Top News

ဆူဒန်နိုင်ငံ၏ ရင်ခွဲရုံအများအပြားတွင် စုပုံထားသော အမည်မဖော်နိုင်သည့်အလောင်း ၁၅၀၀ ကျော်သည် ရောဂါကူးစက်မှုများ ဖြစ်ပွားနိုင်သည်ဟု ကျန်းမာရေးဆိုင်ရာ တာဝန်ရှိသူများက စက်တင်ဘာ ၂၆ ရက်က သတိပေးထုတ်ပြန်ထားကာ အစိုးရက၎င်းတို့၏ သေဆုံးရခြင်းအကြောင်းအရင်းများကို ဖုံးကွယ်ထားသည်ဟု စွပ်စွဲချက်များနှင့်ရင်ဆိုင်နေရသည်။

ယင်းအလောင်းများထဲတွင် အစိုးရတပ်များ၏ ဆန္ဒပြမှုများကို ဖြိုခွင်းမှုအတွက်သတ်ဖြတ်ခံထားရသည့် ဒီမိုကရေစီလိုလားသော ဆန္ဒပြသူများ၏အလောင်းများလည်းပါဝင်နိုင်သည်ဟု ယူဆထားကြောင်း တက်ကြွလှုပ်ရှားသူများက ပြောကြားခဲ့သည်။

ရင်ခွဲရုံများမှ တစ်ခုနှင့် စျေးတစ်ခုတို့ ကပ်လျက်တည်ရှိနေသောကြောင့် အလောင်းများသည် ဒေသခံများအကြား ပလိပ်ရောဂါ ကူးစက်ပျံ့နှံ့နိုင်ခြေရှိသောကြာင့် စိုးရိမ်လျက်ရှိကြောင်း မှုခင်းဆေးပညာနှင့်အဆိပ်ဗေဒ အတိုင်ပင်ခံပုဂ္ဂိုလ် မာဂျော့ဘ်ဘာဘာကာက ပြောကြားခဲ့သည်။

စက်တင်ဘာ ၂၆ ရက်တွင် ပြုလုပ်သည့် သတင်းစာရှင်းလင်းပွဲ၌မာဂျော့ဘ်နှင့်အခြား တာဝန်ရှိသူသုံးဦးက လွတ်လပ်သောအလောင်းခွဲစိတ်စစ်ဆေးမှုများ လုပ်ဆောင်ရန် လိုအပ်ခြင်းမရှိကြောင်း ငြင်းဆိုခဲ့သည်။

ယင်းကဲ့သို့ လုပ်ဆောင်မည့်အစား အများပြည်သူဘေးကင်းလုံခြုံရေးအကြောင်းပြချက်များအတွက် အလောင်းများကို စုပြုံမြှုပ်နှံသင့်ကြောင်း ပြောကြားခဲ့သည်။

၎င်းတို့သည် သေဆုံးသူများ၏ကျန်ရစ်သူမိသားစုများနှင့် ဆွေးနွေးရန်အတွက် မည်သည့်အလောင်းခွဲစိတ်စစ်ဆေးမှုများကိုမဆို ရွှေ့ဆိုင်းရန် ထုတ်ပြန်ကြေညာခဲ့သည်။

ယခုလအစောပိုင်းက အေးခဲသည့် အခန်းရှိပုံမရသည့် အဆောက်အအုံတစ်ခုအတွင်း အလောင်းများနှင့် ခြေလက်အင်္ဂါများစု ပုံထားသည်ကို ပြသထားသည့် ဗီဒီယိုအသစ်တစ်ခု ထွက်ရှိလာခြင်းနှင့် အတူအလောင်းခွဲစိတ်စစ်ဆေးရန် စောင့်ဆိုင်းနေရသော အလုပ်ကြွေးတင်နေသည့်အစီရင်ခံစာများ မေလတွင် ပထမဆုံးအကြိမ် ထွက်ပေါ်လာခဲ့သည်။

ထို့နောက် နိုင်ငံ၏ထိပ်တန်းပြည်သူ့ရှေ့နေက အလောင်းခွဲစိတ်စစ်ဆေးခြင်းမရှိဘဲ အလောင်းများကို မြေမြှုပ်ရန် လွန်ခဲ့သည့်လက ထုတ်ပြန်ကြေညာခဲ့သည်။

ဆူဒန်သည် လွန်ခဲ့သည့်နှစ်က စစ်တပ်အာဏာသိမ်းမှု ဖြစ်ပွားခဲ့ပြီးနောက် စစ်တပ်ဆန့်ကျင်သည့် ဆန္ဒပြမှုများကို ဖြိုခွင်းမှုနှင့် ရင်ဆိုင်နေရချိန်တွင် ယင်းကဲ့သို့ ကြုံတွေ့လာခဲ့ခြင်းဖြစ်သည်။

အောက်တိုဘာလက စစ်တပ်အကြီးအကဲ အက်ဘ်ဒယ်ဖာတာဘာဟန်သည် အစိုးရကို ဖြုတ်ချခဲ့ပြီး ရာနှင့်ချီသည့် တာဝန်ရှိသူများနှင့် တက်ကြွလှုပ်ရှားသူများကို ဖမ်းဆီးခဲ့ပြီးနောက် ဆူဒန်၏ ကာလတိုတောင်းသော ဒီမိုကရေစီ အကူးအပြောင်းသည် အဆုံးသတ်သွားခဲ့သည်။

ပျောက်ဆုံးနေသော ဆန္ဒပြသူများ၏မိသားစုဝင်များနှင့် ဒီမိုကရေစီလိုလားသောအဖွဲ့များက သင့်လျော်သော အလောင်းခွဲစိတ်စစ်ဆေးမှုလုပ်ဆောင်ရန် ပျက်ကွက်ခြင်းသည် ဆူဒန်စစ်တပ်က ရာနှင့်ချီသောဒီမိုကရေစီလိုလားသည့် ဆန္ဒပြသူများကို သတ်ဖြတ်ခဲ့သည့် သက်သေအထောက်အထားများကို ဖုံးကွယ်ရန် ကြိုးပမ်းခြင်းဖြစ်သည်ဟု ပြောကြားခဲ့သည်။

၂၀၁၉ခုနှစ်ဇွန်လက အင်အားကြီးမားသော လက်နက်ကိုင်အရံစစ်တပ်တပ်ဖွဲ့က ခါတွန်မြို့ရှိ ထိုင်သပိတ်ပြုလုပ်နေသည့်အဖွဲ့ကို ဆန္ဒဖြင့်ပစ်ခတ်မှုကြောင့် လူ ၁၀၀ ကျော် သေဆုံးခဲ့သည်။