Top News

ပခုက္ကူမြို့ ရွှေစည်းစိမ်တည်းခိုခန်းရှိ အခန်းတစ်ခန်းတွင် အမျိုးသမီးတစ်ဦး ဒဏ်ရာများဖြင့် သေဆုံးမှု မတ် ၂၅ ရက် နံနက်ပိုင်းက ဖြစ်ပွားခဲ့ပြီး သေဆုံးသူအမျိုးသမီးနှင့် အတူတည်းခိုသူအမျိုးသားမှာ တိမ်းရှောင်နေကြောင်း သိရသည်။

ပခုက္ကူမြို့ ရွှေစည်းစိမ်တည်းခိုခန်းရှိ အခန်းတစ်ခန်းတွင် အမျိုးသမီးတစ်ဦး သေဆုံးနေကြောင်း သတင်းအရ ရဲတပ်ဖွဲ့နှင့် ရပ်ကွက်တာဝန်ရှိသူများ သွားရောက်စစ်ဆေးရာ အခန်းနံပါတ် --- တွင် မခိုင်မြတ်မွန် (၁၈ နှစ်အား ၎င်း၏နံဘေးတွင် ဆေးများနှင့်အတူ ပက်လက်အနေအထား သေဆုံးနေကြောင်း တွေ့ရှိရကြောင်း ရဲမှတ်တမ်းများအရ သိရသည်။ ရဲတပ်ဖွဲ့က ဆက်လက်စစ်ဆေးမှုပြုလုပ်ရာ သေဆုံးသူနှင့် အတူတည်းခိုသည့် နိုင်လင်းအောင် (၂၈ နှစ်) (ပခုက္ကူမြို့နေ) က နံနက် ၄ နာရီခန့်တွင် မခိုင်မြတ်မွန် နေမကောင်းသဖြင့် ဆေးဝယ်သွားမည်ဟု ပြောဆို၍ ထွက်သွားခဲ့ပြီး ပြန်လည်ရောက်ရှိမလာကြောင်း၊ နံနက် ၅ နာရီခွဲတွင် နိုင်လင်းအောင်၏ အစ်မဖြစ်သူ မသက်သက်မာ ရောက်ရှိလာပြီး တည်းခိုခန်းပိုင်ရှင်ဖြစ်သူနှင့်အတူ သွားရောက်ကြည့်ရှုရာ မခိုင်မြတ်မွန်အား သေဆုံးနေသည်ကိုတွေ့ရှိခဲ့ရခြင်းဖြစ်ကြောင်း သိရသည်။

သေဆုံးသူ မခိုင်မြတ်မွန်တွင် ယာနဖူးပေါက်ပြဲဒဏ်ရာတစ်ချက်၊ နှုတ်ခမ်းသွေး ထွက်ဒဏ်ရာ (လျှာကိုက်ထား)၊ မေးစေ့အောက် လည်ပင်းညိုမည်းဒဏ်ရာတစ်ချက်၊ ဝဲ/ယာလက်ဖျံညိုမည်းဒဏ်ရာတစ်ချက်၊ ဝဲ/ ယာပေါင်ညိုမည်းဒဏ်ရာတစ်ချက်၊ နောက်ကျောအလယ်ပွန်းဒဏ်ရာများဖြင့် သေဆုံးနေကြောင်း မှုခင်းမှတ်တမ်းတွင် ဖော်ပြထားသည်။

သေဆုံးသူအနီးတွင် Betadine တံဆိပ်ပါ အစိမ်းရောင်ပလတ်စတစ်ဘူးသေးတစ်ဘူး၊ Solmux တံဆိပ်ပါ သောက်ဆေးတစ်လုံး၊ OLIZA – 5 စာတန်းပါဆေးပြား ၁၀ ပြား ပါနှစ်ကတ်၊ ရှစ်ပြားပါတစ်ကတ်၊ နှစ်ပြားပါတစ်ကတ်၊ အဝါရောင်ဆေးပြား ၅၄ ပြား၊ တစ်ဖက်တွင် BPI စာတန်းပါ အဖြူရောင်ဆေးပြား ၅၅ ပြားနှင့် အဝတ်အထည်များတွေ့ ရှိရပြီးရဲတပ်ဖွဲ့က သက်သေခံပစ္စည်းအဖြစ် သိမ်းဆည်းထားကြောင်း သိရသည်။

အဆိုပါဖြစ်စဉ်နှင့်ပတ်သက်၍ သေဆုံးရခြင်းအကြောင်းအား သိရှိရန် အလောင်းအား ရင်ခွဲစစ်ဆေးနေပြီး အတူတည်းခိုသူ နိုင်လင်းအောင် (၂၈ နှစ်) အား လိုက်လံရှာဖွေနေကြောင်း သိရသည်။