အေစီမီလန်တိုက်စစ်ကစားသမား လီယာအိုက ဆလိုဗန်အသင်းအား အနိုင်ရသည့်ပွဲတွင် တစ်ဂိုးသွင်းယူပြီးနောက် ၎င်းအနေဖြင့် အရန်ခုံတွင်ထိုင်ရသည်ကို မနှစ်သက်ကြောင်း ပြောကြားခဲ့သည်။
အေစီမီလန်အသင်းသည် နိုဝင်ဘာ (၂၆)ရက် က ကစားခဲ့သည့် ချန်ပီယံလိဂ်ပွဲစဉ်တွင် ဆလိုဗန် အသင်းအား (၃-၂) ဂိုးဖြင့် အနိုင်ရခဲ့သည်။ အေစီမီလန်နည်းပြ ဖွန်ဆီကာသည် အဆိုပါပွဲစဉ်တွင် လီယာအိုအား ပွဲထွက်အဖြစ် အသုံးပြုခြင်းမရှိဘဲ ဒုတိယပိုင်း အစတွင်မှာ အိုကာဖော်အစား လူစားဝင်ကစားစေခဲ့သည်။
လီယာအိုသည် လူစားဝင်ပြီးနောက် ပွဲချိန် (၆၈)မိနစ်တွင် အေစီမီလန်အတွက် ဒုတိယဂိုးကို သွင်းယူပေးခဲ့သည်။ ယင်းပွဲအပြီးတွင် လီယာအိုက မိမိနှင့် အသင်းနည်းပြ ဖွန်ဆီကာတို့ကြား ပြဿနာမရှိကြောင်းနှင့် မိမိအနေဖြင့် အရန်ခုံထိုင်ရသည်ကို မနှစ်သက် ကြောင်း ပြောကြားခဲ့ခြင်းဖြစ်သည်။
လီယာအိုက "ဖွန်ဆီကာနဲ့ ဘာပြဿနာမှ မရှိပါဘူး။ ကျွန်တော့်အနေနဲ့ အရန်ခုံမှာထိုင်ရတာကို မနှစ်သက်ဘူးဆိုတာ ဖွန်ဆီကာလည်း သိပါတယ်။ ဒါပေမဲ့ သူက နည်းပြဖြစ်ပြီး သူ့အနေနဲ့ ကျွန်တော့်ကို အရန်ခုံထိုင်ခိုင်းမယ်ဆိုရင်လည်း ကျွန်တော့်အနေနဲ့ ဝင်ကစားခွင့်ရတဲ့အချိန်မှာ အသင်းကိုကူညီပေးဖို့ အသင့်ပါပဲ။ အသင်းရလဒ်ကောင်းဖို့က အဓိကပါပဲ"ဟု ပြောကြားခဲ့သည်။
