Top News

နိုင်ငံတော်ဗဟိုဘဏ်က ဗဟိုဘဏ်အတိုးနှုန်း၊ အပ်ငွေအတိုးနှုန်းတို့ကို ပြောင်းလဲခြင်းမပြုဘဲ ယခင်အတိုင်း ဆက်လက်သတ်မှတ်ခဲ့ပြီး ပြည်တွင်းဘဏ်များ အာမခံပစ္စည်း ရယူခြင်းမပြုဘဲ အမြင့်ဆုံးနှုန်း ၁၆ ရာခိုင်နှုန်းဖြင့် ချေးငွေထုတ်ချေးခွင့်ပြုကြောင်း ဗဟိုဘဏ်က ညွှန်ကြားချက်ထုတ်ပြန်သည်။

ဘဏ်များမှ ထုတ်ချေးသောချေးငွေများအပေါ် ဘဏ်များက တောင်းခံနိုင်သည့် အတိုးနှုန်းများ (Lending Rates) ပြင်ဆင်သတ်မှတ်ခြင်းကိစ္စကို ဗဟိုဘဏ်က ညွှန်ကြားချက်အမှတ် ၁/၂၀၁၉  ဖြင့် ဇန်နဝါရီ ၁၅ ရက်နေ့စွဲဖြင့် ထုတ်ပြန်ခြင်းဖြစ်ပြီး မြန်မာနိုင်ငံတော်ဗဟိုဘဏ်၏ ၂၀၁၁ ခုနှစ် ဒီဇင်ဘာ ၂၇ ရက်စွဲပါ ညွှန်ကြားချက်အမှတ် (၁၀/၂၀၁၁) နှင့် ညွှန်ကြားချက်အမှတ် (၁၁/ ၂၀၁၁) တို့ကို ရည်ညွှန်းချက်ပြုထားသည်။

မြန်မာနိုင်ငံတော်ဗဟိုဘဏ်ဥပဒေ ပုဒ်မ-၄၈ အရ ဘဏ်များမှ ထုတ်ချေးသော ချေးငွေအပေါ် တောင်းခံနိုင်သည အတိုးနှုန်းများ သတ်မှတ်ခြင်းဖြစ်သည်။ မြေနှင့် အဆောက်အအုံ၊ ရွှေ-ရွှေထည်ပစ္စည်း၊ စိန်နှင့် အဖိုးတန်ကျောက်မျက်ရတနာများ၊ ငွေစုလက်မှတ်၊ အစိုးရငွေတိုက်စာချုပ်၊ စာရင်းသေအပ်ငွေ  (အချိန်ပိုင်းအပ်ငွေ)၊ အပေါင်ပြုနိုင်သည့် ငွေချေးသက်သေခံလက်မှတ်များနှင့် လွှဲပြောင်းနိုင်သော စာချုပ်စာတမ်း များ၊ လက်ရောက်အပေါင် (Pledge) ၊ ချေးငွေအာမခံ (Credit Guarantee) ဖြင့် ချေးငွေများနှင့် မြန်မာနိုင်ငံတော်ဗဟိုဘဏ်မှ အခါအားလျော်စွာသတ်မှတ်သည့် အပေါင်ပစ္စည်းများစသည်တို့ကို အခြေပြု၍ ထုတ်ချေးသော ချေးငွေများ အာမခံပစ္စည်းများရယူ၍ ထုတ်ချေးသောချေးငွေများအပေါ်  တောင်းခံနိုင်သည့် အမြင့်ဆုံးအတိုးနှုန်းကို ဗဟိုဘဏ်အတိုးနှုန်းအထက် ၃ ရာခိုင်နှုန်း (၁၀ %+၃ % = ၁၃ %) ထက်ကျော်လွန်၍ ကောက်ခံခြင်းမပြုရဟု သတ်မှတ်ထားသည်။

အထက်ဖော်ပြပါ အာမခံပစ္စည်းများမှအပ အခြားအာမခံပစ္စည်းရယူ၍ဖြစ်စေ၊ အာမခံပစ္စည်းရယူခြင်းမပြုဘဲဖြစ်စေ ထုတ်ချေးသော ချေးငွေများအပေါ် တောင်းခံနိုင်သည့် အမြင့်ဆုံးအတိုးနှုန်းကို ဗဟိုဘဏ်အတိုးနှုန်းအထက် ၆ ရာခိုင်နှုန်း (၁၀%+၆%= ၁၆%) ထက်ကျော်လွန်၍ ကောက်ခံခြင်းမပြုရဟု ဗဟိုဘဏ်က ညွှန်ကြားထားသည်။

ရည်ညွှန်းချက်ထည့်သွင်းထားသည့် မြန်မာနိုင်ငံတော်ဗဟိုဘဏ်၏ ၂၀၁၁ ခုနှစ် ဒီဇင်ဘာ ၂၇ ရက်စွဲဖြင့် ထုတ်ပြန်ခဲ့သော ညွှန်ကြားချက်အမှတ် ၁၀/၂၀၁၁ အရ သတ်မှတ်သော မြန်မာနိုင်ငံတော်ဗဟိုဘဏ်၏ အတိုးနှုန်း (Bank Rate) သည် ၁၀ ရာခိုင်နှုန်းအတိုင်း မပြောင်းလဲဘဲ ဆက်လက်တည်ရှိမည် ဖြစ်သည်။

ရည်ညွှန်းချက်ထည့်သွင်းထားသည် မြန်မာနိုင်ငံတော်ဗဟိုဘဏ်၏ ၂၀၁၁ ခုနှစ် ဒီဇင်ဘာ ၂၇ ရက်စွဲဖြင့်ထုတ်ပြန်ခဲ့သော ညွှန်ကြားချက်အမှတ် ၁၁/၂၀၁၁ ၏ အပိုဒ် (၂-က) အရသတ်မှတ်သော ငွေစုဘဏ်အပ်ငွေ၊ ငွေစုလက်မှတ်နှင့် အချိန်စေ့မှ ပေးရမည့် အပ်ငွေတို့အပေါ်တွင် ပေးရသည့်အနည်း ဆုံးအတိုးနှုန်းသည် ဗဟိုဘဏ်အတိုးနှုန်းအောက် ၂ ရာခိုင်နှုန်း (၁၀ %-၂ %= ၈ %) ထက်မနည်းစေရဟူသော သတ်မှတ်ချက်သည် မပြောင်းလဲဘဲ ဆက်လက်တည်ရှိသည်။

ညွှန်ကြားချက်တွင်ပါဝင်သည့် အမြင့်ဆုံးအတိုးနှုန်းဆိုသည်မှ ချေးငွေအပေါ်သတ်မှတ်သော အတိုးနှုန်းနှင့် ယင်းချေးငွေနှင့် ပတ်သက်၍ အခြားကောက်ခံသည့်အခကြေးငွေများ (ကတိခံကြေး၊ စီမံခန့်ခွဲမှုစရိတ်အဖြစ် တစ်လုံးတည်း (သို့မဟုတ်) အလီလီကောက်ခံသည့်စရိတ်၊ အခြားစရိတ်များ) အပါအဝင်  စုစုပေါင်းကောက်ခံနိုင်သည့်နှုန်းကို ဆိုလိုခြင်းဖြစ်၍ မည်သည့်နည်းနှင့်မျှ အမြင့်ဆုံး သတ်မှတ်ထားသော အတိုးနှုန်းထက်ကျော်လွန်ခြင်းမရှိစေရန် လိုက်နာဆောင်ရွက်ရမည်ဟု ဗဟိုဘဏ်က ညွှန်ကြားထားသည်။