Top News

လင်မယားချင်း စကားများ၍ ဇနီးဖြစ်သူက ဓားဖြင့်ထိုးရာ ခင်ပွန်းသေဆုံးမှု ပဲခူးမြို့တွင် ဖြစ်ပွား
24htopnews | December 24, 2024 10:12 AM CST

ပဲခူးမြို့ ဥဿာမြို့သစ်(၆)ရပ်ကွက် မင်းရဲကျော်စွာလမ်း အမှတ် ၃ နယ်မြေ ရဲစခန်းအပိုင်တွင် ဒီဇင်ဘာ ၂ ရက် ညနေ ၅ နာရီ ခွဲခန့်က ခင်ပွန်းဖြစ်သူက ဇနီးအား လူမှုရေး ဖောက်ပြန်သည်ဟု စွပ်စွဲပြီး စကားများကြရာမှ ဇနီးဖြစ်သူက ဓားဖြင့်ထိုးမှုကြောင့် ခင်ပွန်းသေဆုံးခဲ့ကြောင်း သိရသည်။

ဖြစ်စဉ်မှာ ပဲခူးမြို့ ဥဿာမြို့သစ် ၆ ရပ်ကွက် မင်းရဲကျော်စွာလမ်းရှိ အိမ်အမှတ် ၂၈၉ တွင် မင်းကျော်ခန့် ၂၆ နှစ် အဘ ဦးအောင်ဆန်းဦး ဆိုသူနှင့် မရီရီမွန် ၁၉ နှစ် အဘ ဦးတင်မျိုးအောင်ဆိုသူ ဇနီးမောင်နှံ နှစ်ဦးတို့သည် ဒီဇင်ဘာ ၂ ရက် ညနေ ၅ နာရီခွဲခန့်က နေအိမ်၌ အတူရှိနေကြစဉ် ခင်ပွန်းဖြစ်သူက ဇနီးသည်အား အိမ်ထောင်ရေး ဖောက်ပြန်နေသည် ဟုဆိုကာ စကားများရန်ဖြစ်ကြပြီး ခင်ပွန်းဖြစ်သူက ဇနီးအား အရိုးအသွား ရှစ်လက်မခန့်ရှိသော စတီးဓားဖြင့် စတင်ထိုးခဲ့သည်ဟု ဆိုသည်။

ထို့နောက် ဇနီးဖြစ်သူက စတီးဓားကို လုယူပြီး ခင်ပွန်းဖြစ်သူအား ပြန်ထိုးခဲ့ရာ ခင်ပွန်းဖြစ်သူ၏ ဝဲဘက်ရင်အုံတွင် ထိုးသွင်းဒဏ်ရာ တစ်ချက်နှင့် ယာဘက်ရင်အုံတွင် ထိုးသွင်းဒဏ်ရာ တစ်ချက်တို့ ရရှိခဲ့၍ အခင်းဖြစ်နေရာတွင် သေဆုံးသွားပြီး ဇနီးသည်တွင်လည်း ထိခိုက်ဒဏ်ရာ အနည်းငယ် (မစိုးရိမ်ရ) ရရှိခဲ့၍ ပဲခူးဆေးရုံကြီးသို့ ပို့ဆောင်ထားကြောင်း သိရသည်။


READ NEXT
Cancel OK