ယခုသီတင်းပတ်အတွင်းတွင် စစ်တပ်အာဏာသိမ်းမှုဖြစ်ပွားခဲ့ပြီးနောက် ဂါဘွန်နိုင်ငံကို အဖွဲ့ဝင်အဖြစ်မှ ချက်ချင်းရပ်ဆိုင်းရန် မိမိတို့ဆုံးဖြတ်ခဲ့သည်ဟု သြဂုတ် ၃၁ ရက်တွင် အာဖရိကသမဂ္ဂ၏ ငြိမ်းချမ်းရေးနှင့် လုံခြုံရေးကောင်စီက ပြောကြားသည်။
“ ၂၀၂၃ ခုနှစ် သြဂုတ် ၃၀ မှာ သမ္မတ အလီဘွန်ဂိုကို ဖြုတ်ချခဲ့တဲ့ ကွန်ဂိုသမ္မတနိုင်ငံက စစ်တပ်အာဏာသိမ်းမှုကို မိမိတို့ ပြင်းထန်စွာရှုတ်ချပါတယ်”ဟု အာဖရိကသမဂ္ဂ၏ ငြိမ်းချမ်းရေးနှင့် လုံခြုံရေးကောင်စီက လူမှုမီဒီယာ X တွင် ဖော်ပြခဲ့သည်။
အာဖရိကသမဂ္ဂ၏လုပ်ငန်းကိစ္စရပ် အားလုံးတွင် ဂါဘွန်ပါဝင်ဆောင်ရွက်မှုကို ချက်ချင်းဆိုင်းင့ံရန် ဆုံးဖြတ်လိုက်သည်ဟု ဖော်ပြထားသည်။ ဂါဘွန်တွင် ဖဲဲွ့စည်းပုံအခြေခံဥပဒေဆိုင်ရာအမိန့်အာဏာ ပြန်လည် ဖော်ဆောင်ချိန်အထိ ဂါဘွန်အဖွဲ့အစည်းအားလုံးကို ဆိုုင်းငံ့ထားမည်ဟု ဆိုသည်။
ဂါဘွန်၌ စစ်တပ်အာဏာသိမ်းပြီး နောက်တစ်ရက်အကြာတွင် အာဖရိကသမဂ္ဂ၏ ဆုံးဖြတ်ချက် ထွက်လာခြင်းဖြစ်သည်။
ရှေ့ဆက်ရန် အကောင်းဆုံးနည်းလမ်း ရှာဖွေရေးအတွက် စစ်အစိုးရနှင့် လက်တွဲလုပ်ဆောင်ချင်သည်ဟု ဂါဘွန်အတိုက်အခံက ပြောကြားလိုက်စဉ် သမ္မတအလီဘွန်ကိုဂိုဖြုတ်ချပြီး ဗိုလ်ချုပ်ကြီးတစ်ဦးကို နိုင်ငံ တော်အကြီးအကဲအဖြစ်ခန့်အပ်ခဲ့သော ဂါဘွန်အရာရှိများကို အရေးယူရန် အာဖရိက ခေါင်းဆောင်များက သြဂုတ် ၃၁ ရက်တွင် ဆောင်ရွက်ခဲ့ခြင်းဖြစ်သည်။
အာဏာလွှဲယူမှုက ဘွန်ဂိုမိသားစု၏ နှစ်ခြောက်ဆယ်နီးပါးကြာ အာဏာကိုင်စွဲမှုကို အဆုံးသတ်သွားစေခဲ့ပြီး ၂၀၂၀ ခုနှစ် နောက်ပိုင်း အာဏာသိမ်းမှုရှစ်ကြိမ်ဖြစ်ပွားခဲ့သော အာဖရိအတွက် ပဟေဠိသစ်ကိုပေါ် ပေါက်စေသည်။ နိုင်ဂျီးယားသမ္မတဘိုလာ တီနူဘူးက အဆိုပါ အာဏာသိမ်းမှုများကို သက်ဦးစံပိုင်စနစ် ကူးစက်ခြင်းဟု ပြောကြားသည်။
အလယ်အာဖရိက နိုင်ငံရေးအဖွဲ့ဖြစ်သည့် အလယ်အာဖရိကနိုင်ငံများ၏စီးပွား ရေးအသိုင်းအဝိုင်းအဖွဲ့(ECCAS)က ဂါဘွန်အာဏာသိမ်းမှုကို ထုတ်ပြန်ချက်တွင် ပြစ်တင်ရှုတ်ချထားပြီး တုံ့ပြန်ရေးအတွက် နိုင်ငံတော်အကြီးအကဲများပါဝင်သည့် အစည်းအဝေးကို ကျင်းပရန် စီစဉ်ထားသည်ဟု ပြောကြားသည်။ အစည်းအဝေးကျင်းပမည့် ရက်စွဲကို ဖော်ပြထားခြင်းမရှိပေ။
