ဖိလစ်ပိုင်နိုင်ငံတွင် ကိုရိုနာဗိုင်းရပ်စ် ကပ်ရောဂါ စတင်ဖြစ်ပွားပြီးနောက်ပိုင်း ပထမဆုံးအကြိမ်အဖြစ် နိုဝင်ဘာ ၁၅ ရက်မှစပြီး ထောင်နှင့်ချီသည့် ကလေးငယ်များသည် စာသင်ခန်းများထဲသို့ ပြန်လည်ဝင်ရောက်ခွင့် ရရှိခဲ့ပြီဖြစ်သည်။ ရှေ့ပြေးအစီအစဉ်တစ်ရပ်အနေဖြင့် အာဏာပိုင်များက စာသင်ကျောင်းများကို ပြန်ဖွင့်ပေးခြင်းလည်း ဖြစ်သည်။
ကမ္ဘာ့နိုင်ငံ အားလုံးနီးပါးတွင် စာသင်ကျောင်းများကို အပြည့်အဝ သို့မဟုတ် တစ်စိတ်တစ်ပိုင်း ပြန်ဖွင့်ပေးကာ ဆရာနှင့်ကျောင်းသားများ ကိုယ်တိုင်တွေ့ဆုံသင်ကြားရန် ခွင့်ပြုထားပြီးဖြစ်သည်။ ဖိလစ်ပိုင်တွင် ၂၀၂၀ ခုနှစ် မတ်လကတည်းက စာသင်ကျောင်းများကို ပိတ်ထားခဲ့ခြင်းဖြစ်သည်။
နိုင်ငံအလယ်ပိုင်း ဆီဘူးပြည်နယ်ရှိ ဘိုဂိုမြို့ မူလတန်းကျောင်းမှ ကျောင်းဆရာတစ်ဦးဖြစ်သူ ဇီရက်စ် ဒါမာယိုက သူ၏တပည့်များနှင့် ပြန်တွေ့ရသည့်အတွက် စိတ်လှုပ်ရှားမိသည်ဟု အေအက်ဖ်ပီ သတင်းဌာနသို့ ပြောကြားသည်။
ဖိလစ်ပိုင်ရှိ စာသင်ကျောင်းပေါင်း ၆၁,၀၀၀ ကျော်ထဲမှ အစိုးရစာသင်ကျောင်း ၁၀၀ ကို ရွေးချယ်ကာ နှစ်လကြာ ရှေ့ပြေးအစီအစဉ်အဖြစ် ဖွင့်လှစ်ခဲ့ခြင်းဖြစ်ပြီး လာမည့်သီတင်းပတ်များတွင် တိုးချဲ့ဖွင့်လှစ်မှုများ ပြုလုပ်သွားဖွယ်ရှိကြောင်း ပညာရေးနယ်ပယ်မှ တာဝန်ရှိသူများက ဆိုသည်။
ယင်းကဲ့သို့ ဖွင့်လှစ်ခဲ့သည့် စာသင်ကျောင်း အများအပြားသည် ဝေးလံခေါင်သီပြီး တောင်ထူထပ်သော အရပ်ဒေသများ၊ ကျွန်းများတွင် တည်ရှိကာ ဗိုင်းရပ်ကူးစက် ပျံ့နှံ့နိုင်ခြေနည်းပါးသည်ဟု ယူဆရသော နေရာများတွင် တည်ရှိသည်ဟု သိရသည်။
“ကျွန်တော်တို့အနေနဲ့ ရာနှုန်းပြည့် အောင်မြင်မယ်လို့ အာမမခံနိုင်ပါဘူး။ ဒါပေမဲ့ ကျွန်တော်တို့ရဲ့ လေ့လာအကဲဖြတ်မှုအရ အခုရှေ့ပြေးအစီအစဉ်ဟာ အောင်မြင်မှုရရှိနိုင်မယ်လို့ မျှော်လင့်ချက် ကြီးကြီးမားမား ထားမိပါတယ်” ဟု ဖိလစ်ပိုင်ပညာရေးဝန်ကြီး လီယိုနာဘရီယွန်စ်က ပြောကြားသည်။
