Top News

အလုပ်ကမ်းလှမ်းစာ (Demand Letter) စိစစ်နိုင်ရန် စာရွက်စာတမ်းများ ကြိုတင်ပေးပို့သည့် ဂျပန်ကုမ္ပဏီများ အကျုံးဝင်မှုမရှိသဖြင့် ပြန်လည်ပေးပို့ရန် လိုအပ်ကြောင်း တိုကျိုမြို့ရှိ မြန်မာသံရုံးက ဒီဇင်ဘာ ၉ ရက်က ထုတ်ပြန်သည်။

ထုတ်ပြန်ချက်အရ မြန်မာသံရုံး တိုကျိုမြို့အနေဖြင့် အလုပ်သမားဝန်ကြီးဌာနက နိုင်ငံခြားရေးဝန်ကြီးဌာနမှ တစ်ဆင့် ပေးပို့လာသည့် အလုပ်ကမ်းလှမ်းစာ (Demand Letter) များကို စိစစ်ဆောင်ရွက်ပေးလျက်ရှိကြောင်း၊ ထိုသို့ စိစစ်ဆောင်ရွက်နိုင်ရန်အတွက် စာရွက်စာတမ်း၊ အချက်အလက်များ ပေးပို့ပေးနိုင်ရန် ကုမ္ပဏီ ၂၀၇ ခု၏ စာရင်းအား ပူးတွဲပါထုတ်ပြန်ချက် (48/2024) အနေဖြင့် ထုတ်ပြန်ထားရှိကြောင်း သိရသည်။

ထုတ်ပြန်သည့်စာရင်းတွင် ဖော်ပြပါရှိသည့် ကုမ္ပဏီများအနေဖြင့် Demand Letter စိစစ်နိုင်ရန်အတွက် သက်ဆိုင်ရာ အချက်အလက်များကို မြန်မာသံရုံး၊ တိုကျိုမြို့၏ ဖော်ပြပါလိပ်စာသို့ လိပ်မူ၍ စာတိုက်မှတစ်ဆင့် ပေးပို့ပေးရန်ဖြစ်ကြောင်း ပါရှိသည်။

အဆိုပါပေးပို့ရမည့် လိပ်စာများမှာ Labour Section၊ Myanmar Embassy,Tokyo နှင့် 4-8-26, Kita Shinagawa, Shinagawa Ku, Tokyo 140-0001 တို့ဖြစ်ကြောင်း သိရသည်။

ယင်းထုတ်ပြန်ကြေညာသည့် စာရင်းတွင် ပါဝင်သည့် ကုမ္ပဏီများအနက် အချို့ကုမ္ပဏီများသည် ကြေညာချက်မထုတ်ပြန်မီကတည်းက သံရုံးသို့ စာရွက်စာတမ်း၊ အချက်အလက်များ ကြိုတင်ပေးပို့မှုများ ပြုလုပ်ထားကြရာ ထိုသို့ကြိုတင်ပေးပို့ခြင်းသည် အကျုံးဝင်မှု မရှိကြောင်းနှင့် ယခုကြေညာချက်တွင်ပါရှိမှသာ ကြေညာချက်အမှတ်စဉ်ဖော်ပြလျက် စာရွက်စာတမ်း၊ အထောက်အထားများကို စာတိုက်မှတစ်ဆင့် ပြန်လည်ပေးပို့ရန် လိုအပ်ကြောင်း တိုကျိုမြို့ရှိ မြန်မာသံရုံးက ထုတ်ပြန်သည်။