Top News

ဆယ်ကျော်သက်အရွယ်တည်းက အနုပညာအလုပ်တွေကို လုပ်ကိုင်ခဲ့ပြီး ပရိသတ်တွေရဲ့ ချစ်ခင်အားပေးမှုနဲ့အတူ နေရာတစ်ခုကို ပိုင်ဆိုင်ခဲ့သူက ဟန်တီပါ။ အလှမယ်တစ်ယောက်အဖြစ်လည်း ပွဲတွေမှာပါဝင်ယှဉ်ပြိုင်ခဲ့ပြီး မြန်မာကိုယ်စားပြုအလှမယ်အဖြစ်လည်း နိုင်ငံတကာကို သွားရောက်ယှဉ်ပြိုင်ခဲ့ရသူ ဟန်တီအနေနဲ့ လက်ရှိမှာတော့ ‘ကြေကွဲမိုးတိမ်’ ဆိုတဲ့ ဗီဒီယိုဇာတ်ကားလေး ရိုက်ကူးနေပါတယ်။ ဟန်တီနဲ့တွေ့ဆုံခိုက် လတ်တလော သူ့ရဲ့အနုပညာခြေလှမ်းတွေအကြောင်း မေးမြန်းဖြစ်ခဲ့ပါတယ်။

မေး - ကြေကွဲမိုးတိမ်ဇာတ်ကားမှာ ပါဝင်ဖြစ်ခဲ့တဲ့အကြောင်းလေး ပြောပြပေးပါဦး။

ဖြေ - ဟန်တီအနေနဲ့ ဇာတ်ကားရိုက်ကူးမှုတွေ ပြန်လုပ်မယ်လို့ဆုံးဖြတ်တဲ့အချိန်မှာ ဒီကြေကွဲမိုးတိမ်ဆိုတဲ့ ဇာတ်ကားလေးကို စပြီးရိုက်ကူးဖြစ်တာပါ။ အစပိုင်းတုန်းကတော့ ဟန်တီ့အနေနဲ့ ဇာတ်ကားရိုက်ကူးမှု တွေနားထားတယ်။ နောက်ပြီး ဒီကာလတွေဆိုတာက ဟန်တီ့အတွက်တော့ ပညာသင်ယူနေတဲ့အချိန်လည်းဖြစ်သလို ကျောင်းတက်ရမှာတွေလည်းရှိလို့ မရိုက်ဖြစ်ခဲ့ပေမယ့် ဒီလိုအချိန်မှာ ဟန်တီ့အနေနဲ့ အခွင့်အရေးကောင်းတစ်ခုအဖြစ် ကမ်းလှမ်းတာခံရတယ်။ နောက်ပြီး ကိုယ်ပါဝင်ရမယ့်ဇာတ်ကောင်ကိုလည်း သဘောကျသလို ကိုယ့်အတွက်နေရာရတဲ့ဇာတ်လမ်း လေးလည်းဖြစ်တယ်။ ထုတ်လုပ်သူ ကိုဘိုစန်းတို့ဘက်ကလည်း ဒီဇာတ်ကားလေးထဲမှာ ပါဝင်စေချင်တယ်ဆိုပြီး သေချာလေးကမ်းလှမ်းတယ်။ ဟန်တီကိုယ်တိုင်ကလည်း ဒီဇာတ်လေးကို ရိုက်ချင်တယ်။ နောက်ပြီး ပရိသတ်တွေကလည်း ဟန်တီ့ကို ဘယ်တော့ဇာတ်ကားတွေရိုက်မလဲ၊ ဘယ်တော့ သရုပ်ဆောင်လုပ်မလဲဆိုတာမျိုးလေး အမြဲလိုမေးကြတယ်။ အဲဒီအတွက် ပရိသတ်တွေရဲ့ ဆန္ဒကိုလည်း ဖြည့်ဆည်းပေးနိုင်အောင်ဆိုပြီး ဒီနှစ်သစ်မှာ ပါဝင်ရုပ်ဆောင်ဖြစ်တာပါ။

