Top News

tvN ရုပ်သံလိုင်းမှ ထုတ်လွှင့်တင်ဆက်သော လျှို့ဝှက်ဆန်းကြယ် တောင်ကိုရီးယား ဒရာမာဇာတ်လမ်းတွဲ Mine ကို Netflix တွင်လည်း ပြသနေပြီး ကြည့်ရှုအားပေးသူ အရေအတွက်များပြားနေကြောင်း သိရသည်။

အပိုင်း (၁၆) ပိုင်း ပါဝင်မည်ဖြစ်သော Mine ဇာတ်လမ်းတွဲကို မေ ၈ ရက်တွင် tvN ရုပ်သံလိုင်းမှတစ်ဆင့် ထုတ်လွှင့်ပြသခဲ့ခြင်းဖြစ်ကာ အပတ်စဉ် စနေ့နှင့်တနင်္ဂနွေနေ့များတွင် အပိုင်းတစ်ပိုင်းစီ ထုတ်လွှင့်တင်ဆက်လျက်ရှိသည်။

Mine ဇာတ်လမ်းတွဲ၏ အပိုင်း (၁) ကို ထုတ်လွှင့်ပြသချိန်၌ တောင်ကိုရီးယားနိုင်ငံတစ်ဝန်းတွင် ကြည့်ရှုမှု ၆.၅ ရာခိုင်နှုန်းရှိခဲ့ကာ အပိုင်း (၄) ကို ထုတ်လွှင့်ပြသချိန်၌ ကြည့်ရှုမှုနှုန်း ၇.၃ ရာခိုင်နှုန်း၊ အပိုင်း (၇) ကို ကြည့်ရှုမှုနှုန်း ၈.၆ ရာခိုင်နှုန်း၊ အပိုင်း (၈) ကို ထုတ်လွှင့်ပြသချိန်၌ ကြည့်ရှုမှုနှုန်း ၉.၀၂၃ ရာခိုင်နှုန်းအထိ တဖြည်ဖြည်းဖြည်း မြင့်တက်လာခဲ့ကြောင်း AGB Nielson ၏ ထုတ်ပြန်ချက်အရ သိရသည်။

ချမ်းသာသော လူ့အဖွဲ့အစည်း၏ အခြေအမြစ်မရှိသည့် အစွဲအလမ်း၊ အယူအဆများကို ကျော်လွှားချိုးနှိမ်နိုင်ရန်နှင့် မျက်နှာဖုံး နောက်ကွယ်မှ မိမိ၏စစ်မှန်သော ပုံစံကိုရှာဖွေနိုင်ရန် ကြိုးပမ်းနေကြသည့် အမျိုးသမီးနှစ်ဦး၏ အကြောင်းကို Mine ဇာတ်လမ်းတွဲတွင် စိတ်ဝင်စားဖွယ် ဇာတ်လမ်း၊ ဇာတ်လမ်းကွက်များဖြင့် ရိုက်ကူးပြသထားခြင်းဖြစ်သည်။

ရုပ်ရှင်သရုပ်ဆောင်ဟောင်းတစ်ဦးဖြစ်သူ Seo Hee Soo သည် ၎င်း၏အလုပ်အကိုင်ကို စွန့်လွှတ်၍ Hyo Won Group ကုမ္ပဏီပိုင်ရှင်၏ ဒုတိယမြောက်သားဖြစ်သူနှင့် လက်ထပ်ခဲ့သည်။ ကျိကျိတက်ချမ်းသာပြီး လူတန်းစားခွဲခြားမှု ပြင်းထန်သော သူဌေးသူကြွယ်မိသားစုအတွင်း ချွေးမဂုဏ်ပုဒ်နှင့်အညီ အကောင်းဆုံး ကြိုးစားနေထိုင်နေရသော Hee Soo တစ်ယောက် ၎င်း၏ပုံစံအစစ်အမှန်ကို ယုံကြည်ချက်ရှိရှိဖြင့် တစ်သက်လုံး ဖုံးကွယ်ထားနိုင်မည်လား။

တစ်ဖက်တွင် ချမ်းသာသောမိသားစုမှ သမီးဖြစ်သူ Jung Seo Hyun သည် Hyo Won Group ပိုင်ရှင်၏ အကြီးဆုံးသားနှင့် လက်ထပ်ခဲ့သည်။ ကြော့ကြော့ရှင်းရှင်း နေထိုင်သော၊ စဉ်းစားဆင်ခြင် ဉာဏ်ကောင်းပြီး အရာရာကို အလွန်ချင့်ချိန်တွက်ဆနိုင်သော Seo Hyun သည်လည်း ၎င်း၏လျှိုဝှက်ချက်များကို ဖုံးကွယ်ထားနိုင်မည်လား။ ဆင်းရဲ၊ ချမ်းသာ ခွဲခြားမှုမြင့်မားသော မိသားစုအတွင်း ၎င်းတို့ရင်ဆိုင်ရမည့် အဖြစ်အပျက်များနှင့် အိမ်ထောင်ရေး အရှုပ်အထွေးများကို Mine ဇာတ်လမ်းတွဲတွင် စိတ်ဝင်စားဖွယ် ကြည့်ရှုခံစားရမည်ဖြစ်သည်။

ဒါရိုက်တာ Lee Na - Jeong ရိုက်ကူးထားသော Mine ဇာတ်လမ်းတွဲတွင် မင်းသမီး Lee Bo Young က Seo Hee Soo ဇာတ်ကောင်နေရာတွင် လည်းကောင်း၊ Jung Seo Hyun ဇာတ်ကောင်နေရာတွင် မင်းသမီး Kim Seo - Hyung ကလည်းကောင်း ပါဝင်သရုပ်ဆောင်ထားသည်။

လတ်တလောတွင် tvN ရုပ်သံလိုင်း၌ Mine ဇာတ်လမ်းတွဲကို အပိုင်း (၈) အထိ ထုတ်လွှင့်ပြသထားပြီးဖြစ်ကာ ဇာတ်သိမ်းပိုင်းကို ဇွန် ၂၆ ရက်တွင် ထုတ်လွှင့်မည်ဖြစ်သည်။