Top News

သာသ​န​ာ​ရေးနှင့် ယဉ်​ကျေးမှုဝန်ကြီးဌာန  အနုပညာဦးစီးဌာန၏ ဗိုလ်ချုပ်​အောင်ဆန်းအတ္ထုပ္ပတ္တိရုပ်ရှင် ရိုက်ကူးထုတ်လုပ်​ရေး ​ကော်မတီ၏ ၁၄ ကြိမ်​မြောက် လုပ်ငန်း​ကော်မတီ ညှိနှိုင်း​ဆွေး​နွေးပွဲကို ​မေ ၁၆ ရက်က ရန်ကုန်မြို့ အမျိုးသားပြတိုက်၌ ပြုလုပ်ခဲ့သည်ဟု သိရသည်။

အဆိုပါအစည်းအ​ဝေးသို့ ဗိုလ်ချုပ်အောင်ဆန်းအတ္ထုပ္ပတ္တိရုပ်ရှင် ရိုက်ကူးထုတ်လုပ်​ရေး​ကော်မတီ၏ ဥက္ကဋ္ဌဖြစ်သူ သာသ​နာ​ရေးနှင့် ယဉ်​ကျေးမှုဝန်ကြီးဌာန ပြည်​ထောင်စုဝန်ကြီး ဦးကိုကို၊ ဒုတိယဥက္ကဋ္ဌများဖြစ်သည့် ဒုတိယဝန်ကြီး ဦးထွန်းအုံ၊ အလင်္ကာ​ကျော်စွာ ထပ်ဆင့်အကယ်ဒမီ ပန်းချီစိုးမိုး၊ လုပ်ငန်း​ကော်မတီ၊ အမြဲတမ်းအတွင်းဝန်များ၊ ညွှန်ကြား​ရေးမှူးချုပ်များ၊ ဒုတိယညွှန်ကြား​ရေးမှူးချုပ်များ၊ မြန်မာသမိုင်းပညာရှင်များ၊ ရုပ်ရှင်ဆိုင်ရာ အသိပညာရှင်များ၊ အတတ်ပညာရှင်များနှင့် တာဝန်ရှိသူများ တက်​ရောက်ခဲ့ကြသည်ဟု သိရသည်။

ယင်းအစည်းအ​ဝေးတွင် ပြည်​ထောင်စုဝန်ကြီး ဦးကိုကိုက အမှာစကား​ပြောကြားခဲ့ပြီး ဒုတိယဝန်ကြီး ဦးထွန်းအုံနှင့် အလင်္ကာ​ကျော်စွာ ထပ်ဆင့်အကယ်ဒမီ ပန်းချီစိုးမိုးတို့က ဆက်လက်​ဆောင်ရွက်မည့် လုပ်ငန်းများကို အ​သေးစိတ်တင်ပြခဲ့ကြသည်ဟု သိရသည်။ ထို့ပြင် Red Radience ကုမ္ပဏီမှ ဦးမျိုးမင်း၊ ရန်ကုန်ပို့စ်ကုမ္ပဏီလီမီတက်မှ ဦးရဲဝင်း၊ အကယ်ဒမီ ဓိရာမိုရ်နှင့် သမိုင်းပညာရှင်များက ရုပ်ရှင်ဇာတ်ကားပြီးစီး​အောင်မြင်​ရေးဆိုင်ရာ ကဏ္ဍအလိုက် အသီးသီး​ဆွေး​နွေးတင်ပြခဲ့ကြသည်ဟု သိရသည်။

“ဒီတစ်​ခေါက် အစည်းအ​ဝေးက​တော့ ဗိုလ်ချုပ်​အောင်ဆန်းအတ္ထုပ္ပတ္တိရုပ်ရှင်ဖြစ်တဲ့ ​အောင်ဆန်းရုပ်ရှင်ဇာတ်ကားနဲ့ ပတ်သက်ပြီး လက်ရှိအ​ခြေအ​နေကို ​ဆွေး​နွေးပြီး ပြီးစီး​အောင်လုပ်ဖို့ကိစ္စပါပဲ။ ရိုက်ကူး​ရေးလုပ်ငန်း​တွေက​တော့ ကိုလူမင်းက အားလုံးရိုက်ပြီးသွားပြီ။ ကျန်တဲ့ တည်းဖြတ်မှု၊ ကွန်ပျူတာအထူးပြုလုပ်ချက်​တွေစတဲ့ ဆက်လက်လုပ်​ဆောင်မှုအပိုင်းကို လက်ရှိအနေအထားက ဘယ်အထိပြီးပြီလဲ။ ပြီးစီး​အောင် ဘယ်လိုဆက်လုပ်ကြမလဲဆိုတာကို ​ဆွေ​းနွေးတာပါ။ ​အောင်ဆန်းရုပ်ရှင် အဖွဲ့သား​တွေက​တော့ အရင်လူ​တွေပါပဲ။ ပြည်သူ​တွေ​မျှော်လင့်​နေတဲ့ ဒီဇာတ်ကားကို အမြန်ဆုံးပြီးစီးပြီး ပြည်သူ​တွေဆီ​ရောက်ဖို့ပါပဲ။ အခုက​တော့ ဒီကိစ္စကို ​ဆွေး​နွေးတိုင်ပင်တာပဲ ရှိပါ​သေးတယ်” ဟု ဗိုလ်ချုပ်အောင်ဆန်းအတ္ထုပတ္တိရုပ်ရှင် ရိုက်ကူးထုတ်လုပ်ရေးကော်မတီ၏ ၁၄ ကြိမ်မြောက် လုပ်ငန်းကော်မတီညှိနှိုင်း ဆွေးနွေးပွဲသို့တက်​ရောက်ခဲ့သူ အဖွဲ့သားတစ်ဦးက ဆိုသည်။

