Top News

လီဗာပူးလ်အသင်းဟာ မာဆေးဆိုက်ဒ်ဒါဘီပွဲမှာ အဲဗာတန်နဲ့ဂိုးမရှိသရေကျခဲ့လို့ ပြီးခဲ့တဲ့စနေနေ့က မန်စီးတီးအသင်းထံ လွှဲပြောင်းပေးခဲ့ရတဲ့ အမှတ်ပေးဇယားထိပ်ဆုံးနေရာကို ပြန်လည်မရယူနိုင်ဘဲဖြစ်ခဲ့ရပါတယ်။

ပရီးမီးယားလိဂ်ဘောလုံးရာသီပြီးဆုံးဖို့ (၉)ပွဲသာလိုတော့တဲ့အချိန်မှာ မန်စီးတီးအသင်းက (၇၁)မှတ်နဲ့ ထိပ်ဆုံးမှာရှိနေပြီး လီဗာပူးလ်က (၁)မှတ်အကွာနဲ့ ဒုတိယနေရာမှာ ရပ်တည်နေတာပါ။

အဲဗာတန်အသင်းဟာ မြို့ခံပြိုင်ဘက်အသင်းကို ၂၀၁၀ ပြည့်နှစ်ကတည်းက အနိုင်မရခဲ့ပေမယ့် လီဗာပူးလ်ရဲ့(၂၉)နှစ်ကြာ အမှတ်ပေးချန်ပီယံအိပ်မက်ကိုတော့ အဟန့်အတားဖြစ်စေခဲ့ပါတယ်။

လီဗာပူးလ်အသင်းက ဆာလာရဲ့သေချာပေါက်အခွင့်အရေးတွေအပြင် ဖာဘင်ညိုက အပိုင်ကန်သွင်းခွင့်တစ်ကြိမ်ရပေမယ့် အသုံးမချနိုင်ခဲ့လို့ နစ်နာခဲ့ရပါတယ်။

နောက်ဆုံး(၆)ပွဲမှာ (၁)ဂိုးသာသွင်းယူနိုင်ခဲ့တဲ့ ဆာလာဟာ လီဗာပူးလ်ကစားသမားဘဝ ပထမဆုံးအဖြစ် (၃)ပွဲဆက်တိုက် နိုင်ပွဲပျောက်ခဲ့တာပါ။

လီဗာပူးလ်အဖို့ (၅၄)မိနစ်မှာ အာနိုးလ်ရဲ့ဂိုးကန်သွင်းမှုပြီးနောက်ပိုင်း အဲဗာတန်ဂိုးပေါက်ကို ခြိမ်းခြောက်နိုင်မှု မရှိတော့ပါဘူး။

လီဗာပူးလ်ဂိုးသမား အယ်လစ်ဆန်ကတော့ ပရီးမီးယားလိဂ်မှာ Clean Sheet (၁၇)ပွဲအထိရှိလာပြီး ၂၀၀၅-၀၆ ရာသီက လီဗာပူးလ်ဂိုးသမားဟောင်း ရီနာ တင်ရှိထားတဲ့ ပွဲဦးထွက်ရာသီမှာ Clean Sheet အများဆုံးစံချိန် ပွဲ(၂၀)ကိုလိုက်မီဖို့ ပိုမိုနီးစပ်လာခဲ့ပါတယ်။

အခု မာဆေးဆိုက်ဒ်ဒါဘီပွဲဟာ အင်္ဂလန်ထိပ်တန်းလိဂ်တွေ့ဆုံမှု ပွဲ(၂၀၀)မြောက်ဖြစ်ကာ အက်စတွန်ဗီလာ-အဲဗာတန်(၂၀၂ ပွဲ)ပြီးရင် အများဆုံးဖြစ်နေပြီး ပွဲ(၂၀၀)မှာ ဂိုးမရှိသရေကျတဲ့အထိ (၃၄)ပွဲရှိခဲ့ပါတယ်။

ဒီပွဲရဲ့အကောင်းဆုံးကစားသမားဆုကို အဲဗာတန်နောက်ခံလူ မိုက်ကယ်ကင်းက ဆွတ်ခူးရရှိခဲ့ပါတယ်။