Top News

တောင်ကိုရီးယားစိတ်ကူးယဉ်သိပ္ပံဇာတ်လမ်းတွဲ The Silent Sea က Netflix ၏ လတ်တလော လူကြည့်အများဆုံးဇာတ်ကားစာရင်းတွင် နံပါတ် (၃) နေရာရထားသည်။  သို့သော်လည်း ၎င်းရှေ့တွင်ပြထားသည့် Squid Game နှင့် Hellbound ခြေရာတို့ကိုတော့ မလိုက်နိုင်ခဲ့ပေ။

ဒီဇင်ဘာ ၂၄ ရက်က စတင်ထုတ်လွှင့်ပြီးနောက် The Silent Sea ဇာတ်လမ်းတွဲသည်  Netflix ၏ လူကြည့်အများဆုံး နံပါတ် (၇)နေရာမှ နံပါတ်(၃) နေရာသို့ ခုန်တက်လာခြင်းဖြစ်သည်။

Squid Game နှင့် Hellbound ပြသစဉ်ကမူ နံပါတ် (၁) နေရာတွင်ရပ်တည်ခဲ့ပြီး Squid Game က Netflix ၏ လူကြည့်အများဆုံးဇာတ်လမ်းတွဲဖြစ်လာသည်အထိ အောင်မြင်ခဲ့သည်။

အန္တရာယ်များသည့်၂၄ နာရီကြာ လကမ္ဘာခရီးစဉ်အတွင်း အာကာသယာဉ်မှူးများက စွန့်ပစ်ခံသုတေသနခန်းတစ်ခုမှ နမူနာ sample များကို ကြိုးစားယူရသည့်ဇာတ်လမ်းဖြစ်ပြီး အပိုင်းရှစ်ပိုင်းရိုက်ကူးထားသည်။

၂၀၁၄ ခုနှစ်က အလားတူနာမည်ဖြင့် ထွက်ခဲ့သည့်ဇာတ်လမ်းတိုကို ပြန်လည်မှီငြမ်းရိုက်ကူးထားခြင်းဖြစ်ပြီး ၃၇ မိနစ်ကြာယခင်ဇာတ်လမ်းတိုကို Netflix သဘောတူညီချက်ဖြင့်  ပြန်လည်ရိုက်ကူးလိုက်ခြင်းဖြစ်သည်။

ဇာတ်လိုက်နေရာမှ ပါဝင်ထားသူများက မင်းသမီး Bae Doo-na၊ မင်းသား Gong Yoo နှင့် Lee Joon တို့ဖြစ်သည်။

Bae Doo-na သည်၂၀၁၉ ခုနှစ်က တောင်ကိုရီးယား၏ ပထမဆုံး Netflix ဇာတ်လမ်းတွဲအဖြစ်ပြသခဲ့သည့် zombie သည်းထိတ်ရင်ဖိုရုပ်ရှင် Kingdom မှ မင်းသမီးဖြစ်ပြီး Gong Yoo က မနှစ်က Netflix တွင် ဝက်ဝက်ကွဲအောင်မြင်ထားသည့် Squid Game တွင် ပါဝင်ထားသည်။

Train To Busan မင်းသားအဖြစ် ထင်ရှားလာသူ Gong သည် ဒီဇင်ဘာ ၁ ရက်ကမှ အင်စတာဂရမ်အကောင့် ဖွင့်လိုက်ပြီး ၂၄ နာရီအတွင်း ဖော်လိုဝါ ၁.၄ သန်းရခဲ့သည်။ သူသည် မင်းသမီး Kim Tae Ri နှင့်လည်း ဒရာမာဇာတ်လမ်းသစ်ရိုက်ကူးရန် ကမ်းလှမ်းခံထားရသည်။