အောင်ဆန်းရုပ်ရှင်၏ ရိုက်ကူးထုတ်လုပ်ရေးလုပ်ငန်းကော်မတီကို ၂၀၁၇ ခုနှစ် နိုဝင်ဘာ ၂၄ ရက်တွင် စတင်ဖွဲ့စည်းတည်ထောင်ခဲ့ပြီး ဆပ်ကော်မတီ ခုနစ်ခုဖြင့် ၂၀၁၇ ခုနှစ် ဒီဇင်ဘာ ၈ ရက်မှာ ထပ်မံဖွဲ့စည်းခဲ့ သည်။

ထို့​နောက် ​အောင်ဆန်းရုပ်ရှင် စတင်ရိုက်ကူးရေး မိတ်ဆက်ပွဲအခမ်းအနားကို ၂၀၁၉ ခုနှစ် စက်တင်ဘာ ၂၄ ရက်တွင် ရန်ကုန်မြို့ နိုဗိုတယ်ဟိုတယ်၌ ကျင်းပခဲ့ပြီး စက်တင်ဘာ ၃၀ ရက်မှစတင်ကာ ရိုက်ကူးရေးလုပ်ငန်းများကို ဆက်တိုက်ပြုလုပ်ခဲ့ခြင်းဖြစ်သည်။ ရိုက်ကူးရက်ပေါင်း ၈၈ ရက် ရိုက်ကူးခဲ့ပြီး ရုပ်ရှင်တစ်ကားလုံး၏ ၈၀ ရာခိုင်နှုန်းခန့် ပြီးစီးနေပြီဖြစ်သည့် အ​ခြေအ​နေတွင် ကိုရိုနာဗိုင်းရပ်စ် COVID-19 ကမ္ဘာ့ကပ်ရောဂါ အခြေအနေများကြောင့် ၂၀၂၀ ပြည့်နှစ် မတ်လကုန်ပိုင်းမှစတင်ပြီး အောင်ဆန်းရုပ်ရှင် ရိုက်ကူးရေးလုပ်ငန်းများကို ခေတ္တဆိုင်းငံ့ခဲ့သည်ဟု သိရသည်။ ရိုက်ကူးမှုများဆိုင်းငံထားချိန်တွင် ဇာတ်ကားအတွက် Editing လုပ်ငန်းများ၊ ကွန်ပျူတာ အထူးပြုလုပ်ချက် (VFX) များကို ဆက်လက်ဆောင်ရွက်ခဲ့သည်ဟု သိရသည်။

ထို့​နောက် ၂၀၂၀ ပြည့်နှစ် ဇူလိုင် ၂၇ ရက်​တွင် ကိုဗစ်ကာလအတွင်း ခေတ္တရပ်နားထားသော ရုပ်ရှင်၊ ဗီဒီယို ရိုက်ကူးရေးလုပ်ငန်းများကို (၂၇.၇.၂၀၂၀) ရက်တွင် သက်ဆိုင်ရာ ဝန်ကြီးဌာနများမှ ပြန်လည်ရိုက်ကူး ခွင့်ပြုထားပြီးဖြစ်သည့်အတွက်ကြောင့် ရပ်နားထားသော “အောင်ဆန်း” ရုပ်ရှင်ရိုက်ကူးရေးလုပ်ငန်းများကို ကျန်းမာရေးနှင့် အားကစားဝန်ကြီးဌာနမှ ချမှတ်ထားသော စည်းကမ်းချက်များနှင့်အညီ  ပြန်လည်ရိုက်ကူးမှုများ လုပ်​ဆောင်ခဲ့သည်။  ၂၀၂၀ ပြည့်နှစ် သြဂုတ် ၅ ရက် ရွှေတိဂုံစေတီတော်ရင်ပြင်တွင် ဇာတ်ဝင်ခန်းအချို့ကို စတင်ရိုက်ကူးခဲ့ရာ ပရိသတ်များနှင့် လူစုလူဝေး မဖြစ်ပေါ်စေရန်အတွက် ရွှေတိဂုံစေတီတော်ပိတ်ရက်အတွင်း ရိုက်ကူးခွင့်ရနိုင်ပါရန် သက်ဆိုင်ရာအဖွဲ့အစည်းအဆင့်ဆင့် ညှိနှိုင်းခွင့်ပြုချက်ရယူပြီး ကိုဗစ်ကာလအတွင်း ရပ်နားထားသည့် ရိုက်ကူး​ရေးလုပ်ငန်းများကို ပြန်လည်စတင်ခဲ့သည်ဟု သိရသည်။

ထို့​နောက် ၂၀၂၀ ပြည့်နှစ် ဒီဇင်ဘာ ၂၃ ရက်တွင် ရိုက်ကူးပြီးစီးခဲ့ပြီဖြစ်​ကြောင်း ဒါရိုက်တာလူမင်းက သူ၏လူမှုကွန်ရက်စာမျက်နှာ​တွင်​ ရေးသားခဲ့သည်။