မေး - ကြေကွဲမိုးတိမ်ဇာတ်ကားထဲမှာ ဟန်တီက ဘယ်လိုဇာတ်ကောင်မျိုးနဲ့ ပါဝင်ရမလဲ။

ဖြေ - ကြေကွဲမိုးတိမ်ဇာတ်ကားထဲမှာ ဟန်တီအနေနဲ့ ကာရိုက်တာလေးတစ်ခုယူထားတယ်။ ဟန်တီ့ရဲ့ ပုံစံနဲ့လည်း လိုက်တယ်လို့ ပြောရမယ်။ အဲဒီဇာတ်လမ်းထဲမှာ ဟန်တီက သင်တန်းသူတစ်ယောက်၊ သင်တန်းမှာခင်တဲ့ ကဗျာဆရာလေးတစ်ယောက်နဲ့ ဆုံမိပြီးဖြစ်လာတာလေးကို ပါဝင်သရုပ်ဆောင်ရမှာပါ။ နောက်ပြီး ဒီဇာတ်လမ်းထဲက ကောင်မလေးက အပြင်က လက်ရှိမှာလည်း ဟန်တီ့အသက်အရွယ်လောက်ပဲရှိတယ်။ ဟန်တီရဲ့ လက်ရှိအရွယ်ကောင်မလေးတစ်ယောက် အကြောင်းဖြစ်တဲ့အတွက် ဟန်တီ့အနေနဲ့ကတော့ ကိုယ့်ပုံစံမျိုးလေးပဲ ထည့်ပြီးသရုပ်ဆောင်မယ်လို့ စဉ်းစားထားတယ်။

မေး - ကြေကွဲမိုးတိမ် ဇာတ်ကားလေးနဲ့ပတ်သက်ပြီး ဟန်တီ့အနေနဲ့ရော ဘယ်လိုခံစားချက်မျိုးဖြစ်မိလဲ။

ဖြေ - ဟန်တီ့အနေနဲ့က ဒီဇာတ်လမ်းလေးမှာ လုပ်ကွက်ရတယ်။ အချစ်ဇာတ်လမ်းလေးကိုမှ ဒရမ်မာလည်းပါတယ်ဆိုပေမဲ့ ကိုယ်ပါဝင်ရမယ့် ဇာတ်ဝင်ခန်းတွေကတော့ အရမ်းကြီးဟဲဗီးကြီးတွေမရှိဘူး။ လူငယ်တွေရဲ့အချစ်ဇာတ်လမ်းလေးတစ်ပုဒ်ဖြစ်ပြီး မထင်မှတ်ပဲ အိမ်ထောင်ကျသွားပြီး ထင်မှတ်မထားတာတွေကြုံရတာမျိုးလေးတွေ ပါလာတာပေါ့။ ဟန်တီ့အနေနဲ့ကတော့ ဒီဇာတ်လမ်းမှာ ကိုယ့်ရဲ့သရုပ်ဆောင်မှုတွေက သဘာဝဆန်နေတာမျိုးဖြစ်အောင် ကြိုးစားမယ်။ ကိုယ့်ရဲ့ဇာတ်ကောင်အတိုင်း ပီပြင်အောင်ကြိုးစားဖို့ပဲ ခံစားချက်ထားပါတယ်။

မေး - ဟန်တီ့ရဲ့သရုပ်ဆောင်မှုတွေကို မြင်တွေ့ရတော့မယ်ဆိုတော့ ပရိသတ်တွေကို ဘယ်လိုကြိုပြောထားချင်တာရှိလဲ။

ဖြေ - ပရိသတ်တွေအနေနဲ့တော့ ဟန်တီ့ကို ဇာတ်လမ်းကောင်းကောင်းလေးမှာ သရုပ်ဆောင်မှု ကောင်းကောင်းလေးနဲ့ ပါဝင်စေချင်ကြတယ်။ အဲဒီလိုပုံစံမျိုးလေးကိုလည်း သူတို့တွေမြင်ချင်နေကြပြီဆိုတာ ခဏတိုင်းပြောတယ်။ ဟန်တီ့အနေနဲ့ ကိုယ့်ကိုချစ်ခင်အားပေးတဲ့ ပရိသတ်တွေရဲ့ ဆန္ဒကိုလည်း ဖြည့်ဆည်းပေးချင်တယ်။ နောက်ပြီး ကိုယ်တိုင်လည်း ကိုယ့်ပါဝင်ရမယ့်နေရာ မကောင်းဘဲနဲ့လည်း မရိုက်ချင်ဘူးလေ။ ပရိသတ်တွေက ကိုယ့်ဇာတ်ကားကို ကြည့်တဲ့အခါ သူတို့သဘောကျတာ မျိုးလေးပဲ ဖြစ်စေချင်တယ်။ ဒီဇာတ်ကားကတော့ ဟန်တီ့ပရိသတ်တွေ ကြည့်ရတဲ့အခါ သဘောကျမယ်လို့ထင်တဲ့အတွက် လက်ခံရိုက်ကူးဖြစ်ခဲ့တာပါ။

မေး - လက်ရှိမှာ ကိုယ့်ရဲ့အနုပညာလှုပ်ရှားမှုတွေအတွက် ဘယ်လိုတွေပြင်ဆင်ထားတာမျိုးရှိလဲ။

