ဥရောပလေကြောင်းလိုင်းမှ ခရီးသည်တင် လေယာဉ်တစ်စီးအား ကြားဖြတ်ဟန့်တားပြီး လမ်းကြောင်းပြောင်းလဲခဲ့သည့် ဘီလာရုစ်နိုင်ငံအား နိုင်ငံတကာအသိုင်းအဝိုင်းက ပြင်းထန်စွာဝေဖန်နေသည့်ကြားမှ ရုရှားသမ္မတဗလာဒီမာပူနှင့် တွေ့ဆုံခဲ့သည့် ဘီလာရုစ်ခေါင်းဆောင် အလက်ဇန်းဒါး လူကာရှန်ကို၏အစိုးရအဖွဲ့ကို အမေရိကန်က အရေးယူပိတ်ဆို့မှုများ ပြုလုပ်ကြောင်း မေလ ၂၈ ရက်က ကြေညာခဲ့သည်။
မေလ ၂၃ ရက်က ဖြစ်ပွားခဲ့သည့် ယင်းဖြစ်စဉ်သည် နိုင်ငံတကာ စံနှုန်းများကို တိုက်ရိုက်ဆန့်ကျင်နေပြီး ယင်းဖြစ်စဉ်ကို ယုံကြည်စိတ်ချရလောက်သည့် နိုင်ငံတကာ စုံစမ်းစစ်ဆေးမှုပြုလုပ်ရန် အိမ်ဖြူတော် သတင်းပြန်ကြားရေးပုဂ္ဂိုလ် ယန်ဆာကီက ပြောကြားခဲ့သည်။
မေလ ၂၃ ရက်က ဘီလာရုစ်စစ်တပ်မှ တိုက်လေယာဉ်တစ်စီးသည် Ryaniar လေကြောင်းလိုင်းမှ ခရီးသည်တင် လေယာဉ်တစ်စီးကို ကြားဖြတ်ဟန့်တားပြီး လမ်းကြောင်းပြောင်းခဲ့ကာ ယင်းလေယာဉ်ပေါ်တွင် လိုက်ပါလာသည့် အသက် ၂၆ နှစ်အရွယ် အတိုက်အခံ ဂျာနယ်လစ်တစ်ဦးဖြစ်သူ ရိုမန်ပရိုတက် စီဗစ်ချ်ကို ဖမ်းဆီးခဲ့သဖြင့် ယင်းဖြစ်စဉ်ကို နိုင်ငံတကာ အသိုင်းအဝိုင်းက ဝေဖန်ရှုတ်ချခဲ့သည်။
အမေရိကန်အနေဖြင့် လူကာရှန်ကို၏ အစိုးရအဖွဲ့ထဲမှ ထိပ်သီးအဖွဲ့ဝင်များကို ပစ်မှတ်ထားပြီး ပိတ်ဆို့မှုများပြုလုပ်ရန် ဥရောပသမဂ္ဂနှင့် ပူးပေါင်းလုပ်ဆောင်ခဲ့သည်ဟု အိမ်ဖြူတော်က ကြေညာခဲ့သည်။
ထိုအချိန်အတောအတွင်း ဘီလာရုစ်နိုင်ငံပိုင် စီးပွားရေးလုပ်ငန်းများကို စီးပွားရေးပိတ်ဆို့မှုများပြုလုပ်ခဲ့ပြီး ယင်းပိတ်ဆို့မှုများသည် ဇွန်လ ၃ ရက်တွင် အကျုံးဝင်သက်ရောက်မည်ဖြစ်သည်။
ဘီလာရုစ်နိုင်ငံအပေါ် နောက်ထပ်လုပ်ဆောင်မည့် အမေရိကန်၏ လှုပ်ရှားမှုများသည် အကျင့်ပျက်ခြစားမှု၊ လူ့အခွင့်အရေးချိုးဖောက်မှုများနှင့် ဒီမိုကရေစီအား တိုက်ခိုက်မှုများကို ထောက်ခံသူများကို ပစ်မှတ်ထားသွားမည်ဟု ဆာကီက ပြောကြားခဲ့သည်။
