Top News

ဂျပန်ရုပ်ရှင်ဇာတ်ကားပေါင်း ၂၇ ကားကို အွန်လိုင်းမှ အလွယ်တကူ အားပေးကြည့်ရှုနိုင်မည့် JFF: Plus Online Festival ကို ဇန်နဝါရီ ၁၃ ရက်မှ ၂၂ ရက်အထိ ကျင်းပမည်ဖြစ်ရာ ရုပ်ရှင်ပွဲတော် စတင်ဖွင့်လှစ်မည့် ဇန်နဝါရီ ၁၃ ရက်တွင် ဂျပန်ရုပ်ရှင်ဇာတ်ကားသစ် သုံးကားကို ပြသမည်ဖြစ်ကြောင်း သိရသည်။ ဇန်နဝါရီ ၁၃ ရက် မွန်းတည့် ၁၂ နာရီအချိန်တွင် Moon of a sleepness night ဇာတ်ကားကိုပြသမည်ဖြစ်ပြီး ယင်းဇာတ်ကားမှာ ရှဉ့်ကလေးတစ်ကောင်နှင့် ကောင်လေးတစ်ဦးတို့ကို အခြေခံထားသည့်ဇာတ်ကားတစ်ကားဖြစ်သည်။ မွန်းလွဲ ၂ နာရီတွင် Project Dreams-How to Build Mazinger Z’s Hanger ဇာတ်ကားကိုပြသမည် ဖြစ်သည်။ ယင်းဇာတ်ကားတွင် ကုမ္ပဏီဝန်ထမ်းများ၏ လှုပ်ရှားရုန်းကန်ရသည့်ဘဝရပ်တည်မှုများကို အခြေခံပုံဖော်ထားသည့် ဇာတ်ကားဖြစ်သည်။ ညနေ ၄ နာရီတွင် Dance with me ဇာတ်ကားကို ပြသမည် ဖြစ်ပြီး ယင်းဇာတ်ကားမှာ musical comedy ဇာတ်ကားအဖြစ် ပျော်ရွှင်ရယ်မြူးဖွယ် ဖန်တီးထားခြင်းဖြစ်သည်။

မတူကွဲပြားသည့်ရသမျိုးစုံဖြင့် ဖန်တီးထားသော ဂျပန်ရုပ်ရှင်ဇာတ်ကားကောင်းများကို အဆိုပါ ရုပ်ရှင်ပွဲတော်တွင် ရွေးချယ်အားပေးနိုင်မည်ဖြစ်ကာ အိမ်တွင် နေထိုင်ရင်း website မှ အခမဲ့အားပေး ကြည့်ရှုနိုင်မည်ဖြစ်သည်။ နှစ်စဉ်နှစ်တိုင်းတွင် မြန်မာနိုင်ငံ၌ ကျင်းပလေ့ရှိသည့် ဂျပန်ရုပ်ရှင်ပွဲတော်များကို ယခုနှစ်တွင် ကိုဗစ်ကပ်ရောဂါ ပြန့်ပွားလျက်ရှိသည့်အခြေအနေအရ အွန်လိုင်းရုပ်ရှင်ပွဲတော်အဖြစ် ပြောင်းလဲကျင်းပရန် စီစဉ်ထားခြင်းဖြစ်သည်။ ရုပ်ရှင်ပွဲတော်နှင့်ပတ်သက်သည့် အသေးစိတ် အချက်အလက်များကို Japanses Film Festival Myanmar Facebook Page တွင် လွှင့်တင်ထားကြောင်း သိရသည်။