Top News

ချယ်လ်ဆီးအသင်းနည်းပြ တူဟယ်လ်သည်  ပြီးခဲ့သည့် အင်္ဂါနေ့က ကစားခဲ့သော ချန်ပီယံလိဂ်ပွဲစဉ် ချယ်လ်ဆီး (၄-၀) ဂျူဗင်တပ်စ်ပွဲတွင် အသင်းအတွက် ပြိုင်ပွဲစုံပွဲ (၅၀)ပြည့်မြောက်ခဲ့ပြီး ယင်းပွဲတွင် ပေးဂိုးများနှင့် ပတ်သက်သည့် ထူးခြားစံချိန်မှတ်တမ်းများ တင်ရှိခဲ့ကြောင်း သိရသည်။

တူဟယ်လ်၏လက်ထက်တွင် ချယ်လ်ဆီးအသင်းမှာ ပြိုင်ပွဲစုံပေးဂိုး (၂၄)ဂိုးသာပေးခဲ့ရရာ အနည်းဆုံးပွဲ (၅၀)ကိုင်တွယ်သော အင်္ဂလန်ထိပ်တန်းလိဂ်(ယခု ပရီးမီးယားလိဂ်) နည်းပြများထဲတွင်  ပေးဂိုးအနည်းဆုံး ပေးရခြင်းအဖြစ် စံချိန်တင်ခဲ့သည်။

ယခင်က ချယ်လ်ဆီးနည်းပြပင် ဖြစ်ခဲ့သူ မော်ရင်ဟိုက စံချိန်တင်ထားခြင်းကို တူဟယ်လ်က (၃)ဂိုးလျော့နည်းကာ ကျော်ဖြတ်ခဲ့ခြင်းဖြစ်သည်။

မော်ရင်ဟိုသည် ချယ်လ်ဆီးနည်းပြအဖြစ် ပထမအကြိမ်ကိုင်တွယ်စဉ်က ပထမဆုံးပြိုင်ပွဲစုံ ပွဲ(၅၀)၌ ပေးဂိုး(၂၇)ဂိုးရှိ ခဲ့ခြင်းဖြစ်သည်။

ထို့ပြင် ချယ်လ်ဆီးအသင်းသည်  ဂျူဗင်တပ်စ်နှင့်ပွဲတွင် ဂိုးမပေးခဲ့ရဘဲ Clean Sheet ရရှိခဲ့ရာ အသင်းအတွက် တူဟယ်လ်၏လက်ထက်၌ ပြိုင်ပွဲစုံ(၃၁)ပွဲမြောက် Clean Sheet ရရှိခဲ့ခြင်း ဖြစ်သည်။

တူဟယ်လ်သည် ချယ်လ်ဆီးအသင်းအားကိုင်တွယ်ခဲ့သည့် ပွဲ(၅၀)တွင် နိုင်ပွဲ(၃၂)ပွဲ၊ သရေပွဲ (၁၁) ပွဲ နှင့် ရှုံးပွဲ(၇)ပွဲရှိခဲ့သည်။