ထို့ပြင် အိမ်ဖြူတော်သည် အမေရိကန်နိုင်ငံသားများအား ဘီလာရုစ်နိုင်ငံအား ခရီးသွားရောက်ခြင်းမပြုရန် သတိပေးချက်ထုတ်ပြန်ထားပြီး အမေရိကန်ခရီးသည်တင် လေယာဉ်များအနေဖြင့်လည်း ဘီလာရုစ်လေပိုင်နက်အပေါ်မှ ဖြတ်သန်းမည်ဆိုလျှင် အထူးသတိထားရန် သတိပေးခဲ့သည်။
ဥရောပသမဂ္ဂကလည်း အီးယူအခြေစိုက် လေကြောင်းလိုင်းများအနေဖြင့် ဘီလာရုစ်လေပိုင်နက်အတွင်းမှ ဖြတ်သန်းခြင်းမပြုရန် တိုက်တွန်းခဲ့သည်။
မည်သို့ပင်ဆိုစေ ရုရှားသမ္မတပူတင်ကမူ ဘီလာရုစ် ခေါင်းဆောင် လူကာရှန်ကိုအား ရုရှားနိုင်ငံ၏ ပင်လယ်နက် အပန်းဖြေစခန်းမြို့ဖြစ်သည့် ဆိုချီမြို့တွင် မေလ ၂၈ ရက်က ဧည့်ခံတွေ့ဆုံခဲ့ချိန်၌ ရုရှားနှင့် ဘီလာရုစ်ကြား ရင်းနှီးသည့် ဆက်ဆံရေးရှိမှုအပေါ် ချီးကျူးခဲ့သည်။ရုရှားအစိုးရအနေဖြင့် ဘီလာရုစ်အစိုးရအား မည်မျှအထိ ထောက်ခံပေးမည်ဆိုခြင်းအပေါ် ၎င်းတို့နှစ်ဦး၏ တွေ့ဆုံဆွေးနွေးမှုအား လေ့လာသူများက အနီးကပ် စောင့်ကြည့်ခဲ့သည်။
-
ရာဝမ်ဒါတွင် မားဘာ့ဂျ်ဗိုင်းရပ်စ်ကူးစက်မှုကို ထိန်းချုပ်နိုင်ပြီဖြစ်ကြောင်း အာဖရိကကျန်းမာရေးအကြီးအကဲ ပြောကြား
-
မီလ်တန်ဟာရီကိန်းမုန်တိုင်းအရှိန်ကြောင့် လေဆင်နှာမောင်းများဖြစ်ပေါ်ခဲ့သဖြင့် ဖလော်ရီဒါတွင် အနည်းဆုံး ၁၁ ဦး သေဆုံး
-
ရန်ကုန်မြို့ပတ်ရထားလမ်းပိုင်း အဆင့်မြှင့်တင်ခြင်းစီမံကိန်း၏ မြို့ပြလုပ်ငန်းများအားလုံး ပြီးစီးပြီဖြစ်ပြီး ဂျပန်နိုင်ငံ အိုဒီအေချေးငွေဖြင့်ဆောင်ရွက်မည့် အချက်ပြစနစ် တပ်ဆင်ခြင်းလုပ်ငန်းများအား ဆက်လက်ဆောင်ရွက်သွားမည်
-
တစ်နှစ်အတွင်း အစားအစာအုပ်စုကုန်စျေးနှုန်း နှစ်ရာခိုင်နှုန်းကျော်၊ အိမ်လခ နှစ်ရာခိုင်နှုန်းခန့်၊ ကျန်းမာရေးကုန်ကျစရိတ် ငါးရာခိုင်နှုန်းကျော်၊ ပညာရေးကုန်ကျစရိတ် တစ်ရာခိုင်နှုန်းကျော်မြင့်တက်
-
ဧရာဝတီတိုင်းဒေသကြီးအတွင်း မြစ်ကမ်းထိန်းလုပ်ငန်းများ ဆောင်ရွက်ထားမှုကြောင့် ကမ်းပြိုမှုများ လျော့နည်းလာပြီး ဗိုလ်မြတ်ထွန်းတံတားအနီး ဖြစ်ပေါ်နေသော သောင်ပြင်အား လာမည့်နှစ်တွင် ထိန်းသိမ်းမှုပြုလုပ်မည်