Top News

COVID-19 ရောဂါ ကူးစက်ခံရသူများလာ၍ Lockdown ပြုလုပ်ထားသော ပဲခူးမြို့ အမှတ် ၂ နယ်မြေ ရဲစခန်းတွင် ဒီဇင်ဘာ ၁၅ ရက်နေ့ စာရင်းထုတ်ပြန်ချက်အရ ရဲဝန်ထမ်း ၂ ဦးနှင့် နှင့် အချုပ်သား ၁၇ ဦး COVID-19 ရောဂါ ထပ်မံကူးစက်ခံခဲ့ရကြောင်း သိရသည်။

ပဲခူးမြို့ရှိ အမှတ် ၂ နယ်မြေရဲစခန်း၌ ဒီဇင်ဘာ ၁၀ ရက်က အချုပ်သား ၆ ဦးတွင် COVID-19 ရောဂါပိုး တွေ့ရှိခဲ့ပြီးနောက် ရောဂါကူးစက် ပျံ့နံမှုကို တားဆီးနိုင်ရေးအတွက် စခန်းအား Lockdown ပြုလုပ်ခဲ့ကြောင်း သိရသည်။

ထို့နောက် အခြားဝန်ထမ်းများနှင့် အချုပ်သားများကိုပါ ထပ်မံစစ်ဆေးမှုများ ပြုလုပ်ခဲ့ရာ ဒီဇင်ဘာ ၁၅ ရက်နေ့တွင် အချုပ်သား ၁၇ ဦးနှင့် ရဲဝန်ထမ်း ၂ ဦးတို့တွင် COVID-19 ရောဂါပိုး ထပ်မံတွေ့ရှိခဲ့ခြင်း ဖြစ်ကြောင်း သိရသည်။

“အစတည်းကတော့ ကြိုပြောထားပြီးသားပေါ့၊ အကျဉ်းထောင်တွေ အချုပ်ခန်းတွေမှာ ရောဂါကူးစက်မှုတွေ များလာမယ်လို့ ကျန်းမာရေးနဲ့ အားကစားဝန်ကြီးဌာနက ပြည်ထောင်စုဝန်ကြီးကိုယ်တိုင် ပြောထားတာ ရှိပါတယ်၊ အခုစခန်းမှာတွေ့တာက ညမထွက်အရအမိန့်နဲ့ လိုက်ဖမ်းတဲ့ထဲက တစ်ယောက်ပါတယ်၊ ကျန်တာက Quarantine ဝင်နေတဲ့ သူတွေထဲကပေါ့ ပိုးတွေ့တဲ့သူတွေကို ကုသရေးပို့မယ်၊ Negative တွေကိုတော့ စနစ်တကျ နေထိုင်ဖို့ပြောတယ်၊ Lockdown ကာလက ၂၆ ရက်နေ့ထိပေါ့” ဟု ပဲခူးခရိုင် ကျန်းမာရေးမှူး ဒေါက်တာသီဟက ပြောကြားသည်။

ပဲခူးမြို့ အမှတ် ၂ နယ်မြေရဲစခန်းတွင် လက်ရှိအချိန်ထိ COVID-19 ကူးစက်ခံရသူ ၂၆ ဦးထိရှိနေပြီး စခန်းနှင့် ပတ်သက်သော လုပ်ငန်းတာဝန်များကို အမှတ် ၃ နယ်မြေရဲစခန်းမှ ယာယီဆောင်ရွက်နေကြောင်း သိရကာ ပဲခူးမြို့ရှိ အမှတ် ၂ စခန်းအပြင် ပဲခူးမြို့မ ရဲစခန်းတွင်လည်း ဒီဇင်ဘာ ၁၅ ရက်နေ့ ထုတ်ပြန်ချက်အရ အချုပ်သား ၁၂ ဦးတွင် COVID-19 ရောဂါ ကူးစက်ခံရကြောင်း သိရသည်။