ဖြေ - ဟန်တီ့အနေနဲ့ လောလောဆယ်မှာတော့ အခုလိုပဲ ဇာတ်ကားရိုက်ကူးရေး တွေရှိမယ်။ ပြီးရင် Social Media ပေါ်ကလာမယ့် ဗီဒီယိုဇာတ်ကားလေးတွေ ရှိမယ်။ နောက်ပြီး ကြော်ငြာရိုက်ကူးမှုတွေကိုလည်း လုပ်ဖို့ရှိပါတယ်။ နောက်ပြီး Youtube ကနေ တင်ဆက်မယ့် အနုပညာလှုပ်ရှားမှုတွေလည်း ရှိပါတယ်။

မေး - အနုပညာအလုပ်တွေ လုပ်နေပြီဆိုတော့ ကျောင်းတက်ဖို့ရော ဘယ်လိုပြင်ဆင်ထားလဲ။

ဖြေ - ကျောင်းတက်ဖို့အတွက်လည်း လက်ရှိမှာ ဟန်တီ့အနေနဲ့ ဗီဇာတင်နေပါပြီ။ နောက်ထပ် တစ်လကျော်လောက်အထိ ကြာနိုင်တယ်လို့ ပြောသလို ဘယ်အချိန်ရမယ်ဆိုတာမျိုးကလည်း အခုအချိန်မှာ သေချာမသိရသေးပါဘူး။ ဟန်တီ့အနေနဲ့ ဒီမှာကတည်းက အွန်လိုင်းကနေပြီး သင်ယူနေတာဖြစ်တဲ့ အတွက် ဟိုရောက်သွားချိန်မှာ မှီသလောက်ကိုပဲ ဆက်တက်ရမှာပါ။

မေး - ကျောင်းတက်ရဦးမယ်ဆိုတော့ အနုပညာအလုပ်တွေအတွက်ရော ဘယ်လိုစဉ်းစားထားလဲ။

ဖြေ -ကျောင်းတက်ဖို့အတွက် တစ်ဖက်ကပြင်ဆင်နေတာတွေရှိသလိုပဲ ကျောင်းတက်ဖို့ မသွားရခင်အချိန်အထိ အခွင့်အရေးရတဲ့ အနုပညာအလုပ်တွေကို ဆက်တိုက်လုပ်သွားဖို့ စီစဉ်ထားပါတယ်။ ဒီမှာကတည်းက အွန်လိုင်း Class တွေ တက်ဖြစ်နေတဲ့အတွက် ဟိုမှာကျောင်းတက်ရတဲ့အချိန်က အရမ်းကြီးတော့ မကြာလောက်ပါဘူး။ ကျောင်းတက်ပြီး ပြန်လာတဲ့အခါကျရင်လည်း ကိုယ့်ဝါသနာပါတဲ့ အနုပညာအလုပ်တွေကို အခွင့်အရေးရလောက် ဆက်ပြီးလုပ်ဖြစ်မယ်။ ကျောင်းပြီးသွားရင် စီးပွားရေးအလုပ်လေး တွေလည်းလုပ်ဖို့ စဉ်းစားထားပေမယ့် ဘာပဲလုပ်ဖြစ်ဖြစ် ကိုယ့်ချစ်တဲ့ ကိုယ်ဝါသနာပါတဲ့ အနုပညာအလုပ်ကိုတော့ အမြဲတမ်းတွဲပြီးလုပ်သွားမှာပါ။

မေး - ပရိသတ်တွေစိတ်ဝင်စားတဲ့ ဟန်တီ့ရဲ့ အချစ်ရေးနဲ့ပတ်သက်ပြီး ဘာပြောထားချင်တာရှိလဲ။

ဖြေ - လက်ရှိမှာ Single ဘဝနဲ့ပဲ ပျော်နေပါတယ်။ အခြားစိတ်ရှုပ်စရာတွေ ဘာမှမရှိသေးပါဘူး။ အခုတလောမှာ အသက်ရလာတာနဲ့အမျှ အချစ်ရေးကို နှလုံးသားအရမ်း မစဉ်းစားတော့ပဲနဲ့ ဦးနှောက်နဲ့ ပိုပြီးစဉ်းစား လာတဲ့အတွက် ပိုပြီးစဉ်းစားရခက်ပါတယ်။

မေး - ပရိသတ်တွေအတွက် စကားလက်ဆောင်ဆိုရင်။

ဖြေ - ဟန်တီ့ကိုအားပေးကြတဲ့ ချစ်ပေးကြတဲ့ ပရိသတ်တွေ အားလုံးကို ကျေးဇူးတင်ပါတယ်။ ပရိသတ်တွေ အားလုံး စိတ်၏ချမ်းသာခြင်း ကိုယ်၏ကျန်းမာခြင်းတွေနဲ့ ပြည့်စုံကြပါစေလို့ ဆုတောင်းပေးပါတယ်။