Top News

နိုင်ငံသားစိစစ်ရေးကတ်အတုဖြင့် ဖွင့်လှစ်ထားသည့် ဘဏ်ငွေစာရင်း (သို့မဟုတ်) မိုဘိုင်းငွေကြေးများကို ပိတ်သိမ်းရမည်ဟု နိုင်ငံတော်စီမံအုပ်ချုပ်ရေးကောင်စီက နိုင်ငံတော်ပြန်တမ်းတွင် ထုတ်ပြန်သည်။

ယင်းသို့ နိုင်ငံသားစိစစ်ရေးကတ်အတုဖြင့် ဖွင့်လှစ်ထားသည့် ငွေစာရင်းများကို ပိတ်သိမ်းရာတွင် ဆက်သွယ်ရေးကွန်ရက်မှတစ်ဆင့် ငွေကြေးလိမ်လည်မှုများနှင့် စပ်လျဉ်း၍ တားဆီးကာကွယ်ရန် သတင်းအချက်အလက်ရယူခြင်းနှင့် စစ်ဆေးဖော်ထုတ်ခြင်းဆိုင်ရာ လုပ်ထုံးလုပ်နည်းများတွင် ဖော်ပြထားပြီး အချက်လေးချက်ဖြင့် ဆောင်ရွက်ရမည်ဟု သိရသည်။

အဆိုပါအချက်လေးချက်မှာ မိုဘိုင်းငွေရေးကြေးရေးဝန်ဆောင်မှုပေးသူများသည် မိုဘိုင်းငွေရေးကြေးရေးဝန်ဆောင်မှုလုပ်ငန်းများ ကြီးကြပ်မှုကော်မတီ၏ လမ်းညွန်ချက်များအတိုင်း ဆက်လက်ဆောင်ရွက်ခြင်း၊ သက်ဆိုင်ရာ တရားစွဲအဖွဲ့အစည်းသည် နိုင်ငံသားစိစစ်ရေးကတ်အတုများ ဖြင့် ဘဏ်ငွေစာရင်းများ သို့မဟုတ် မိုဘိုင်းငွေရေးကြေးရေးစာရင်းများ ဖွင့်လှစ်ထားကြောင်း စစ်ဆေးပေါ်ပေါက်ပါက ဥပဒေနှင့်အညီ ဆက်လက်ဆောင်ရွက်ခြင်း၊ သံသယဖြစ်ဖွယ်ရာ ငွေကြေးစီးဆင်း မှုများကို စိစစ်နိုင်ရေးအတွက် ငွေကြေးဆိုင်ရာစုံစမ်းထောက်လှမ်းရေးအဖွဲ့ (Financial Intelligence Unit- FUI) သို့ ပေးပို့ခြင်း၊ နိုင်ငံသားစိစစ်ရေးကတ်အတုဖြင့် ဖွင့်လှစ်ထားသည့် ဘဏ်ငွေစာရင်း(သို့မဟုတ်) မိုဘိုင်းငွေကြေးစာရင်းများအား ပိတ်သိမ်းနိုင်ရေး သက်ဆိုင်ရာ တရားစွဲအဖွဲ့အစည်းများက မြန်မာနိုင်ငံတော်ဗဟိုဘဏ်သို့ တင်ပြဆောင်ရွက်ခြင်း၊ ဗဟိုဘဏ်အနေဖြင့် ပိတ်သိမ်းနိုင်ရေးတင်ပြ လာသည့် ဘဏ်ငွေစာရင်းများ သို့မဟုတ် မိုဘိုင်းငွေကြေးစာရင်းများကို စိစစ်၍ ပိတ်သိမ်းရန်နှင့် အဆိုပါငွေစာရင်းရှိ လက်ကျန်ငွေများအား ပြန်လည်ထုတ်ယူနိုင်ခြင်းမရှိသည့် ငွေစာရင်းသို့ ထည့် သွင်းခြင်းများ ဆောင်ရွက်ရမည်ဖြစ်ကြောင်း ထုတ်ပြန်ထားသည်။

ထို့ပြင်နိုင်ငံသားစိစစ်ရေးကတ်အတုဖြင့် မှတ်ပုံတင်ထားသည့် ဖုန်းဆင်းကတ်များ၊ မှတ်ပုံတင် စည်းကမ်းများကိုလိုက်နာမှုမရှိသည့် ဆင်းကတ်များကို ပို့ဆောင်ရေးနှင့် ဆက်သွယ်ရေးဝန်ကြီးဌာနက ဆောင်ရွက်ရမည်ဖြစ်ကြောင်း နိုင်ငံတော်ပြန်တမ်းတွင် ဖော်ပြထားသည်။