Top News

တေးသံရှင် ဖြူဖြူကျော်သိန်း၊ ချစ်သုဝေ၊ နီနီခင်ဇော်နှင့် ဖြိုးပြည့်စုံတို့ ပါဝင်တင်ဆက်မည့် မန္တလာဂီတညဖျော်ဖြေပွဲကို နိုဝင်ဘာ ၉ ရက်တွင် မန္တလေးမြို့အမျိုးသားကဇာတ်ရုံ၌ ပြုလုပ်ရန် စီစဉ်ထားသည်ဟု သိရသည်။ အဆိုပါ ဂီတဖျော်ဖြေပွဲကို မန္တလာဆေးရုံကြီး၏ ငွေရတု အထိမ်းအမှတ်အဖြစ် တင်ဆက်မည်ဖြစ်ကာ ဆရာဝန်အနုပညာရှင်များက ပါဝင်တင်ဆက်ရန် စီစဉ်ထားခြင်း ဖြစ်သည်။

“ မန္တလာဆေးရုံရဲ့ ၂၅ နှစ်ပြည့်ငွေရတု အစီအစဉ်ကို တင်ဆက်ပါမယ်။ ဆရာဝန် အဆိုတော်တွေရဲ့ ဖျော်ဖြေရေး အစီအစဉ်တွေနဲ့ တင်ဆက်သွားမှာ ဖြစ်ပါတယ်။ အားပေးကြတဲ့ ပရိသတ်တွေကိုလည်း ကျေးဇူးတင်ပါတယ်။ တခဲနက် လက်မှတ်အားပေးခဲ့တာကြောင့်ပါ။ ပါဝင်တဲ့ အနုပညာရှင်တွေက ဖျော်ဖြေပွဲအတွက်ကို ပြင်ဆင်နေကြပါပြီ။ အခမ်းအနားမှူးအဖြစ် မတင်မိုးလွင်က တင်ဆက်ပါမယ်။ လာရောက်ပါဝင်ကြဖို့လည်း ဖိတ်ခေါ်ပါတယ်” ဟု ဖျော်ဖြေပွဲအား စီစဉ်သည့် တာဝန်ရှိသူတစ်ဦးက ဆိုသည်။

ပါဝင်တင်ဆက်မည့် တေးသံရှင်ချစ်သုဝေကလည်း “ အခုကတော့ ပွင့်လင်းရာသီဖြစ်တော့ ပွဲတွေဆက်တိုက်တက် ဖြစ်တယ်။ အကျိုးရှိစေမယ့် ဆွေးနွေးပွဲလေးတွေဆိုလည်း တတ်နိုင်သလောက် ပါဝင်ပေးဖြစ်တယ်။ ရှိုး ဆိုတာကိုလည်း လက်ခံထားတာလေးတွေ ရှိတယ်။ ပရိသတ်တွေနဲ့အတူm ဆုံချင်ပါတယ်။ သီချင်းတွေလည်း အများကြီးဆိုပြချင်တယ်။ Music Video အသစ်လေးတွေလည်း တင်ပေးထားတာတွေ ရှိပါတယ်” ဟု ပြောကြားသည်။

မန္တလာဂီတညဖျော်ဖြေပွဲတွင် ပါဝင်သည့် တေးသံရှင်များက ထင်ရှားခဲ့သည့် တေးသီချင်းများစွာအား ပရိသတ်များနှင့် အပေးအယူမျှမျှ တင်ဆက်နိုင်ရန် ပြင်ဆင်လျက်ရှိကြောင်း သိရသည်။ ဖျော်ဖြေပွဲအတွက် သီချင်းတိုက်ပြင်ဆင်မှုများလည်း ပြုလုပ်လျက်ရှိကာ ဖျော်ဖြေပွဲကို ည ရနာရီအချိန်တွင် စတင်မည်ဖြစ်ကြောင်း သိရသည်။ မန္တလာဂီတညဖျော်ဖြေပွဲတွင် ဖျော်ဖြေရေးအစီအစဉ်များအပြင် အခြားထူးခြားသော အစီအစဉ်များလည်း ထည့်သွင်းပြုလုပ်သွားမည် ဖြစ်ကာ ဖျော်ဖြေပွဲသို့ လာရောက်အားပေးရန်အတွက် ဖိတ်ခေါ်ထားသည်။