Top News

အင်္ဂလန်အသင်းနည်းပြ ဆောက်ဂိတ်က စပါးတိုက်စစ်မှူး ဟာရီကိန်းကို အင်္ဂလန်အသင်း၏ ၂၀၂၂ ကမ္ဘာ့ဖလားခြေစစ်ပွဲ(ဥရောပဇုန်) ပွဲစဉ်များတွင် ပွဲချိန်ပြည့်အသုံးပြုမည်မဟုတ်ကြောင်း ပြောကြားခဲ့သည်။ 

ဆောက်ဂိတ်သည် မတ်လ (၂၅)ရက်က ကစားခဲ့သည့် ၂၀၂၂ ကမ္ဘာ့ဖလားခြေစစ်ပွဲ(ဥရောပဇုန်)ပွဲစဉ် အင်္ဂလန် (၅-၀) ဆန်မာရီနိုပွဲတွင် ဟာရီကိန်းကို အသုံးပြုခဲ့ခြင်းမရှိဘဲ တိုက်စစ်တွင် ကယ်လ်ဗတ်လူဝင်၊ စတာလင်နှင့် လင်ဂတ်တို့ကိုသာ အသုံးပြုခဲ့သည်။ 

ဟာရီကိန်းမှာ အင်္ဂလန်အသင်းအတွက် ပွဲတိုင်းပွဲချိန်ပြည့်ကစားပေးရန် ဆန္ဒပြင်းပြနေသော်လည်း မိမိအနေဖြင့် ဟာရီကိန်းကို အသင်း၏ပွဲစဉ်များတွင် ပွဲချိန်ပြည့်အသုံးပြုမည်မဟုတ်ဟု ဆောင်ဂိတ်က ဆိုခဲ့ခြင်းဖြစ်သည်။ 

ဆောက်ဂိတ်က "ဟာရီကိန်းအနေနဲ့ ပွဲစဉ်တိုင်းကို ပွဲချိန်ပြည့်ပါဝင်ကစားဖို့ ဆန္ဒရှိနေပါတယ်။ ဒါပေမဲ့ သူ့ဆန္ဒအတိုင်း ဖြစ်လာမှာ မဟုတ်ပါဘူး။ အသင်းခေါင်းဆောင် ဟာရီကိန်းအနေနဲ့ ပွဲတိုင်းကို ပွဲချိန်ပြည့်ကစားချင်တာ ကျွန်တော်တို့အတွက် အရမ်းကောင်းပေမဲ့ ပွဲဆက်တွေများတာကြောင့် သူ့ကို ပွဲတိုင်း အချိန်ပြည့်သုံးမှာ မဟုတ်ပါဘူး။ ကျွန်တော်တို့အနေနဲ့ ကစားသမားတွေ မပင်ပန်းအောင် စီမံရမှာပါ"ဟု ပြောကြားခဲ့သည်။ 

အင်္ဂလန်အသင်းသည် ၂၀၂၂ ကမ္ဘာ့ဖလားခြေစစ်ပွဲ(ဥရောပဇုန်)တွင် အုပ်စု (I)၌ ကျရောက်နေကာ အဖွင့်ပွဲတွင် ဆန်မာရီနိုအသင်းကို (၅-၀)ဂိုးဖြင့် အနိုင်ရရှိခဲ့ပြီး မတ်လ (၂၈)ရက်တွင် အယ်လ်ဘေးနီးယားနှင့် အဝေးကွင်းပွဲစဉ်၊ မတ်လ (၃၁)ရက်တွင် ပိုလန်အသင်းနှင့် အိမ်ကွင်းပွဲစဉ်များကို ဆက်တိုက်ကစားရမည်ဖြစ်သည်။