Top News

ရွှေပြည်သာမြို့နယ် စက်မှုဇုန် ၂ တွင် ကွန်တိန်နာ ရွှေ့ပြောင်းတင်ဆောင်ရာတွင် ကရိန်း(၂)စီးဖြင့် ဝန်ချီတင်ဆောင်စဉ် အမျိုးသားလေးဦးဓာတ်လိုက်ခဲ့ပြီး တစ်ဦးသေဆုံးမှု ဇူလိုင် ၈ ရက် နံနက်ပိုင်းက ဖြစ်ပွားခဲ့သည်။

ဇူလိုင် ၈ ရက် ၊ နံနက် ၁၁ နာရီခန့်တွင် ရွှေပြည်သာမြို့နယ် စက်မှုဇုန် ၂ တွင် ကွန်တိန်နာ ရွှေ့ပြောင်းတင်ဆောင်ရာတွင် ကရိန်း(၂)စီးဖြင့် ဝန်ချီတင်ဆောင်စဉ် အမျိုးသားလေးဦးဓာတ်လိုက်ကြောင်း သတင်းရသဖြင့် ပရဟိတအဖွဲ့များမှ သွားရောက်ခဲ့ကြောင်း သိရသည်။

“စက်မှုဇုန်ထဲ အမျိုးသားလေးဦး ဓာတ်လိုက်တယ်ဆိုပြီး အသင်းဆီကို ဖုန်းဝင်လာလို့ သွားတာပါ။ရောက်တော့ လေးယောက်လုံးက ဓာတ်လိုက်ပြီး လဲနေတာ။ဖြစ်တာက ကရိန်းနဲ့ ကွန်တိန်နာ ‌ရွှေ့ပြောင်းတင်‌နေတာ။အဲအချိန်မှာ ဓာတ်လိုက်တယ်သိရတယ်” ဟု အခင်းဖြစ်ပွားရာသို့သွားရောက်ခဲ့သည့် We Love Care Burma - လူမှုဘဝစောင့်ရှောက်ရေးပရဟိတအသင်းမှ တာဝန်ရှိသူတစ်ဦးက ပြောကြားသည်။

We Love Care Burma - လူမှုဘဝစောင့်ရှောက်ရေးပရဟိတအသင်း ကား(၁)စီး၊ ကနောင်ရှင်ရေးနာရေးကူညီမှုအသင်း (ဒညင်းကုန်းအိမ်ယာ) (၁)စီး၊ အမှတ်(၁)ရပ်ကွက်မှ အောင်မေတ္တာလူမှုကူညီရေးအသင်း (၁)စီး တို့ဖြင့် လူနာ (၄)ဦးအား အင်းစိန်ဆေးရုံသို့ ပို့ဆောင်ပေးခဲ့ကြောင်း ၊ တစ်ဦးမှာ ဆေးရုံသို့အရောက်တွင် သေဆုံးသွားခဲ့ကြောင်း၊ ကျန်သုံးဦးအနက် တစ်ဦးမှာ စိုးရိမ်ရအခြေအနေဖြစ်ကြောင်း သိရသည်။

“တစ်ယောက်က ဆေးရုံရောက်တဲ့အချိန်မှာ သေဆုံးသွားပါတယ်။ကျန်သုံးယောက်မှာ တစ်ယောက်က စိုးရိမ်ရပါတယ်။ဆုံးတဲ့တစ်ယောက်က ယာဉ်မောင်းလို့ သိရတယ်”ဟု အခင်းဖြစ်ပွားရာသို့သွားရောက်ခဲ့သည့် We Love Care Burma - လူမှုဘဝစောင့်ရှောက်ရေးပရဟိတအသင်းမှ တာဝန်ရှိသူတစ်ဦးက ပြောကြားသည်။

အဆိုပါဖြစ်စဉ်အား သက်ဆိုင်ရာရဲစခန်းမှ ဆက်လက်စစ်ဆေးနေကြောင်း သိရသည်။

ဓာတ်ပုံ - We Love Care Burma - လူမှုဘဝစောင့်ရှောက်ရေးပရဟိတအသင်း