Top News

မွန်ပြည်နယ် ပေါင်မြို့နယ်အတွင်း ဇူလိုင်လ (၂၆) ရက် ညပိုင်းက တစ်သောင်းကျပ်တန် ငွေစက္ကူအတုများ ဖမ်းဆီးရမိခဲ့ကြောင်း သတင်းရရှိသည်။

ဖြစ်စဉ်မှာ ပေါင်မြို့၊ ကဒါရပ်ကွက်မြို့သစ်ပိုင်း (ထန်းပင်ချောင် - ကဒါ) လမ်းဘေးရှိ မောင်ရွှေ (ခ) တာနစူး (၃၀) နှစ် ဆိုသူမှာ ငွေစက္ကူအတုများ သုံးစွဲနေကြောင်း သတင်းအရ သက်ဆိုင်ရာမှ ဇူလိုင် ၂၆  ရက် ည ၁၀ နာရီ ခန့်က ၎င်းနေအိမ်ခြံဝင်းအား ဝင်ရောက်ရှာဖွေရာ နေအိမ်ရှေ့ရှိ ခရေပင်အရင်း၌ ကြွတ်ကြွတ်အိတ်အမဲရောင်ဖြင့် ထုတ်ပိုးသိုဝှက်ထားသော တစ်သောင်းကျပ်တန်ငွေစက္ကူအတု (၇၄) ရွက်အားသိမ်းဆည်းရမိခဲ့ကြောင်း သိရသည်။

ထို့နောက် ၎င်းနေအိမ်ခြံဝင်းနှင့် ကပ်လျက်တွင်နေထိုင်သည့် မောင်ရွှေ (ခ) တာနစူး ၏ ညီမဖြစ်သူ မလှလှရီ (ခ) သာကေစူး (၂၃) နှစ် ထံမှလည်း တစ်သောင်းကျပ်တန်ငွေစက္ကူအတု (၉) ရွက် ထပ်မံတွေ့ရှိ သိမ်းဆည်းရမိခဲ့ကြောင်း သိရသည်.

“မနေ့ (ဇူလိုင်လ (၂၆) ရက်) ညက ကဒါ - ထန်းပင်ချောင် လမ်းဘေးမှာရှိတဲ့ နေအိမ် (၂) လုံးကနေ တစ်သောင်းကျပ်တန်အတုတွေ ဖမ်းဆီးရမိခဲ့တယ်လို့ သိရပါတယ်။ မောင်နှမနှစ်ယောက်လို့သိရတယ်။ စုစုပေါင်း တစ်သောင်းကျပ်တန်ငွေစက္ကူအတု (၈၃) ရွက် မိခဲ့တာပါ။ သူတို့ကို စစ်ဆေးမှုတွေလုပ်ဆောင်နေတယ်လို့သိရပါတယ်” ဟု လုံခြုံရေးတပ်ဖွဲ့နှင့် နီးစပ်သူတစ်ဦး က ပြောကြားသည်။

အဆိုပါဖြစ်စဉ်နှင့် ပတ်သက်ပြီး မောင်ရွှေ (ခ) တာနစူး နှင့် မလှလှရီ (ခ) သာကေစူး တို့နှစ်ဦးအပေါ် ပေါင်မြို့မရဲစခန်းမှ မြန်မာနိုင်ငံတော်ဗဟိုဘဏ် ဥပဒေပုဒ်မများအရ အမှုဖွင့်အရေးယူထားကြောင်း သိရသည်။

ပြီးခဲ့သည့် ဇွန်လ (၁၉) ရက်က သထုံမြို့နယ်အတွင်း ငွေစက္ကူအတုများပြုလုပ်သုံးစွဲသူများအား ဖမ်းဆီးရမိခဲ့သည့်အပြင် ဇွန်လ (၂၀) ရက်ကလည်း မော်လမြိုင်မြို့တွင် တစ်သောင်းကျပ်တန်ငွေစက္ကူအတုလက်ဝယ်တွေ့ရှိသူများကို ဖမ်းဆီးရမိခဲ့ကြောင်း သိရသည်။