Top News

ရွေးကောက်ပွဲကျင်းပမည့် နိုဝင်ဘာ ၈ ရက်တွင် အလုပ်သမားများကို အချိန်ပို (OT) ခေါ်ယူခြင်းသည် ရွေးကောက်ပွဲဥပဒေကို ချိုးဖောက်ခြင်းဖြစ်ပြီး နိုင်ငံသားတစ်ဦး၏ ဆန္ဒမဲပေးပိုင်ခွင့်ကို နှောင့်ယှက်သည့် မည်သည့်အလုပ်ရှင်မဆို တည်ဆဲဥပဒေအရ အရေးယူပေးရန် မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် (CTUM) က နိုဝင်ဘာ ၂ ရက်တွင် တောင်းဆိုချက် တစ်စောင် ထုတ်ပြန်ခဲ့သည်။

ထုတ်ပြန်ချက်တွင် ၂၀၂၀ ပြည့်နှစ် နိုဝင်ဘာ ၈ ရက်သည် မြန်မာနိုင်ငံ၏ အထွေထွေရွေးကောက်ပွဲနေ့ဖြစ်ပြီး ယင်းနေ့သည် တနင်္ဂနွေနေ့လည်းဖြစ်ကာ ရက်သတ္တပတ်၊ အလုပ်ပိတ်ရက် အနားယူရသည့်ရက်လည်း ဖြစ်ကြောင်း၊ ၂၀၀၈ ခုနှစ် ဖွဲ့စည်းပုံအခြေခံဥပဒေ၊ ရွေးကောက်ပွဲဆိုင်ရာဥပဒေ၊ နည်းဥပဒေ၊ ၂၀၂၀ ပြည့်နှစ် ပြည်ထောင်စု ရွေးကောက်ပွဲကော်မရှင်၏ အမိန့်ညွှန်ကြားချက်များအရ ရွေးကောက်မှုဆိုင်ရာ အခွင့်အရေးကို မကျင့်သုံးနိုင်စေရန် လည်းကောင်း၊ ဆန္ဒမဲပေးခြင်းကို ပျက်ပြားစေရန် လည်းကောင်း ဆောင်ရွက်သူသည် တည်ဆဲဥပဒေများအရ အရေးယူခံရမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ဆက်လက်ပြီး မဲပေးမည့် နေ့ရက်တွင် စက်ရုံ၊ အလုပ်ရုံ၊ အလုပ်ဌာနများ၏ အလုပ်ရှင်များ၊ စီမံခန့်ခွဲသူများအနေဖြင့် အချိန်ပို (OT) ခေါ်ယူရန် ပြင်ဆင် ဆောင်ရွက်နေသည်ဟု သိရှိရကြောင်း၊ အထွေထွေရွေးကောက်ပွဲနေ့တွင် အချိန်ပို (OT) ခေါ်ယူခြင်းသည် အလုပ်သမားများ၏ ဆန္ဒမဲပေးပိုင်ခွင့် အခွင့်အရေး (Rights to Vote)၊ နိုင်ငံသားတစ်ဦး၏ ဆန္ဒမဲပေးခွင့် အခွင့်အရေးများကို ပျက်ပြားစေရန် ဆောင်ရွက်နေခြင်း ဖြစ်ပါကြောင်း၊ အထွေထွေ ရွေးကောက်ပွဲနေ့တွင် အလုပ်ရှင်များ၊ စီမံခန့်ခွဲသူများအနေဖြင့် အချိန်ပို (OT) ကို ခေါ်ယူခြင်းသည် ၂၀၀၈ ခုနှစ် ဖွဲ့စည်းပုံအခြေခံဥပဒေ၊ ရွေးကောက်ပွဲဆိုင်ရာဥပဒေ၊ နည်းဥပဒေ၊ ၂၀၂၀ ပြည့်နှစ် ပြည်ထောင်စုရွေးကောက်ပွဲကော်မရှင်၏ အမိန့်ညွှန်ကြားချက်များကို ချိုးဖောက်ခြင်းလည်းဖြစ်ပြီး အချိန်ပို (OT) ခေါ်ယူခြင်းကို မပြုလုပ်ပါရန် ကြိုတင်အသိပေး အကြောင်းကြားအပ်ပါကြောင်း မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် (CTUM )  ၏ထုတ်ပြန်ချက်တွင် ဖော်ပြပါရှိသည်။