မြန်မာအမျိုးသမီး ဘောလုံးကစားသမားများမှာ ဂျပန်အမျိုးသမီးကလပ်များတွင် ကစားခွင့်ရမည့် အခွင့်အရေးရှိလာပြီး ဂျပန်ဘောလုံးအဖွဲ့ချုပ် (JFA) သည် လာမည့်နှစ် တွင်စတင်မည့် ဂျပန်အမျိုးသမီးလိဂ်အတွက် အာဆီယံဒေသတွင်းမှ ကစားသမားများကို ကမ်းလှမ်းခဲ့ကြောင်း သိရသည်။
JFA သည် ဂျပန်အမျိုးသမီးလိဂ်ပြိုင်ပွဲ ဖြစ်သည့် WE League (Women's Empowerment) ကို ၂၀၂၁ ခုနှစ် စက်တင်ဘာတွင် စတင်ကျင်းပရန် စီစဉ်ထားပြီး မြန်မာနိုင်ငံ အပါအဝင် အာဆီယံဒေသတွင်းမှ အမျိုးသမီး ဘောလုံးသမားများ လာရောက်ကစားရန် အာဆီယံဘောလုံးအဖွဲ့ချုပ် (AFF) မှတစ်ဆင့် ကမ်းလှမ်းခဲ့ခြင်းဖြစ်သည်။ AFF သည် ဂျပန်ဘောလုံးအဖွဲ့ချုပ်၏ ကမ်းလှမ်းမှုအပေါ် ဒီဇင်ဘာ ၇ ရက်ကပြုလုပ်သည့် ပြိုင်ပွဲကျင်းပရေးကော်မတီအစည်းအဝေးတွင် ထည့်သွင်းဆွေးနွေးခဲ့ပြီး ခြေစွမ်းကောင်းမွန်သည့် ကစားသမားများကို စေလွှတ်ရန် သဘောတူညီမှုရရှိခဲ့သည်။
" ပြီးခဲ့တဲ့အစည်းအဝေးမှာ ဂျပန်ဘောလုံးအဖွဲ့ချုပ်ရဲ့ ကမ်းလှမ်းမှုကို ကျွန်တော်တို့ဘက်က ပြန်ပြီးဆွေးနွေးခဲ့ပါတယ်။ အာဆီယံဒေသတွင်းအသင်းတွေက ကစားသမားတွေကို လာကစားဖို့ ဖိတ်ကြားခဲ့တာဖြစ်ပါတယ်။ ကျွန်တော်တို့က ဆွေးနွေး ပြီးတဲ့အချိန်မှာ သူတို့အနေနဲ့ လိဂ်ပြိုင်ပွဲကျင်းပမယ့်ပုံစံ အသေးစိတ်အချက်အလက်တွေကို ပြန်တောင်းထားပါတယ်။ သူတို့ရဲ့ အကြောင်းပြန်မှုကိုကြည့်ပြီးမှ ကစားသမားတွေ သွားရောက်ကစားခွင့်ရဖို့ ဆက်လက် လုပ်ဆောင်သွားမှာဖြစ်ပါတယ်" ဟု AFF ပြိုင်ပွဲကျင်းပရေးကော်မတီ အစည်းအဝေးတွင် ပါဝင်ဆွေးနွေးခဲ့သည့် MFF အထွေထွေအတွင်းရေးမှူး ဦးကိုကိုသိန်းက ပြောကြားခဲ့သည်။
မြန်မာအမျိုးသမီးဘောလုံးသမားများအနေဖြင့် ပြည်ပကလပ်အသင်းများတွင် သွားရောက်ကစားနိုင်ခြင်းမရှိသေးဘဲ ဂျပန် အမျိုးသမီးလိဂ်တွင် ပါဝင်ကစားခွင့်ရပါက ခြေစွမ်းပိုင်းအပြင် လစာနှင့်အခြားခံစားခွင့်များပါ တိုးမြှင့်ရရှိလာမည်ဖြစ်သည်။ JFA သည် WE League ပြိုင်ပွဲကို ဂျပန်အမျိုးသမီး ဘောလုံးလောကအတွက် အဆင့်အတန်း အမြင့်ဆုံး ပရော်ဖက်ရှင်နယ်လိဂ်ပြိုင်ပွဲအဖြစ် ကျင်းပသွားမည်ဖြစ်ပြီး လက်ရှိကျင်းပနေသည့် ဂျပန်အမျိုးသမီးလိဂ် (Nadeshiko League) ထက် အဆင့်မြင့်သည့်ပြိုင်ပွဲဖြစ်လာမည်ဖြစ်ကြောင်း သိရသည်။ JFA သည် ယင်းပြိုင်ပွဲကို ပြိုင်ပွဲဝင် ခြောက်သင်းမှ ၁၀ သင်းအထိ ကျင်းပရန် စီစဉ်ထားပြီး မြန်မာကစားသမားများအနေဖြင့် ပြည်ပတွင် ပထမ ဆုံးကစားခွင့်ရမည့်အခွင့်အရေး ရရှိလာခြင်းဖြစ်သည်။
မြန်မာအမျိုးသမီးကစားသမားများအတွက် အမျိုးသမီးလိဂ်ပြိုင်ပွဲကို မြန်မာနိုင်ငံဘောလုံးအဖွဲ့ချုပ်က ၂၀၁၆ ခုနှစ်တွင် စတင်ကျင်းပခဲ့ပြီး သုံးရာသီကျင်းပထားကာ ပြိုင်ပွဲဝင်အသင်းရှစ်သင်း ပါဝင်ယှဉ်ပြိုင်လျက်ရှိကြောင်း သိရသည်။
-
သထုံမြို့နယ် မြေနီကုန်းကျေးရွာ ရန်ကုန်-မော်လမြိုင်ကားလမ်းနံဘေးရှိ Puma Power စက်သုံးဆီအရောင်းဆိုင်မှ မန်နေဂျာအမျိုးသမီးကို လက်နက်ကိုင်အဖွဲ့တစ်ဖွဲ့က ဖမ်းဆီးခေါ်ဆောင်သွား
-
မန်စီးတီးအသင်းအား (၅)မှတ်ဖြတ်နိုင်ခဲ့ပြီးနောက် ပရီးမီးယားလိဂ်ချန်ပီယံဆုကို မိမိတို့ မျှော်မှန်းနိုင်ပြီဟု လီဗာပူးလ်ကွင်းလယ်ကစားသမား အယ်လစ္စတာ ပြောကြား
-
ဆိုစီဒက်အသင်းမှ စပိန်ကွင်းလယ်ကစားသမား ဇူဘီမန်ဒီအား လာမည့်ဇန်နဝါရီအပြောင်းအရွှေ့တွင်ခေါ်ယူရန် မန်စီးတီးအသင်းစီစဉ်
-
ပရီးမီးယားလိဂ်ချန်ပီယံဆုကို လက်လွှတ်ရဖွယ်ရှိကြောင်း မန်စီးတီးနည်းပြ ဂွါဒီယိုလာ ဝန်ခံပြောကြား
-
ရီးယဲလ်အသင်း၏ ဒဏ်ရာစာရင်းတွင် သုံးဦးထပ်တိုးလာပြီး ဒူးအရွတ် ဒဏ်ရာကြောင့် ရာသီကုန်အထိ မီလီတို အနားယူရဖွယ်ရှိ
