Top News

ပဲခူးမြို့နှင့် ဘုရားကြီးမြို့ကြား ရန်ကုန်-မန္တလေး လမ်းဟောင်းတွင် မတ် ၁၉ ရက် ည ၈ နာရီခန့်က တွဲကားတစ်စီးမှ တိုက်မိသွားသော ဆိုင်ကယ်အား ဆီဘောက်ဆာယာဉ်မှ တက်ကြိတ်မိရာမှ ဆိုင်ကယ်ပေါ် စီးနင်းလိုက်ပါလာသော အမျိုးသားတစ်ဦးနှင့် အမျိုးသမီး တစ်ဦး သေဆုံးခဲ့ပြီး ဆီဘောက်ဆာကားမှာလည်း မီးလောင်ကျွမ်းမှု ဖြစ်ပွားခဲ့ကြောင်း သိရသည်။

ဖြစ်စဉ်မှာ မတ် ၁၉ ရက် ည ၈ နာရီခန့် က ပဲခူးမြို့နှင့် ဘုရားကြီးမြို့ကြား ရန်ကုန်-မန္တလေး လမ်းဟောင်း မိုင်တိုင် ၅၆ မိုင် ၅ ဖာလုံနှင့် ၆ ဖာလုံကြားတွင် ပဲခူးဘက်မှ ဘုရားကြီးဘက်သို့ မောင်းနှင်လာသော ဆိုင်ကယ်တစ်စီးအား တွဲကားတစ်စီးမှ တိုက်မိပြီး လွင့်ထွက်သွားစဉ် ဆီဘောက်ဆာယာဉ် တစ်စီးက ထပ်မံ ဝင်တိုက်သောကြောင့် ဆိုင်ကယ်မှာ ကားနှင့်ညှပ်ပါသွားပြီး ဆိုင်ကယ်ပေါ်တွင် လိုက်ပါစီးနင်းသူ အသက်၂၅ နှစ်ခန့် အမျိုးသားတစ်ဦးနှင့် အမျိုးသမီးတစ်ဦးတို့မှာ အခင်းဖြစ်ပွားရာနေရာတွင် ပွဲချင်းပြီး သေဆုံးသွားကြောင်း သိရသည်။ 

“တွဲကားက အရင်၊ ဆီဘောက်ဆာက နောက်က ဝင်တိုက်တာ၊ ဆိုင်ကယ်က လွင့်သွားပြီး လွင့်သွားတဲ့ ဆိုင်ကယ်ကို ဆီဘောက်ဆာကားက တက်ကြိတ်တာ။ ကောင်လေးနဲ့ ကောင်မလေးနှစ်ယောက် သေသွားတယ်။ ကောင်လေးနာမည်က ချစ်ပု၊ ကောင်မလေး က ယွန်း အသက်၂၅ နှစ်ဝန်းကျင်လောက် ရှိမယ်။ အဆိပ်တောင်ရွာကလို့ သိရတယ်” ဟု ပဲခူးမြို့ ကလျှာဏမိတ္တနာရေး ကူညီမှုအသင်းမှ ကူညီလုပ်ကိုင်ပေးခဲ့သူ တစ်ဦးက ပြောကြားသည်။

ယာဉ်တိုက်မှုကြောင့် ဆိုင်ကယ်မှာ ကားနှင့် ညှပ်ပါပြီးနောက် ဆီဘောက်ဆာယာဉ်မှာ ဦးခေါင်းပိုင်း မီးလောင်ကျွမ်းမှု ဖြစ်ပွားခဲ့ပြီး မီးသတ်ကားများမှ ၀ိုင်းကူငြိှမ်းသတ်မှုကြောင့် ည ၈ နာရီ ၄၅ မိနစ်ခန့်တွင် မီးငြိမ်းသွားကာ ဆီဘောက်ဆာယာဉ်မောင်းမှာ ထွက်ပြေးသွားကြောင်း သိရသည်။

အဆိုပါ ယာဉ်တိုက်မှုနှင့်ပတ်သက်၍ သက်ဆိုင်ရာ ဘုရားကြီးနယ်မြေရဲစခန်းမှ အမှုဖွင့် အရေးယူနိုင်ရေး ဆောင်ရွက်နေကြောင်း သိရသည်။