Top News

Streaming ဝန်ဆောင်မှုတစ်ခုဖြစ်သည့် Prime Vedio က ၎င်း၏ နောက်ဆုံးထွက်ရှိထားသည့် ဇာတ်လမ်းတွဲ Fallout သည် Season 2 ထပ်မံထွက်ရှိလာမည်ဖြစ်ကြောင်း ထုတ်ပြန်ကြေညာခဲ့သည်။

Fallout အမည်ဖြင့် အရောင်းရဆုံး ဂိမ်းကိုအခြေခံ၍ ရိုက်ကူးထားသော ကမ္ဘာပျက်ကပ်ဆိုက်အပြီးကာ လအခြေအနေကို ရိုက်ကူးထားသည့် ယင်းဒရာမာဇာတ်လမ်းတွဲကို Prime Vedio ၏ platform တွင် ဧပြီ ၁၀ ရက်က ထုတ်လွှင့်ပြသခဲ့ရာ ဝေဖန်သုံးသပ်သူများထံမှ ကောင်းမွန်သည့် မှတ်ချက်များကို ရရှိခဲ့သည်။

Fallout ဇာတ်လမ်းတွဲကို Westworld ဖန်တီးသူများဖြစ်သည့် ဂျိုနသန်နိုလန်နှင့် လီဆာဂျွိုင်းတို့က ပူးပေါင်းဖန်တီးထားကာ ဂျီနီဗာရောဘတ်ဆန်-ဒီရိုရတ်နှင့် ဂရေဟမ် ဝက်ဂ်နာတို့က ဖန်တီးသူများ၊အမှု ဆောင်ပရိုဂျူဆာများနှင့် showrunners များအဖြစ် ဆောင်ရွက်ခဲ့ကြသည်ဟု သိရသည်။

ဇာတ်လမ်းတွဲထွက်ရှိပြီး ပထမလေးရက်အတွင်း Prime Vedio ၏ သတင်းထုတ်ပြန်ချက်၌ ယင်း ဇာတ်လမ်းတွဲသည် ၎င်း၏ကမ္ဘာတစ်ဝန်းပရိသတ်များ၏ အားပေးမှုကို ရရှိခဲ့ကာ ၎င်းတို့ဝန်ဆောင်မှု၏ ကြည့်ရှုမှုနှုန်းအများဆုံး ထိပ်ဆုံးစာရင်း၏ နံပါတ်သုံးနေရာတွင် ရပ်တည်ခဲ့ပြီး “ The Lord of the Rings:The Rings of Power” နောက်ပိုင်း ကမ္ဘာတစ်ဝန်း ကြည့်ရှုမှုနှုန်းအများဆုံး ဇာတ်လမ်းတွဲဖြစ်ခဲ့သည်ဟု ဆိုသည်။

“ဂျိုနာ၊လီဆာ၊ဂျီနီဗာနဲ့ ဂရေဟမ်တို့ဟာ ဒီလိုစံချိန်ချိုးနိုင်တဲ့ အစီအစဉ်ကို ကမ္ဘာတစ်ဝန်းမှာ ချပြနိုင်အောင် လုပ်ဆောင်ခဲ့ပါတယ်။ ဒီအထင်ကရ ဗီဒီယိုဂိမ်းကို ကြိုက်နှစ်သက်တဲ့ ပရိသတ်တွေရဲ့ အားပေးမှုကို တခဲနက်ရရှိခဲ့ပြီး မျှော်မှန်းထားတဲ့ ရလဒ်ထက်ကို ကျော်လွန်ပြီး ရရှိခဲ့တဲ့အပြင် ဒီဇာတ်လမ်းတွဲက ကျွန် မတို့ရဲ့ဝန်ဆောင်မှုကို ပရိသတ်အသစ် သန်းချီယူဆောင်လာပေးနိုင်ခဲ့ပါတယ်” ဟု Amazon MGM Studios အကြီးအကဲ ဂျနီဗာဆော့ကီက ပြောကြားခဲ့သည်။