Top News

Netflix ၏ လူကြည့်အများဆုံးရုပ်သံ စီးရီးဖြစ်ခဲ့သည့် Squid Game ကို စိတ်ကူးယဉ် တီဗွီဇာတ်လမ်းတွဲတစ်ခုအဖြစ်သာ မဟုတ်တော့ဘဲ ပြင်ပကမ္ဘာတွင်ပါ ပြိုင်ပွဲတစ်ရပ်အနေဖြင့် Netflix ကစီစဉ်ရိုက်ကူးတော့မည်ဖြစ်သည်။

Squid Game : The Challenge အမည်ဖြင့်ပြုလုပ်မည့် အဆိုပါ  reality show အစီအစဉ်အတွက် Netflix က ပြိုင်ပွဲဝင်များ စုဆောင်းလျက်ရှိပြီး အပိုင်း ၁၀ ပိုင်းပါဝင်မည်ဟု သိရသည်။

သို့သော် နဂိုတောင်ကိုရီးယားဇာတ်လမ်းတွဲကဲ့သို့ အသက်ကိုရင်းပြီး ယှဉ်ပြိုင်ရမည်မဟုတ်ဘဲ အဆိုးဆုံးအခြေအနေက ဆုကြေးအမေရိကန်ဒေါ်လာ ၄ ဒသမ ၅၆ သန်း ကိုလက်လွှတ်ပြီး လက်ဗလာဖြင့် အိမ်ပြန်ရရုံ အဆင့်သာဖြစ်သည်။

Reality Show သမိုင်းတွင် ဆုကြေးငွေ အများဆုံးပေးအပ်ခြင်းဖြစ်သည့်အတွက်  အကြီးကျယ်ဆုံး reality ပြိုင်ပွဲတစ်ခုဟုလည်း Netflix က ဇွန် ၁၄ ရက်တွင် ကြေညာထားသည်။ ပြိုင်ပွဲဝင်များသည် မူရင်းဇာတ်လမ်း တွဲကို အခြေခံထားသည့် ဂိမ်းကစားနည်းများအပြင် ဂိမ်းအသစ်အဆန်းများလည်း ယှဉ်ပြိုင်ရမည်ဖြစ်သည်။

ပြိုင်ပွဲဝင်များသည် အနည်းဆုံးအသက် ၂၁  နှစ်ရှိသူဖြစ်ကာ အင်္ဂလိပ်စကားပြောဆိုတတ်သူဖြစ်ရန်လိုအပ်ပြီး ၂၀၂၃ ခုနှစ် နှစ်ဆန်းပိုင်းတွင် ရိုက်ကူးမှုများပြုလုပ်ရန်  သီတင်းပတ်လေးပတ်အချိန်ပေးနိုင်သူဖြစ်ရမည်။

ပြိုင်ပွဲရိုက်ကူးမှုကို ဗြိတိန်တွင်ပြုလုပ်မည်ဖြစ်ကာ ပြိုင်ပွဲဝင်အရေအတွက်မှာလည်း ဇာတ်လမ်းတွဲအတိုင်းပင် ၄၅၆ ဦး သတ်မှတ်ထားသည်။

ကမ္ဘာကျော်ခဲ့သည့် Squid Game ရုပ်သံဇာတ်လမ်းတွဲကို Season 2 ရိုက်ကူးမည် ဟုလည်း Netflix က ယခုလအစောပိုင်းတွင် အတည်ပြုထားသည်။ဆုငွေကိုရီးယားဝမ် ၄၅ ဒသမ ၆ ဘီလျံကိုတပ်မက်ပြီး ရှုံးသည်နှင့် အသတ်ခံရမည်ကိုမသိဘဲ အလွန်ဆိုးရွားသည့်ဂိမ်းပွဲတစ်ခုကို ဝင်ပြိုင်ကြသူများအကြောင်း ရိုက်ကူးထားသည့် ၎င်းဇာတ်လမ်းတွဲ ကို မနှစ်ကစက်တင်ဘာတွင် Netflix မှပြသခဲ့ပြီး ထုတ်လွှင့်ပြီးနောက် ၂၈ ရက်အတွင်း  ကြည့်ရှုသူ ၁၁၁ သန်းအထိရှိခဲ့ကာ Netflix ၏ လူကြိုက်အများဆုံးဇာတ်လမ်းတွဲဖြစ်ခဲ့သည်။ သို့သော် ရက်စက်ကြမ်းကြုတ်သည့် သွေးထွက်သံယိုပြကွက်များပါသည့်အတွက် အသက် ၁၅ နှစ်အောက်ကလေးများ မကြည့်သင့်သည့် ဇာတ်လမ်းလည်းဖြစ်သည်။