အာဖရိကသမဂ္ဂ၏ ငြိမ်းချမ်းရေးနှင့် လုံခြုံရေးကောင်စီသည် အာဏာသိမ်းမှုအကြောင်း ဆွေးနွေးရန် သြဂုတ် ၃၁ ရက်တွင် တွေ့ဆုံမည်ဟု အာဖရိကသမဂ္ဂ ကော်မရှင်ဥက္ကဋ္ဌအတွက်ပြောရေးဆိုခွင့်ရှိက ပြောကြားခဲ့ပြီး ဂါဘွန်ကိုု ဆိုင်းငံ့သည့် ဆုံးဖြတ်ချက်ထွက်လာခြင်းဖြစ်သည်။
တု့ံပြန်ရေးအစီအစဉ်တစ်ရပ်ကို ရေးဆွဲရန် အခြားအာဖရိကခေါင်းဆောင်များနှင့်အတူ မိမိသည် အနီးကပ်လုပ်ဆောင်နေသည်ဟု နိုင်ဂျီးရီးယားသမ္မတတီနူဘူက ပြောကြားသည်။ တီနူဘူသည် မေလတွင် နိုင်ဂျီးရီးယား သမ္မတအဖြစ် ကျမ်းသစ္စာကျိန်ခဲ့သူဖြစ်ပြီး အနောက်အာဖရိကစီးပွားရေးအဖွဲ့အီကို ဝက်စ်၏ လက်ရှိ ဥက္ကဋ္ဌဖြစ်သည်။
သြ ဂုတ် ၂၃ ရက်ရွေးကောက်ပွဲအပြီးတွင် ဘွန်ဂိုက တတိယသက်တမ်းကို သက်တောင့် သက်သာအနိုင်ရသွားသည်ဟု ရွေးကောက်ပွဲကော်မရှင်ကကြေညာခဲ့ပြီးနောက် မကြာမီ တွင်ဂါဘွန်ထိပ်တန်းအရာရှိများက အာဏာသိမ်းသည်ဟု သြဂုတ် ၂၇ ရက် အရုဏ်မတက်မီ အချိန်တွင် ကြေညာခဲ့သည်။
သြဂုတ် ၂၇ ရက်ညပိုင်းတွင် နေအိမ်၌ ထိန်းသိမ်းခံထားရသည့် ဘွန်ဂို၏ ဗီဒီယိုထွက်ပေါ်လာသည်။ အဆိုပါ ဗီဒီယိုတွင် ဘွန်ဂိုက အကူအညီပေးရန် နိုင်ငံတကာမဟာမိတ်များကို မေတ္တာရပ်ခံထားသည်ဆိုသော်လည်း ၎င်း၏ ပတ်ဝန်းကျင်၌ ဖြစ်ပျက်နေသည်များကို လုံးလုံး မသိသည့်ပုံစံပေါ်နေသည်။
အာဏာသိမ်းခေါင်းဆောင်များက နောက်ပိုင်းတွင်အိုလီဂွီအန်ဂွီမာကို အသွင်ကူးပြောင်းရေးဆိုင်ရာသမ္မတဟု ကြေညာကြောင်း နိုင်ငံပိုင်ရုပ်သံမှတစ်ဆင့်ထုတ်ပြန်ခဲ့သည်။
Ref: AFP
-
ရှမ်း/မြောက် နောင်ပိန်ကျေးရွာ စစ်ရှောင်စခန်း(၄)ခုတွင် အလှူရှင် မရှိ၍ ဆေးဝါးနဲ့ စားနပ်ရိက္ခာလိုအပ်သည့် အခြေအနေကြုံတွေ့နေရ
-
အာဆီယံ-ဒါကာ ကော်မတီ၏ အလှည့်ကျ ဥက္ကဋ္ဌ တာဝန်ကို ဗီယက်နမ်သံအမတ်ကြီးမှ ဆက်လက်တာဝန်ယူသွားမည်
-
နိုင်ငံပိုင်ဘဏ်များအပါအဝင် ပုဂ္ဂလိကဘဏ် ၁၅ ဘဏ်နှင့် ချေးငွေဆိုင်ရာ ပူးပေါင်းဆောင်ရွက်မှု သဘောတူစာချုပ်များ လက်မှတ်ရေးထိုးခဲ့
-
SEAGP-SEAOP ၏ ၂၀၂၄ ခုနှစ် ချစ်ကြည်ရေး ပိုက်ကျော်ခြင်း ပြိုင်ပွဲကျင်းပပြီးစီး
-
ACD ထိပ်သီးအစည်းအဝေးအတွင်း ဝန်ကြီးဦးသန်းဆွေမှ ကာဂျစ်နိုင်ငံ ဒု-ဝန်ကြီးချုပ်၊ နီပေါ နိုင်ငံခြားရေးဝန်ကြီးတို့နှင့်သီးခြားစီတွေ့ဆုံခဲ့