Top News

မနီလာ၊နိုဝင်ဘာ ၄

ဖိလစ်ပိုင်စစ်တပ်သည် နိုဝင်ဘာလ ၄ ရက်နေ့မှစကာ နှစ်ပတ်တာစစ်ရေးလေ့ကျင့်မှုပြုလုပ်မည်ဖြစ်ပြီး အဆိုပါလေ့ကျင့်မှုတွင် အငြင်းပွားတောင်တရုတ်ပင်လယ်အတွင်းရှိ ကျွန်းတစ်ကျွန်းကို သိမ်းပိုက်သည့်ပုံစံစစ်ရေးလေ့ကျင့်မှုလည်းပါဝင်မည်ဖြစ်ကြောင်းသိရသည်။

အဆိုပါစစ်ရေးလေ့ကျင့်မှုတွင် ဖိလစ်ပိုင်ကြည်းတပ်၊ရေတပ်နှင့် လေတပ်မှ စစ်သည်အင်အား ၃,၀၀၀ ကျော် ပါဝင်မည်ဖြစ်ပြီး မည်သည့်နိုင်ငံကိုမှ ရန်စလိုခြင်းမရှိကြောင်း ဖိလစ်ပိုင်စစ်တပ်အရာရှိများကပြောကြားခဲ့သည်။

တောင်တရုတ်ပင်လယ်တစ်ခုလုံးနီးပါးသည် ၎င်း၏အပိုင်ဖြစ်သည်ဟု တရုတ်ကအခိုင်အမာပြောကြားထားသကဲ့သို့ အင်အားတိုးချဲ့မှုလည်းရှိလာသည့်အတွက် ဖိလစ်ပိုင်၊ဗီယက်နမ်တို့နှင့် မကြာခဏထိပ်တိုက်တွေ့လေ့ရှိပြီး ရေပိုင်နက်အငြင်းပွားမှုတွင် မလေးရှား၊အင်ဒိုနီးရှား၊ဘရူနိုင်းနှင့်ထိုင်ဝမ်တို့လည်းပါဝင်သည်။

“ကိုယ့်နိုင်ငံအချုပ်အခြာ အာဏာ ကိုထိပါးလာနိုင်တဲ့ ပြင်ပခြိမ်းခြောက်မှုတွေအတွက် ပြင်ဆင်ဖို့ရည်ရွယ်တာကလွဲလို့ တခြားဘယ်နိုင်ငံကိုမှ ရန်စလိုခြင်းမျိုးမရှိပါဘူး” ဟု ဖိလစ်ပိုင်တပ်မတော်၏အကြီးအကဲဗိုလ်ချုပ်ကြီးက ဖွင့်ပွဲအခမ်းအနား၌ပြောကြားခဲ့သည်။

ယခုစစ်ရေးလေ့ကျင့်မှုကို တရုတ်နိုင်ငံဘက်မှ စောင့်ကြည့်ကောင်းစောင့်ကြည့်နေနိုင်သော်လည်း လာရောက်စွက်ဖက်လိမ့်မည်မဟုတ်ဟုမျှော်လင့်ကြောင်းလည်း ၎င်းကဆက်လက်ပြောကြားခဲ့ပြီး တရုတ်နိုင်ငံဘက်က အခြေအနေကို လှည့်ပတ်စောင့်ကြည့်လည်း ကိစ္စမရှိကြောင်းပြောကြားခဲ့သည်။

Source : အေပီ/အီးစီ