Top News

■ မန်ချက်စတာယူနိုက်တက် ၁-၀ ဝက်စ်ဟမ်း

(မိနစ် ၉၀ ၀-၀၊ အချိန်ပိုတွင် မန်ချက်စတာယူနိုက်တက်နိုင်)

မန်ချက်စတာယူနိုက်တက်အသင်းဟာ အိုးလ်ထရက်ဖို့ဒ်မှာ ဝက်စ်ဟမ်းအသင်းကို အချိန်ပိုအထိ ကစားခဲ့ရပေမဲ့ တွမ်မီနေးရဲ့ တစ်လုံးတည်းသောဂိုးနဲ့ အနိုင်ရပြီး FA ဖလားကွာတားဖိုင်နယ် တက်ရောက်နိုင်ခဲ့ပါတယ်။ 

ဆိုးလ်ရှားဟာ မန်ယူအသင်းရဲ့ပွဲထွက်စာရင်းမှာ ဘရူနိုဖာနန်ဒက်စ်ကို အရန်ခုံမှာထားခဲ့ပြီး ဗန်ဒယ်ဘိခ်ကို ပွဲထုတ်ခဲ့သလို၊ တိုက်စစ်မှာ မာစီယဲလ်ကို အထောင်ထားကာ တောင်ပံနှစ်ဖက်မှာတော့ ရပ်ရှ်ဖို့ဒ်နဲ့ ဂရင်းဝုဒ်တို့ကို အသုံးပြုခဲ့ပါတယ်။ ဝက်စ်ဟမ်းကတော့ ယာမိုလန်ကိုကို အထောင်ထားကာ ၄-၂-၃-၁ ပုံစံနဲ့ မန်ယူကို ရင်ဆိုင်ခဲ့တာပါ။ 

မန်ယူအသင်းဟာ ပွဲစကတည်းက ဘောလုံးပိုင်ဆိုင်မှုအသာစီးရယူကာ ဂိုးရဖို့အတွက် ဖိကစားခဲ့တာပါ။ ဝက်စ်ဟမ်းကတော့ မန်ယူအသင်းကို တိုက်စစ်ထိန်းရင်း ခံစစ်မှာပဲ အချိန်ကုန်ခဲ့ရပါတယ်။ 

ပွဲစကတည်းက ဖိကစားခဲ့တဲ့ မန်ယူအသင်းဟာ ဂိုးသွင်းခွင့်တွေလည်း ရရှိခဲ့ပြီး ပွဲအစပိုင်းမှာ မာစီယဲလ် အနီးကပ် ပိတ်သွင်းချက်ကို ဝက်စ်ဟမ်း နောက်ခံလူတွေ တားဆီးနိုင်ခဲ့သလို၊ ဂရင်းဝုဒ်၊ ဗန်ဒယ်ဘိခ်တို့ကလည်း ရရှိလာတဲ့ အခွင့်အရေးတွေကို အသုံးချနိုင်ခဲ့ခြင်း မရှိပါဘူး။ 

ပထမပိုင်းမှာ မန်ယူအသင်း ဂိုးရဖို့ အနီးစပ်ဆုံးဖြစ်ခဲ့တာက ပွဲချိန် (၂၇)မိနစ်မှာ လင်ဒီလော့ဖ်ရဲ့ ခေါင်းတိုက်ချက်ပဲ ဖြစ်ပါတယ်။ ထောင့်ကန်ဘောကနေ တဲလက်စ် တင်ပေးတာကို လင်ဒီလော့ဖ် ခေါင်းတိုက်ရာမှာ ဝက်စ်ဟမ်းကစားသမားနဲ့ထိပြီး လမ်းကြောင်း ပြောင်းခဲ့ပေမဲ့ ဂိုးသမား ဖာဘီယန်စကီး ပုတ်ထုတ်ကာကွယ်နိုင်ခဲ့တာကြောင့် မန်ယူတို့ ဂိုးမရခဲ့တာပါ။ 

မန်ယူအသင်းဟာ ပထမပိုင်းမှာ ဂိုးကန်သွင်းခွင့် (၈)ကြိမ်အထိ ရရှိခဲ့ပေမဲ့ ဂိုးပေါက်တည့် (၁)ကြိမ်သာ ရှိခဲ့ပြီး ဝက်စ်ဟမ်းအသင်းက ဂိုးပေါက်ခြိမ်းခြောက်မှု (၁)ကြိမ်သာ ရှိခဲ့တာပါ။ 

ဒုတိယပိုင်းမှာလည်း မန်ယူအသင်းကပဲ ဖိကစားခဲ့ပြီး ပွဲချိန် (၅၃)မိနစ်မှာ ရပ်ရှ်ဖို့ဒ်ရဲ့ ကန်ချက်ကို ဖာဘီယန်စကီး ကာကွယ်နိုင်ခဲ့ပါတယ်။ ဝက်စ်ဟမ်းကတော့ ဒုတိယပိုင်းမှာ မန်ယူအသင်းဘက်ကို တိုက်စစ်ဆင်မှုတွေ ပြန်လည်ပြုလုပ်နိုင်ခဲ့တာ တွေ့ရပါတယ်။ 

မန်ယူအသင်းဟာ ဂိုးရဖို့ ရုန်းကန်နေရတာကြောင့် ပွဲချိန် (၇၃)မိနစ်မှာတော့ ဆိုးလ်ရှားဟာ ဗန်ဒယ်ဘိခ်နဲ့ မာတစ်တို့ကို ထုတ်ပြီး ဘရူနိုဖာနန်ဒက်စ်နဲ့ တွမ်မီနေးတို့ကို ထည့်သွင်းကစားခဲ့ပါတယ်။ 

သူတို့ဝင်လာပြီးနောက်မှာလည်း မန်ယူအသင်းဟာ အခွင့်အရေးတွေ ရခဲ့ပေမဲ့ ဝက်စ်ဟမ်းအသင်းရဲ့ ခံစစ်ကို မကျော်နိုင်တာကြောင့် ဂိုးရဖို့ ရုန်းကန်ခဲ့ရပြီး မိနစ် (၉၀)ပြည့်တဲ့အထိ နှစ်ဖက်လုံးဂိုးမသွင်းနိုင်လို့ အချိန်ပို ဆက်ကစားခဲ့ရပါတယ်။ 

အချိန်ပိုဆက်ကစားရာမှာလည်း မန်ယူကပဲ ဖိကစားခဲ့ပြီး ပွဲချိန် (၉၇)မိနစ်မှာတော့ အဖွင့်ဂိုးရခဲ့ပါတယ်။ ဝက်စ်ဟမ်းအသင်းရဲ့ ဧရိယာအတွင်းမှာ ရပ်ရှ်ဖို့ဒ် ချပေးတာကို လူစားဝင်ကစားသမား တွမ်မီနေးက သွင်းယူခဲ့တာပါ။ 

ကျန်ပွဲချိန်တွေမှာ နှစ်သင်းစလုံး ဂိုးတွေရဖို့ ကြိုးစားခဲ့ကြပေမဲ့ အခွင့်အရေးအသုံးချနိုင်ခဲ့ခြင်းမရှိတာကြောင့် ပွဲအပြီးမှာတော့ မန်ယူအသင်းက (၁-၀)ဂိုးနဲ့ အနိုင်ရပြီး FA ဖလားကွာတားဖိုင်နယ် တက်ရောက်သွားခဲ့ပါတယ်။