ကိုရီးယားဇာတ်လမ်းတွဲ Vincenzo ၏ ဇာတ်သိမ်းပိုင်းသည် tvN ရုပ်သံထုတ်လွှင့်မှုသမိုင်းတွင် Crash Landing on You၊ Goblin၊ Reply 1988၊ Mr.Sunshine နှင့် Mr.Queen ဇာတ်လမ်းတွဲများ၏ ဇာတ်သိမ်းပိုင်းများပြီးပါက ကြည့်ရှုသူအများဆုံး ဆဋ္ဌမမြောက်ဇာတ်သိမ်းပိုင်း ဖြစ်လာခဲ့သည်။
Vincenzo ဇာတ်လမ်းတွဲကို ၂၀၂၁ ဖေဖော်ဝါရီ ၂၀ ရက်တွင် တောင်ကိုရီးယား ရုပ်သံလိုင်း tvN မှ ထုတ်လွှင့်ပြသခဲ့ပြီး ဇာတ်လမ်းတွဲ၏ ဇာတ်သိမ်းပိုင်းကို မေ ၂ ရက်တွင် ထုတ်လွှင့်ခဲ့ခြင်းဖြစ်သည်။ ရုပ်သံလိုင်းတွင် ထုတ်လွှင့်ပြသပြီးနောက်မှသာ Netflix တွင် အပိုင်းတစ်ပိုင်းချင်း ထုတ်လွှင့် ပြသပေးနေခြင်းဖြစ်သည်။
ဒါရိုက်တာ Kim Hee-won ရိုက်ကူးထားသော Vincenzo ဇာတ်လမ်းတွဲတွင် အပိုင်း (၂၀) ပါဝင်ပြီး ဇာတ်လမ်းတွဲ၏ အထူးဇာတ်ကွက်အဖြစ် အပိုင်းတစ်ပိုင်း ထပ်တိုးရိုက်ကူး၊ ထုတ်လွှင့်ပေးထားသည်။
အီတလီမိသားစုတစ်စု၏ မွေးစားခြင်းကို ခံရသော Park Joo-hyung သည် ၎င်းအသက် ရှစ်နှစ်အရွယ်တွင် တောင်ကိုရီးယားမှ အီတလီသို့ ထွက်ခွာခဲ့သည်။ အီတလီတွင် Park Joo-hyung တစ်ယောက် မာဖီးယားဂိုဏ်း တစ်ဂိုဏ်းထဲသို့ ဝင်ရောက်ခဲ့ပြီးနောက် Cassano မာဖီးယားမိသားစု၏ ခေါင်းဆောင် Don Fabio က ၎င်းအားမွေးစားခဲ့ပြန်သည်။ ယင်းနောက် Park Joo-hyung သည် ၎င်း၏အမည်ကို Vincenzo Cassano ဟု ပြောင်းလဲခဲ့ပြီး အီတလီရှေ့နေတစ်ဦးဖြစ်လာကာ Don Fiabo ၏ ညာလက်ရုံးတစ်ဦး ဖြစ်လာခဲ့သည်။
Fiabo သေဆုံးသွားပြီးနောက်တွင် Fiabo ၏သားအရင်း Paolo နှင့် Cassano မိသားစု၏ခေါင်းဆောင်သစ်တို့က Vincenzo ကို လုပ်ကြံသတ်ဖြတ်ရန် စီစဉ်လာခြင်းကြောင့် Vincenzo တစ်ယောက် ကိုရီးယားသို့ ပြန်လည်ဝင်ရောက်ခဲ့သည်။ တောင်ကိုရီးယားတွင် ၎င်းပိုင်ဆိုင်သော ပစ္စည်းဥစ္စာကို လျှို့လျှို့ဝှက်ဝှက် ပြန်လည်ရယူနိုင်ရန် အမှုကိစ္စတစ်ခုအတွင်း ပါဝင်ပတ်သက်ခဲ့ရာမှ အပြောအဆိုပြတ်သားပြီး အမှုနိုင်ရန် ဘာမဆိုလုပ်ဆောင်လေ့ရှိသော ရှေ့နေ Hong Cha-young နှင့် ထိပ်တိုက်တွေ့၊ အားပြိုင်ရင်း ချစ်ကြိုးနွှယ်မိခဲ့ကြသည်။ တရားဥပဒေဖြင့် အပြစ်ပေးရန် မလွယ်ကူသော သြဇာကြီးရာဇဝတ်သားများကို ချေမှုန်းဖြိုလှဲနိုင်ရန် ၎င်းတို့၏နည်းလမ်းအတိုင်း ဆိုးယုတ်သော နည်းလမ်းများအသုံးပြု၍ Vincenzo နှင့် Hong Cha-young တို့ အတူတကွ ကြိုးပမ်းကြပုံကို Vincenzo ဇာတ်လမ်းတွဲတွင် စိတ်ဝင်စားဖွယ် ရိုက်ကူးတင်ဆက်ထားခြင်း ဖြစ်သည်။
ဒေါ်လာ ၁၈ သန်း အကုန်ကျခံရိုက်ကူးထားသော Vincenzo ဇာတ်လမ်းတွဲတွင် Descendants of The Sun ဇာတ်လမ်းတွဲဖြင့် လူကြိုက်များခဲ့သည့် မင်းသားဆောင်ဂျွန်ကီက Vincenzo အဖြစ်လည်းကောင်း၊ မင်းသမီး Jeon Yeo-Bin က Hong Cha-young အဖြစ်လည်းကောင်း ပါဝင်ထားပြီး အဆိုတော်အဖွဲ့ 2PM မှ အဖွဲ့ဝင် Taee Yeon လည်း ပါဝင်သရုပ်ဆောင်ထားသည်။
-
တစ်လအတွင်း ထိုင်းနိုင်ငံမှ တန်ဖိုးဒေါ်လာ သုည ဒသမ ၂၈ သန်းကျော်ရှိသည့် ဆေးဝါးပစ္စည်းများ တန်ချိန် ၂၀ ကျော် တင်သွင်း
-
မဟာမဲခေါင်ဒေသခွဲထိပ်သီးအစည်းအဝေးသို့ နစကဥက္ကဋ္ဌတက်ရောက်ပြီး နိုင်ငံအချင်းချင်းနှင့် ဘက်စုံပူးပေါင်းဆောင်ရွက်ရေး သဘောတူစာချုပ်များအပါအဝင် အခြားနိုင်ငံတကာ ကတိကဝတ်များကို မြန်မာအနေဖြင့် ဆက်လက်ပူးပေါင်းဆောင်ရွက်မည်ဖြစ်ကြောင်း ပြောကြား
-
ပရော်ဖက်ရှင်နယ် ဘောလုံးသမားဘဝမှ အနားယူသွားပြီဖြစ်သည့် စပိန်ဂန္ထဝင် အင်နီယေစတာ ဒိန်းမတ်တတိယတန်းကလပ်၏ ပူးတွဲအသင်းပိုင်ရှင်ဖြစ်လာ
-
MNL ကလပ်များအတွက် ယခုရာသီတွင် ကျင်းပနေသည့် ပြိုင်ပွဲအားလုံး၌ ရှမ်းယူနိုက်တက်အသင်း ဗိုလ်စွဲရန် အခြေအနေကောင်းနေ
-
UEFA Nations League ပွဲစဉ်များပွဲကြိုသုံးသပ်ချက်
