Top News

ခေတ်အဆက်ဆက်က တိုင်းပြည်နှင့်လူမျိုးအတွက် အသက်စွန့်လွှတ် လှူဒါန်းသွားကြသော သူရဲကောင်း စစ်သည်တော်များအတွက် အောက်မေ့ဖွယ် ဂါရဝပြု ဆုတောင်းပွဲနှင့် အလေးပြုခြင်း အခမ်းအနားကို နေပြည်တော်၊ ဇေယျာသီရိမြို့နယ်ရှိ သူရဲကောင်းဗိမာန်တွင် ဒီဇင်ဘာ ၃ ရက်က ကျင်းပခဲ့ကြောင်း သိရသည်။

အခမ်းအနားသို့ ကာကွယ်ရေးဦးစီးချုပ်ရုံး(ကြည်)မှ ဒုတိယဗိုလ်ချုပ်ကြီး တေဇကျော်၊ စစ်ရေးချုပ် ဒုတိယဗိုလ်ချုပ်ကြီး စိုးမင်းဦးနှင့် တပ်မတော်အရာရှိကြီးများ၊ မြန်မာနိုင်ငံ စစ်မှုထမ်းဟောင်း ဗဟိုအမှုဆောင်အဖွဲ့ ဥက္ကဋ္ဌ ဒုတိယဗိုလ်ချုပ်ကြီး စိန်ဝင်း(အငြိမ်းစား)နှင့် စစ်မှုထမ်းဟောင်းအဖွဲ့ဝင်များ၊ နိုင်ငံရေးပါတီများမှ ခေါင်းဆောင်များ၊ ရောင်နီဦးနှင့် မိတ်ဆွေများ ပရဟိတအသင်း၊ ရွှေပြည်တော်သို့ဆုံမှတ် ပရဟိတအသင်းနှင့် တပ်မတော်အား ချစ်မြတ်နိုးသူများ တက်ရောက်ကြကြောင်း သိရသည်။

အခမ်းအနားတွင်  ခေတ်အဆက်ဆက်က ကျဆုံးလေပြီးသော သူရဲကောင်းအညတရစစ်သည်တော်များကို အလေးပြုခြင်း၊ သူရဲကောင်းစစ်သည်တော်များအတွက် ဝမ်းနည်းခြင်းအထိမ်းအမှတ် ငြိမ်သက်ခြင်း၊ သူရဲကောင်းအညတရစစ်သည်တော်များ ကောင်းရာဘုံဘဝသို့ ရောက်ရှိစေရန် ဆုတောင်းလျက် မိုးပျံပူဖောင်းများ လွှတ်တင်ခြင်း၊ ထာဝရငြိမ်းချမ်းရေးရရှိစေရန် ရည်မှန်း၍ အထိမ်းအမှတ် ချိုးဖြူငှက်များ လွှတ်ခြင်းတို့ကိုလည်း ဆောင်ရွက်ခဲ့ကြကြောင်း သိရသည်။

ထို့နောက် တက်ရောက်လာကြသူများက ကျဆုံးစစ်သည်များအတွက် လွမ်းသူ့ပန်းခွေချခြင်းများဖြင့် ဂါရဝပြုခြင်းတို့ကို ဆောင်ရွက်ခဲ့ကြကြောင်း သိရသည်။