Top News

၂၀၂၁ ခုနှစ် မေလစတုတ္ထပတ်အတွင်း ကြည့်ရှုမှုအများဆုံး ထိုင်းဒရာမာဇာတ်လမ်းတွဲစာရင်းတွင် Phao Khon ဇာတ်လမ်းတွဲက ထိပ်ဆုံး၌ရပ်တည်နေကြောင်း Thai Update ဝက်ဘ်ဆိုက်တွင် ဖော်ပြထားမှုအရ သိရသည်။

ထိုင်းရုပ်သံလိုင်း Ch7 တွင် ထုတ်လွှင့်ပြသနေဆဲဖြစ်သော Phao Khon ဇာတ်လမ်းတွဲကို အပတ်စဉ် သောကြာ၊ စနေ၊ တနင်္ဂနွေနေ့တို့တွင် ထုတ်လွှင့်ပြသနေပြီး အပိုင်းစုစုပေါင်း ၁၆ ပိုင်း ပါဝင်မည်ဖြစ်သည်။

မေ ၁၄ ရက်တွင်စတင်၍ ပြသခဲ့သော ယင်းဇာတ်လမ်းတွဲ၏ အပိုင်း (၄)၊ (၅)၊ (၆) တို့ကို CH7 ၌ ထုတ်လွှင့်ပြသရာတွင် ပရိသတ်များ၏ ကြည့်ရှုမှုနှုန်းသည် ၅.၃ ရာ ခိုင်နှုန်း၊ ၄.၉ ရာခိုင်နှုန်း၊ ၄.၇ ရာခိုင်နှုန်း ရှိခဲ့သည်။

ကျွမ်းကျင်လိမ္မာသည့် ရဲတပ်ဖွဲ့ဝင်တစ်ဦးနှင့် သူခိုးတစ်ဦးတို့သည် မူးယစ်ဆေးနှင့် ဆက်နွှယ်သော လူဆိုးဂိုဏ်းတစ်ဂိုဏ်းအမှုတွင် ပါဝင်မိခဲ့ကြပြီး နှစ်ဦးစလုံးမှာ ငယ်ရွယ်သော အမျိုးသမီးသက်တော်စောင့် Alice ကို အပြိုင်စိတ်ဝင်စားနေကြသည်။ မိုက်မိုက်မဲမဲ နေထိုင်လေ့ရှိသော်လည်း အရာရာကျွမ်းကျင်သည့် သူခိုးနှင့် ရဲဝံ့ပြတ်သားသူ ရဲသားတစ်ဦးအကြား ဉာဏ်ရည်ကစားပွဲများ၊ လျှို့ဝှက်ချက်ကိုယ်စီ၊ လှည့်ကွက်ကိုယ်စီဖြင့် အချစ်ရေးတွင်သာမက အလုပ်တာဝန်တွင်ပါ သူ့ထက်ငါအပြိုင်ယှဉ်ပြိုင်ရင်း တွေ့ကြုံရင်ဆိုင်လာရသည့် အဖြစ်အပျက်များကို Phao Khon ဇာတ်လမ်းတွဲတွင် စိတ်ဝင်စားဖွယ် ရိုက်ကူးတင်ဆက်ထားခြင်းဖြစ်သည်။

ယင်းဇာတ်လမ်းတွဲထဲတွင် မင်းသား Kem Hussawee ၊Pakrapongpisan  ၊ Off Chanapol Sataya ၊ Cartoon Natcha တို့ ပါဝင်သရုပ်ဆောင်ထားသည်။

မေလ စတုတ္ထပတ်အတွင်း ကြည့်ရှုမှုအများဆုံး ထိုင်းဒရာမာဇာတ်လမ်းတွဲစာရင်းတွင် Tukta ဇာတ်လမ်းတွဲက ကြည့်ရှုမှုနှုန်း ၄.၃ ရာခိုင်နှုန်း၊ ၅.၁ ရာခိုင်နှုန်းဖြင့် နံပါတ် (၂) နေရာတွင် ရပ်တည်နေသည်။

Om Akapan နှင့် Sammy တို့ပါဝင် သရုပ်ဆောင်ထားသော Plerng Prissana ဇာတ်လမ်းတွဲမှာ ကြည့်ရှုမှုနှုန်း ၄.၂ ရာခိုင်နှုန်း၊ ၄.၃ ရာခိုင်နှုန်းဖြင့် နံပါတ် (၃) နေရာ၌ ရပ်တည်နေကာ သရုပ်ဆောင် Nadech Kugimiya နှင့် Bow Maylada တို့ပါဝင်ထားပြီး Thai TV3 ရုပ်သံလိုင်းတွင် ထုတ်လွှင့်နေဆဲဖြစ်သည့် Mon Ruk Nong Pak Ka Yaeng ဇာတ်လမ်းတွဲမှာ ကြည့်ရှုမှုနှုန်း ၃.၇၊ ၃.၈ နှင့် ၄.၀ ရာခိုင်နှုန်းဖြင့် နံပါတ် (၄) နေရာတွင် ရပ်တည်နေသည်။

သရုပ်ဆောင် Film Thanapat နှင့် Esther Supreeleta တို့ ပါဝင်ထားပြီး ONE 31 ရုပ်သံလိုင်းတွင် ထုတ်လွှင့်ပြသနေ သော Payu Sai ဇာတ်လမ်းတွဲသည် ကြည့်ရှုမှုနှုန်း ၂.၆ ရာခိုင်နှုန်း၊ ၂.၇ ရာခိုင်နှုန်းဖြင့် စာရင်း၏ နံပါတ် (၅) နေရာတွင် ရပ်တည်နေသည်။

မင်းသား James Ma နှင့် မင်းသမီး Kimmy Kimberley တို့ ပါဝင်သရုပ်ဆောင်ထားသော Song Sanaeha ဇာတ်လမ်းတွဲမှာ ကြည့်ရှုမှုနှုန်း ၂.၄ ရာခိုင်နှုန်း၊ ၂.၂ ရာခိုင်နှုန်းဖြင့် စာရင်း၏ နံပါတ် (၆) နေရာတွင် ရပ် တည်လျက်ရှိသည်။