သူငယ်တန်း၊ ပထမတန်းမှ တတိယတန်းအထိနှင့် အထက်တန်းအဆင့် ကျောင်းသားများအနေဖြင့် ယခုရှေ့ပြေးစမ်းသပ်မှု အစီအစဉ်နှင့် အကျုံးဝင်မည်ဖြစ်ကြောင်း သိရသည်။ သို့ရာတွင် စာသင်ခန်းများအတွင်း ကျောင်းသားဦးရေကို လျှော့ချထားသကဲ့သို့ အတန်းချိန်ကိုလည်း ကန့်သတ်ထားကာ နှာခေါင်းစည်းတပ်ရန်၊ လက်ဆေးရန်နှင့် တစ်ဦးနှင့် တစ်ဦး ခပ်ခွာခွာနေကြရန် တင်းကျပ်သည့် စည်းကမ်းချက်များကို ထုတ်ပြန်ထားသည်။
အွန်လိုင်းမှ သင်ကြားမှု၊ ပုံနှိပ်စာအုပ်များ၊ ရုပ်သံနှင့် ဆိုရှယ်မီဒီယာတို့မှ သင်ခန်းစာ ပို့ချမှုများကို ပေါင်းစပ်ထားသည့် သင်ကြားရေး အစီအစဉ်ကို ဆက်လက်ကျင့်သုံးသွားမည်ဟုလည်း သိရသည်။
မြို့တော်နယ်နိမိတ်အတွင်းရှိ စာသင်ကျောင်းများတွင်လည်း ကိုယ်တိုင်တက်ရောက် သင်ကြားမှုများ ပြန်လည်စတင်နိုင်ရန် အရှိန်မြှင့်ဆောင်ရွက်လျက်ရှိသော်လည်း လက်ရှိတွင် ၎င်းအစီအစဉ်ကို စတင်ရန် ခွင့်ပြုချက် မရရှိသေးပေ။
နာဗိုတက်စ်မြို့ရှိ အထက်တန်းကျောင်းတစ်ကျောင်းမှ ကျောင်းအုပ်ဖြစ်သူ အိုလီဗာဆန်းချက်ဇ်က မိဘအများစုသည် သူတို့၏ကလေးများ ကျောင်းပြန်တက်ခွင့်ရရှိရန် ဆန္ဒရှိနေကြသည်ဟု အေအက်ဖ်ပီသို့ ပြောကြားသည်။ လူဦးရေသန်း ၁၁၀ ရှိသည့် ဖိလစ်ပိုင်တွင် လူဦးရေ၏ ၃၀ ရာခိုင်နှုန်းနီးပါးကို ကိုရိုနာဗိုင်းရပ်စ် ကာကွယ်ဆေး အပြည့်အဝ ထိုးနှံပေးပြီးဖြစ်သော်လည်း ၎င်းအနက်မှ ၇၀ ရာခိုင်နှုန်းနီးပါးသည် မြို့တော်မနီလာတွင် ဖြစ်သည်။ အာဏာပိုင်များသည် ယခုလတွင် အသက် ၁၂ နှစ်အရွယ် ကလေးငယ်များကို ကာကွယ်ဆေး စတင်ထိုးနှံပေးခဲ့သည်။
-
■ ဘွန်ဒစ်လီဂါကလပ် ဆန့်ပေါ်လီအသင်း လူမှုကွန်ရက် X မှ နုတ်ထွက်
-
■ မန်ယူတိုက်စစ်မှူးဟောင်း ဖော်လန် ဥရုဂွေးအိုးပင်း ပရိုတင်းနစ်ပြိုင်ပွဲ အဖွင့်ပွဲစဉ်တွင် ရှုံးပွဲကြုံတွေ့
-
■ ကူဒူစ်ကို အနည်းဆုံးပေါင်(၈၅)သန်းရမှ ဝက်စ်ဟမ်းအသင်း ရောင်းမည်
-
ကူးစက်မြန် ကိုရိုနာဗိုင်းရပ်စ်မျိုးကွဲသစ် B.1.1.7 အကြောင်းတစေ့တစောင်း
-
ရန်သူများ၏ မည်သည့် တိုက်ခိုက်မှုမျိုးကိုမဆို လက်တုံ့ပြန်သွားမည်ဟု အီရန်တပ်ဖွဲ့ ထုတ်ပြန်
