အစ္စရေးသမိုင်း၌ သွေးထွက်သံယိုအများဆုံးတိုက်ခိုက်ခံရမှုကို လက်တုံ့ပြန်သည့်အနေဖြင့် အစ္စရေးက ပါလက်စတိုင်းနယ်မြေစုဖြစ်သောဂါဇာကို ပြင်းပြင်းထန်ထန်တိုက်ခိုက်ခဲ့ပြီးနောက် အရှေ့အလယ်ပိုင်း၌ ပိုမို ကျယ်ပြန့်သောပဋိပက္ခဖြစ်ပွားလာမည်ကို စိုးရိမ်နေရသည့်အနေအထား၌ အောက်တိုဘာ ၉ ရက်တွင် ရေနံစျေးများမြင့်တက်လာကြောင်း သိရသည်။
ပါလက်စတိုင်းစစ်သွေးကြွအုပ်စုဟားမာ့စ်က ဂါဇာကမ်းမြောင်ဘက်မှ အလစ်အငိုက်ထိုးစစ်ဆင်ခဲ့ပြီးနောက် အစ္စရေး-ပါလက်စတိုင်းပဋိပက္ခ၏ သေဆုံးသူ စုစုပေါင်းအရေအတွက်သည် ၁,၁၀၀ ကျော်ရှိလာချိန် အောက်တိုဘာ ၈ ရက်တွင် အစ္စရေးက ဟားမာ့စ်တို့ကို စစ်ကြေညာထားသည်။
ဟားမားစ်တို့က အရပ်သားများကို ပစ်ခတ်ခဲ့ပြီး အနည်းဆုံးဓားစာခံ ၁၀၀ ကို ဖမ်းဆီးထားသော တိုက်ခိုက်ရေးသမားအများအပြားကို စေလွှတ်ထားပြီး အစ္စရေးကို ဒုံးကျည်ထောင်ပေါင်းများစွာ အတွဲလိုက် ပစ် ခတ်မှုလုပ်ဆောင်ခဲ့ပြီးနောက် အစ္စရေးဝန်ကြီးချုပ်ဘင်ဂျမင်နေတန်ရာဟုက တစ်နေ့တွင် ရှည်လျားခက်ခဲသော စစ်ပွဲအတွက် အစ္စရေးသည် သံမဏိစိတ်ဓာတ်ရှိထားရမည်ဟု ပြောကြားသည်။
ဟားမာ့စ်၏အကြီးစားစစ်ဆင်ရေးစတင်ခဲ့ပြီးနောက် အစ္စရေး ၇၀၀ သေဆုံးခဲ့သည်ဟု အောက်တိုဘာ ၉ ရက်တွင် အစ္စရေးကာကွယ်ရေးဝန်ကြီးဌာန၏ နောက်ဆုံးထုတ်ပြန်သော သေဆုံးစာရင်းအရသိရပြီး သေဆုံးသူ အရေအတွက်သည် ၁၉၇၃ အာရပ်-အစ္စရေး စစ်ပွဲနောက်ပိုင်း အစ္စရေးနိုင်ငံ၏အဆိုးရွားဆုံး ဆုံးရှုံးမှုဖြစ်သည်ဟု ဆိုသည်။
“အစ္စရေးဟာ မကြုံစဖူးတိုက်ခိုက်တာကို အလစ်အငိုက်ခံလိုက်ရတာဖြစ်ပါတယ်။ ဒါကို 9/11 တိုက်ခိုက်မှုနဲ့နှိုင်းယှဉ်ပြောနေကြတာကို အကြိမ်ကြိမ်ကြားရပါတယ်။ ဒီတိုက်ခိုက်မှု ဘယ်လိုဖြစ်လာသလဲဆိုတာကို အစ္စရေးအတော်များများက နားလည်ဖို့ခက်နေပါတယ်”ဟု Scowcroft Middle East Security Initiative ၏ ညွှန်ကြားရေးမှူး ဂျိုနသန်ပါနီကော့ဖ်က ပြောသည်။
လူဦးရေ ၂ ဒသမ ၃ သန်းနေထိုင်ရာ ဂါဇာတွင် လူ ၄၁၃ ဦးသေဆုံးသည်ဟု ဂါဇာတာဝန်ရှိသူများက ပြောကြားသည်။ ဆင်းရဲလျက်ရှိပြီး ပိတ်ဆို့ခံထားရသော ဂါဇာရှိ လေကြောင်းပစ်မှတ် ၈၀၀ ကို အစ္စရေးတိုက်ခိုက်ခဲ့ခြင်းကြောင့် လူ ၄၀၀ ကျော်သေဆုံးသွားခြင်းဖြစ်ပြီး အစ္စရေးဘက်က မြေပြင်ကျူး ကျော်စစ်ဆင်နွှဲလာမည်ကို ဂါဇာပြည်သူအများစု စိုးရိမ်လျက်ရှိသည်။
Ref: Ruters
-
■ ဘွန်ဒစ်လီဂါကလပ် ဆန့်ပေါ်လီအသင်း လူမှုကွန်ရက် X မှ နုတ်ထွက်
-
■ မန်ယူတိုက်စစ်မှူးဟောင်း ဖော်လန် ဥရုဂွေးအိုးပင်း ပရိုတင်းနစ်ပြိုင်ပွဲ အဖွင့်ပွဲစဉ်တွင် ရှုံးပွဲကြုံတွေ့
-
■ ကူဒူစ်ကို အနည်းဆုံးပေါင်(၈၅)သန်းရမှ ဝက်စ်ဟမ်းအသင်း ရောင်းမည်
-
ကူးစက်မြန် ကိုရိုနာဗိုင်းရပ်စ်မျိုးကွဲသစ် B.1.1.7 အကြောင်းတစေ့တစောင်း
-
ရန်သူများ၏ မည်သည့် တိုက်ခိုက်မှုမျိုးကိုမဆို လက်တုံ့ပြန်သွားမည်ဟု အီရန်တပ်ဖွဲ့ ထုတ်ပြန်
