Top News

စစ်ကိုင်းတိုင်းဒေသကြီး ယင်းမာပင်ခရိုင် ကနီမြို့နယ် အုမ္မကျေးရွာနှင့် ညောင်လှကျေးရွာကြားတွင် အောက်တိုဘာ ၁၈ ရက် မွန်းလွဲပိုင်းက ချင်းတွင်းမြစ်အတွင်း တန်ချိန်ပေါင်း ၂၈ တန် သယ်ဆောင်လာသည့် ကုန်တင်ရေယာဉ်တစ်စင်းသည် လှိုင်းဒဏ်ကြောင့် ခါးညွတ်ကျမှု ဖြစ်ပွားခဲ့ကြောင်း အုမ္မကျေးရွာ အုပ်ချုပ်ရေးမှူး ဦးနန်းဦးက ပြောကြားသည်။

အဆိုပါ ကုန်တင်ရေယာဉ် ခါးညွှတ်ကျမှုနှင့် ပက်သက်၍ ကုန်တင်ရေယာဉ်ပေါ်တွင် လိုက်ပါစီးနင်းလာကြသည့် အမျိုးသားငါးဦးနှင့် အမျိုးသမီးတစ်ဦးတို့သည် ထိခိုက်မှု တစ်စုံတစ်ရာ မရှိကြောင်း သိရသည်။

“အုမ္မရွာနဲ့ ညောင်လှရွာကြားက ချင်းတွင်းထဲမှာပါ။ မှောက်တာ မဟုတ်ဘူး။ ကုန်တင်မော်တော်ယာဉ်နဲ့ ရေလှိုင်းဒဏ်ကြောင့် ခါးညွှတ်ကျသွားတာ။ ဖြစ်တာက နေ့ခင်း ၁ နာရီလောက်ပါ။ ခါးညွှတ်ကျတဲ့ ကုန်တင်ရေယာဉ်ကတော့ နန်းတော်ဝင် ကုန်တင်ရေယာဉ်ပါ။ မောင်းနေရင်းနဲ့ ဖြစ်သွားတာ။ အခုတော့ ကမ်းကိုကပ်ထားပြီးပြီ။ လူကတော့ ထိခိုက်သေဆုံးမှု မရှိဘူး” ဟု ကနီမြို့နယ် အုမ္မကျေးရွာအုပ်ချုပ်ရေးမှူး ဦးနန်းဦးက ပြောကြားသည်။

နန်းတော်ဝင် ကုန်တင်ရေယာဉ်ပေါ်တွင် အမျိုးသားငါးဦးနှင့် အမျိုးသမီးတစ်ဦး စီးနင်းလိုက်လာခဲ့ကြကြောင်း ယင်းငါးဦးစလုံး သေဆုံးထိခိုက်မှု မရှိခဲ့ကြောင်း ချင်းတွင်းမြစ်အတွင်း ခါးညွှတ်ကျမှုဖြစ်ပွားခဲ့သည့် နန်းတော်ဝင် ကုန်တင်ရေယာဉ်အား အုမ္မကျေးရွာအနီး ချင်းတွင်းမြစ်ကမ်းစပ်တွင် ဆိုက်ကပ်နိုင်ခဲ့ကြောင်း နန်းတော်ဝင် ကုန်တင်ရေယာဉ်ပေါ်တွင် ကုန်တန်ချိန်ပေါင်း ၂၈ တန် တင်ဆောင်လာခဲ့ကြောင်း သိရသည်။

ထို့ပြင် ၂၀၁၆ ခုနှစ် အောက်တိုဘာ ၁၅ ရက် နံနက် ၅ နာရီခန့်က ကနီမြို့နယ် ကင်းကျေးရွာအုပ်စု မိချောင်းတွင်းကျေးရွာအနီးတွင် အောင်စိုးမိုးကျော် (၂) အမြန်ရေယာဉ်တစ်စင်း တိမ်းမှောက်မှုကြောင့် လူအများအပြား သေဆုံးမှု ဖြစ်ပွားခဲ့သေးကြောင်း သိရသည်။