Top News

ပဲခူးမြို့နယ် အင်းတကော်မြို့၊ သာယာအေးကျေးရွာအုပ်စု၊ ကွမ်ပေါင်ကျေးရွာတွင် ပဲခူးမြစ်ရေတိုက်စားမှုကြောင့် ကမ်းပြိုမှုဖြစ်ပွားခဲ့ရာမှ လူနေအိမ်များပြိုကျပျက်ဆီးမှုဖြစ်ပွားခဲ့ကြောင်း ဒေသခံများ၏ ပြောကြားချက်များအရ သိရသည်။

ပဲခူးမြစ်ရေတိုက်စားမှုကြောင့် ဒီဇင်ဘာလ (၁၇) ရက်နေ့ ညနေ (၄) နာရီအချိနခန့်က စတင်ကာ ကွမ်ပေါင်ကျေးရွာ မြစ်ကမ်းဘေးရှိ မြေသားများအက်ကွဲကြောင်းများဖြစ်ပေါ်လာကာ မြေပြိုကျခဲ့ခြင်းဖြစ်ကြောင်းနှင့် လူနေအိမ်များလည်း ပြိုကျပျက်ဆီးမှုဖြစ်ပွားခဲ့ကြောင်း ဒေသခံတစ်ဦးက ပြောကြားသည်။

၎င်းကဆက်လက်ပြီး “ကမ်းမပြိုခင် မြေကြီးပေါ်မှာ အက်ကွဲကြောင်းကြီးတွေအရင်ပေါ်လာတာ။ ပြီးတာနဲ့ မြေကြီးတွေပြိုဆင်းကုန်တာပါ။ လောလောဆယ် ကျေးရွာဆေးပေးခန်းအပါအဝင် အဆောက်အအုံ (၇) လုံးလောက်က ကမ်းပြိုတဲ့အထဲပါသွားပြီး။ တချို့ကမ်းနဲ့နီးတဲ့နေအိမ်တွေကိုလည်း ဖျက်ဆီးပြောင်းရွှေ့တာတွေလုပ်ဆောင်နေကြရတယ်” ဟု ပြောကြားသည်။

အဆိုပါ ကမ်းပြိုမှုကြောင့် ကွမ်ပေါင်ကျေးရွာမြစ်ကမ်းဘေးရှိ ဦးငယ်ငယ် နှင့် ဦးဌေးဆိုင်ဆိုသူတို့၏ နေအိမ်တဲ (၂) လုံး၊ ဦးဇော်ဦး ဆိုသူ၏ တိုက်ခံအဆောက်အအုံ နေအိမ် (၁) လုံး၊ ဦးအေးကို ဆိုသူ၏ ပျဉ်ခင်းပျဉ်ကာ သွပ်မိုးနေအိမ် (၁) လုံး၊ ဒေါ်ညိုဝင်း ဆိုသူ၏ တိုက်ခံအဆောက်အုံနေအိမ် (၁) လုံး၊ ဦးသောင်းဆိုသူ၏ ပျဉ်ခင်းပျဉ်ကာနေအိမ် (၁) လုံး၊ ကွမ်ပေါင်ကျေးရွာဆေးပေးခန်း တိုက်ခံအဆောက်အအုံ (၁) လုံး နှင့် ဒေါ်စန်းစန်းဝင်း ဆိုသူ၏ ခြံမြေများ ပြိုကျပျက်ဆီးခဲ့ကြောင်း သိရသည်။

အဆိုပါ ပဲခူးမြစ်ရေတိုက်စားမှုကြောင့် ကမ်းပြိုမှုများဖြစ်ပေါ်နေသည့် ပဲခူးမြို့နယ် အင်းတကော်မြို့၊ သာယာအေးကျေးရွာအုပ်စု၊ ကွမ်ပေါင်ကျေးရွာအတွင်း ဒေသခံပြည်သူများအနေဖြင့် အကူအညီများ အရေးပေါ်လိုအပ်နေကြောင်းလည်း ဒေသခံများ၏ ပြောကြားချက်များအရ သိရသည်။

ဘိုဘိုမြင့်