ နယ်စပ်ကုန်သွယ်ရေးစခန်း ၁၅ ခု အနက် မြန်မာ-တရုတ်နယ်စပ်ရှိ မူဆယ်ကုန်သွယ်ရေးစခန်း၏ နယ်စပ်ကုန်သွယ်မှု ပမာဏမှာ ယခင်ဘဏ္ဍာနှစ် ကာလတူထက် ဒေါ်လာသန်း ၁၂၀ ကျော် လျော့ကျခဲ့ပြီး ကျိုင်းတုံ နယ်စပ်ကုန်သွယ်ရေးစခန်းမှလည်း ဒေါ်လာနှစ်သန်းကျော် လျော့ကျခဲ့ကြောင်း သိရသည်။
 
မြန်မာ-ထိုင်းနယ်စပ်ကုန်သွယ်ရန် ဖွင့်လှစ်ထားသည့် တာချီလိတ်စခန်းမှလည်း ယခင်ဘဏ္ဍာနှစ် ကာလတူထက် ဒေါ်လာ ခြောက်သိန်းကျော်၊ မြိတ်ကုန်သွယ်ရေးစခန်းမှ ဒေါ်လာတစ်သောင်းကျော် လျော့ကျ  ခဲ့ကြောင်း သိရသည်။ ထို့အတူ မြန်မာ-ဘင်္ဂလားဒေ့ရှ် နယ်စပ်ကုန်သွယ်မှု ဆောင်ရွက်သည့် စစ်တွေနယ်စပ်ကုန်သွယ်ရေးစခန်းမှလည်း ယခင်ဘဏ္ဍာနှစ် ကာလတူထက် ကုန်သွယ်မှုပမာဏ ဒေါ်လာ နှစ်သိန်းကျော် လျော့ကျခဲ့ကြောင်း သိရသည်။
 
မြန်မာနိုင်ငံနှင့် ဆက်စပ်လျက်ရှိသော အိမ်နီးချင်းနိုင်ငံများနှင့် နယ်စပ်ကုန်သွယ်မှု ပြုလုပ်နိုင်ရန် မြန်မာ-အိန္ဒိယ၊ မြန်မာ-ထိုင်း၊ မြန်မာ-တရုတ်၊ မြန်မာ-ဘင်္ဂလားဒေ့ရှ်တို့  နယ်စပ်ကုန်သွယ်ရေးစာချုပ်များ ချုပ်ဆိုထားပြီး ဖြစ်ကြောင်း သိရသည်။
 
တရုတ်၊ အိန္ဒိယ၊ ထိုင်း၊ ဘင်္ဂလားဒေ့ရှ်တို့နှင့် နယ်စပ်ကုန်သွယ်မှု ပြုလုပ်ရန်အတွက် မူဆယ်၊ လွယ်ဂျယ်၊ ကံပိုက်တီး၊ ချင်းရွှေဟော်၊ တမူး၊ ရိဒ်၊ မြဝတီ၊ တာချီလိတ်၊ ကျိုင်းတုံ၊ ကော့သောင်း၊မြိတ်၊ နဘုလယ်/ထီးခီး၊ မောတောင်၊ စစ်တွေ၊ မောင်တော စသည့် နယ်စပ်ကူးသန်းရောင်းဝယ်ရေး စခန်း ၁၅ ခုကို ဖွင့်လှစ်ထားကြောင်း သိရသည်။
 
ကုန်သွယ်မှု ဆောင်ရွက်ရာတွင် မြန်မာနိုင်ငံမှ လယ်ယာထွက်ကုန်များ၊ တိရစ္ဆာန်ထွက်ပစ္စည်းများ၊ သတ္တုတွင်းထွက်များ၊ သစ်တောထွက်ကုန်များ၊ စက်မှုကုန်ချောများ တင်ပို့ခဲ့ပြီး အိမ်နီးချင်းနိုင်ငံများမှ လူသုံးကုန် ပစ္စည်း ၊ လုပ်ငန်းသုံး ကုန်ကြမ်းများ၊ ရင်းနှီးမြှုပ်နှံမှု ကုန်ပစ္စည်းများကို မြန်မာနိုင်ငံသို့ တင်သွင်းခဲ့ခြင်းဖြစ်ကြောင်း သိရသည်။
 
နယ်စပ်ဒေသနေ ဒေသခံများ တစ်နိုင်တစ်ပိုင် ကုန်သွယ်မှုပြုလုပ်နိုင်ရန်နှင့် တရားမဝင် ကုန်သွယ်မှု လျော့နည်းလာစေရန်အတွက် တစ်ဦးတည်းပိုင် ထုတ်ကုန်သွင်းကုန်  လုပ်ငန်းရှင် မှတ်ပုံတင်ကတ်များကို နယ်စပ် ကူးသန်းရောင်းဝယ်ရေး စခန်းများအားလုံးတွင် ထုတ်ပေးနေကြောင်း သိရသည်။
 
နယ်စပ်ကုန်သွယ်ရေး တိုးချဲ့နိုင်ရန်အတွက် ကုန်သွယ်မှုအရ  အချက်အချာကျသည့် ဒေသများတွင် ကုန်သွယ်ရေးစခန်းများ တိုးချဲ့ဖွင့်လှစ်နိုင်ရန် သက်ဆိုင်ရာနိုင်ငံများနှင့် ညှိနှိုင်းဆောင်ရွက်သွားရန် အစီအစဉ်များရှိကြောင်း သိရသည်။