Top News

ရီးယဲလ်မက်ဒရစ်အသင်းသည် ကိုရိုနာဗိုင်းရပ်စ်ကပ်ဘေးကြောင့် ကြုံတွေ့နေရသည့် ဘဏ္ဍာရေးအကျပ်အတည်းကို ဖြေရှင်းနိုင်ရန်အတွက် အသင်းကစားသမားများကို လစာ (၁၀)ရာခိုင်နှုန်း ထပ်မံဖြတ်တောက်ရန် အလိုရှိနေကြောင်း စပိန်မီဒီယာများက ဖော်ပြခဲ့သည်။

ရီးယဲလ်မက်ဒရစ်အသင်းသည် ပြီးခဲ့သည့် ၂၀၁၉-၂၀ ရာသီတွင် ပေါင် (၈၃)သန်း အရှုံးပေါ်ခဲ့ပြီး ကိုရိုနာဗိုင်းရပ်စ်ကပ်ဘေးကြောင့် ဘဏ္ဍာရေးကျပ်တည်းမှုကို ဖြေရှင်းရန်အတွက် ကစားသမားများကို လစာ (၁၀) ရာခိုင်နှုန်းဖြတ်တောက်ခဲ့သည်။

ရီးယဲလ်အသင်းသည် ပြီးခဲ့သည့် နွေရာသီ အပြောင်းအရွှေ့ကာလတွင် ဘဏ္ဍာရေးအကျပ်အတည်းကြောင့် ကစားသမားသစ် ခေါ်ယူခဲ့ခြင်းမရှိဘဲ အသင်းရှိကစားသမားများကို ရောင်းချခြင်း၊ အငှားချခြင်းများ ပြုလုပ်ခဲ့ပြီး အသင်း၏လစာငွေကို လျှော့ချခဲ့သည်။

သို့သော် ကိုရိုနာဗိုင်းရပ်စ်ကပ်ဘေးမှာ လက်ရှိအချိန်ထိ ရင်ဆိုင်နေရဆဲဖြစ်ပြီး စပိန်နိုင်ငံတွင် ကွင်းအတွင်း ပရိသတ်များ ဝင်ရောက်ကြည့်ခွင့်မပြုသေးပေ။

ရီးယဲလ်အသင်းသည် ပုံမှန်အတိုင်းဆိုလျှင် လက်ရှိ ၂၀၂၀-၂၁ ရာသီတွင် ပေါင် (၈၂၁) သန်းအထိ ဝင်ငွေရရှိမည်ဖြစ်သော်လည်း ကပ်ဘေးကြောင့် ပေါင် (၅၆၂)သန်းသာရရှိမည်ဖြစ်ကြောင်း သိရသည်။

ထို့ကြောင့် ရီးယဲလ်အသင်းသည် ရာသီကုန်တွင် အရှုံးသက်သာစေရန်အတွက် ကစားသမားများ၏ လစာကို (၁၀)ရာခိုင်နှုန်း ထပ်မံဖြတ်တောက်ရန် အလိုရှိနေခြင်းဖြစ်ကြောင်း သိရသည်။

သို့သော် ရီးယဲလ်အသင်းဥက္ကဋ္ဌ ပီရက်ဇ်သည် ဘာစီလိုနာအသင်းကဲ့သို့ ကစားသမားများနှင့် အငြင်းမပွားစေဘဲ လစာဖြတ်တောက်နိုင်ရန် ညှိနှိုင်းနေကြောင်း သိရသည်။