Top News

အာဂျင်တီးနား တောင်ပံကစားသမား ဒီမာရီယာသည် သောကြာနေ့က ဂျူဗင်တပ်စ်အသင်းနှင့် ဆေးစစ်မှုပြုလုပ်ခဲ့ပြီး တစ်နှစ်စာချုပ် ချုပ်ဆိုမည်ဖြစ်ကြောင်း သိရသည်။

    

အသက် ၃၄ နှစ်ရှိပြီဖြစ်သည့် ၀ါရင့်ကစားသမား ဒီမာရီယာသည် PSG အသင်းနှင့် လမ်းခွဲပြီးနောက် ဂျူဗင်တပ်စ်အသင်းသို့ ပြောင်းရွှေ့ကြေးအလွတ်ဖြင့် ရောက်ရှိလာခြင်းဖြစ်သည်။ 

ဒီမာရီယာသည် မိသားစုဝင်များနှင့်အတူ မြန်မာစံတော်ချိန် သောကြာနေ့ နံနက်အစောပိုင်းတွင် တူရင်မြို့ လေဆိပ်သို့ သီးသန့်လေယာဉ်ဖြင့် ရောက်ရှိလာပြီး မွန်းလွဲပိုင်းတွင် ဂျူဗင်တပ်စ်အသင်း၏ J Medical စင်တာ၌ ဆေးစစ်မှုပြုလုပ်ခဲ့ခြင်းဖြစ်သည်။ 

အပြောင်းအရွှေ့ကျွမ်းကျင်သူ အီတလီဂျာနယ်လစ် ဖာဘရီဇီယိုရိုမာနို၏ ရေးသားဖော်ပြမှုအရ ဒီမာရီယာအနေဖြင့် အချက်အလက် အားလုံး သဘောတူညီမှုရရှိပြီးဖြစ်သောကြောင့် တစ်နှစ်စာချုပ် လက်မှတ်ရေးထိုးမည်ဖြစ်ကြောင်း သိရသည်။ 

ဒီမာရီယာသည် ဂျူ ဗင်တပ်စ်အသင်း၌ တစ်နှစ်လစာ ယူရို (၇) သန်းရရှိမည်ဖြစ်ပြီး PSG အသင်း၌ရရှိခဲ့သည့် လစာထက် ထက်ဝက်နီးပါး လျော့နည်းသွားသည်။ 

၎င်းသည် PSG အသင်းအတွက် (၇) ရာသီအတွင်း ၂၉၅ ပွဲကစား၊ ၉၂ ဂိုးသွင်းယူ ပေးခဲ့ပြီးနောက် စာချုပ်သက်တမ်းမတိုးဘဲ လမ်းခွဲရန်ဆုံးဖြတ်ခဲ့ခြင်းဖြစ်သည်။

    

ဂျူဗင်တပ်စ်အသင်းသည် မန်ယူအသင်းနှင့် လမ်းခွဲထားသည့် ကွင်းလယ်လူဟောင်း ပေါ့ဘာကိုလည်း ပြန်လည်ခေါ်ယူရန် သဘော တူညီမှုရရှိထားပြီး ယခုရက်သတ္တပတ်ကုန်တွင် ရောက်ရှိလာမည်ဖြစ်ကြောင်း သိရသည်။