Top News

FA ဖလား တတိယအဆင့်တွင် သားဖြစ်သူ တိုင်လာ၏အသင်းနှင့်တွေ့ဆုံခြင်းမှာ အိပ်မက်များ အမှန်တကယ်ဖြစ်လာခြင်းဟု အက်ရှ်လေယန်း ဖွင့်ဟ

24htopnews | December 5, 2024 1:12 AM CST

အဲဗာတန်အသင်း ၀ါရင့်နောက်ခံလူ အက်ရှ်လေယန်းက FA ဖလားပြိုင်ပွဲ တတိယ အဆင့်တွင် သားဖြစ်သူ တိုင်လာယန်း၏ ပီတာဘရော့အသင်းနှင့် တွေ့ဆုံခြင်းမှာ အိပ်မက်များ အမှန်တကယ်ဖြစ်လာခြင်းဖြစ်သည်ဟု ထုတ်ဖော်ပြောကြားခဲ့သည်။

ပရီးမီးယားလိဂ်ကလပ် အသင်း ၂၀ နှင့် ချန်ပီယံရှစ်ကလပ် ၂၄ သင်း စတင်ပါဝင်လာသည့် FA ဖလား တတိယအဆင့်ပွဲစဉ်များကို ဒီဇင်ဘာ ၂ ရက် ညပိုင်းတွင် မဲနှိုက်ရေးဆွဲခဲ့သည်။

အဲဗာတန်အသင်းမှာ League One (တတိယတန်း) ကလပ် ပီတာဘရော့အသင်း ကို အိမ်ကွင်းလက်ခံကစားရမည်ဖြစ်သည်။

တိုင်လာ (၁၈ နှစ်) မှာ ယခုရာသီတွင် ပရော်ဖက်ရှင်နယ်ကစားသမားဘဝ စတင်ခဲ့သူဖြစ်ရာ အက်ရှ်လေယန်း (၃၉ နှစ်)က "၀ိုး . . . အိပ်မက်တွေက တကယ်ဖြစ်လာနိုင်တာပဲ" ဟု လူမှုမီဒီယာ X တွင် ရေးသားခဲ့သည်။