Top News

ကမ္ဘာ့ယဉ်ကျေးမှု အမွေအနှစ် စာရင်းဝင်မန္တလေးတိုင်း ဒေသကြီး ညောင်ဦးမြို့နယ် ပုဂံ ရှေးဟောင်းယဉ်ကျေးမှု နယ်မြေသို့ ဘုရားဖူးလာရောက်မှု ရှိသော်လည်း ဟိုတယ်အချို့ ပိတ်သိမ်းထားရဆဲဖြစ်ကြောင်း  ဒေသခံ လုပ်ငန်းရှင်များထံမှ သိရသည်။

COVID 19 ရောဂါ စတင်ဖြစ်ပွားခဲ့သည့် အချိန်မှစ၍ နိုင်ငံရေးအကျပ်အတည်း အခြေအနေများကြောင့် ပုဂံဒေသရှိ ဟိုတယ်နှင့် စားသောက်ဆိုင် လုပ်ငန်း ၇၀ ရာခိုင်နှုန်းခန့် လုပ်ငန်းများ ရပ်နားထားခဲ့ရကြောင်း အားလပ်ရက်များနှင့် အခါကြီးရက်ကြီး ကာလများတွင် ပုဂံသို့ ဘုရားဖူးလာရောက်သူများ ရှိနေသော်လည်း အဆိုပါ လုပ်ငန်းများသည် ဘုရားဖူးလာရောက်သည့် အခြေအနေအပေါ် မူတည်၍ အချိန်ပိုင်းအလိုက်သာ လုပ်ငန်းလည်ပတ်နိုင်သေးကြောင်း ယခုပွင့်လင်းရာသီတွင် စားသောက်ဆိုင်အများစု ဖွင့်လှစ်ထားသော်လည်း ဟိုတယ်နှင့် တည်းခိုခန်းအများစုသည် ပုံမှန် လုပ်ငန်းမလည်ပတ်နိုင်သေးကြောင်း သိရသည်။

" ပုံမှန်ဆိုရင် ပုဂံမှာက ခုလို ဒီဇင်ဘာလပိုင်းမှာဟိုတယ်တွေ၊ တည်းခိုခန်းတွေ ပြည့်လျှံနေတဲ့အထိ ဘုရားဖူးတွေ လာကြတာပါ။ အခုက သီတင်းကျွတ်၊ တန်ဆောင်တိုင်ကာလတွေမှာ ဘုရားဖူးကျတယ်ဆိုရင် ဟိုတယ်တွေက ကြိုတင်စာရင်းကောက်ပြီးမှ ဧည့်သည်လက်ခံသင့် လက်မခံသင့် ဆုံးဖြတ်ရတာမျိုးတွေ ရှိပါတယ်။ ကိုဗစ်ကာလကတည်းက ပိတ်ထားခဲ့ပြီး အခုချိန်အထိ ပြန်မဖွင့်နိုင်သေးတဲ့ ဟိုတယ်တွေလည်း အများကြီး ရှိနေပါသေးတယ် " ဟု ညောင်ဦးမြို့မှ ဟိုတယ်လုပ်ငန်းရှင်တစ်ဦးက ပြောကြားသည်။

 ပုဂံရှေးဟောင်းယဉ်ကျေးမှုနယ်မြေသို့ ဘုရားဖူးလာရောက်ကြသူ အများစုသည် ညောင်ဦးမြို့နှင့် အနီးတစ်ဝိုက်ရှိ မြို့နယ်များမှ နေ့ချင်းပြန် လာရောက်သူများ ဖြစ်ကြောင်း ခရစ္စမတ်နှင့် နယူးရီးယားရက်များအတွက် ဟိုတယ်နှင့် တည်းခိုခန်းများ ကြိုတင်ရက်ချိန်ယူသူများ ရှိနေသော်လည်း ဟိုတယ်အချို့သည် လုံးဝ လုပ်ငန်းရပ်နားထားကြောင်း သိရသည်။