Top News

ကလေးမြို့နယ်တွင် COVID-19 လူနာခြောက်ဦး တွေ့ရှိခဲ့ပြီးနောက် တောင်ဖီလာရပ်ကွက်ကို Stay at Home ပြုလုပ်ခဲ့ပြီး ပိုးတွေ့လူနာနှင့် Contact ဖြစ်ခဲ့သူများအား မလိမ်မညာ မကွယ်မဝှက်ပဲ ပြောကြားပေးရန် ပြည်သူ့လွှတ်တော် ကိုယ်စားလှယ် ဒေါ်ရှားမီးက ပြောကြားသည်။

“ကျွန်မတို့ မနက်ဖြန်လည်း သွေးနမူနာယူဖို့လည်း ရှိပါတယ်။ စခန်းကြီး ဖက်မှာပေါ့။ သူက အခုအချိန်အထိ ကျန်းမာရေး ကောင်းနေပါတယ်။ သူ့ကိုယ်သူ သံသယ ဖြစ်တာရယ် သူ့ကိုယ်သူ စိတ်ချယုံကြည်မှု မရှိဘူးပေါ့။ စခန်းကြီး ရွာကလည်း သူက ကပ်တဲရွာကိုလည်း ရောက်လည်း ရောက်ခဲ့တယ်။ ညလည်း အိပ်ခဲ့တယ် ဆိုတော့ အခုအချိန်အထိ ဖျားတာကတော့ မဖျားဘူး။ သူ့ကိုယ်သူလည်း သံသယဖြစ်တယ်။ ရွာကလည်း သံသယ ဖြစ်တော့ သွေးနမူနာကလည်း တအားပို့ချင်နေတော့ ကျန်းမာရေးဌာနနဲ့ ညှိနှိုင်းပြီးတော့ သွေးနမူနာယူဖို့ ရှိပါတယ်။ ကျန်းမာရေးဌာနရဲ့ ညွှန်ကြားချက်တွေ ဒေသန္တရ အမိန့်တွေကို တသွေမတိမ်း လိုက်နာကြဖို့ ကလေးမြို့ လူထုအားလုံးကို မေတ္တာနဲ့ မှာကြားလိုပါတယ်။ ပြီးတော့ ကိုယ့်မှာ ပိုးတွေ့လူနာရှိခဲ့ပြီ ကိုယ်နဲ့ Contact (ရောဂါရှိသူနှင့် အနီးအနား နေခြင်းဖြင့် ကူးစက်ရောဂါကို သယ်ဆောင်လာရန် အလားအလာရှိသူ) အားလုံးက မကွယ်မဝှက် မလိမ်မညာပဲ ကလေးမြို့ တစ်ခုလုံးရဲ့ လုံခြုံရေးအတွက် သူတို့ကနေပြီးတော့ ကိုယ်ကိုတိုင် ဝန်ခံမှဖြစ်မယ်။ ကလေးမြို့ အားလုံး လူထုနဲ့ သူ့မိသားစု ကိုယ့်ပတ်ဝန်းကျင် တစ်ခုနဲ့ လဲလို့ မဖြစ်ဘူးဆိုတဲ့ အသိတရားလေး ပိုပြီးတော့ ရစေချင်တယ်။ နောက်ထပ် Contact တွေလည်း ရှိနေအုန်းမယ်။ ညာနေသေးတဲ့သူလည်း ရှိနေအုံးမယ်။ ရှိကောင်း ရှိနေမယ်။ မညာဘဲ ဖော်ထုတ် ပြောဆိုဖို့ အတွက်တော့ အရေးတကြီး လိုအပ်နေပါတယ်” ဟု ပြည်သူ့လွှတ်တော် ကိုယ်စားလှယ် ဒေါ်ရှားမီးမှ ပြောကြားသည်။

ကလေးမြို့တွင် ရောဂါပိုး ထပ်မံတွေ့ရှိခဲ့သူ ခြောက်ဦးမှာ Case 1 တီးတိန်လူနာနှင့် Case 88 လူနာတို့ထံမှ ကူးစက်ခံရခြင်းဖြစ်ကြောင်း သိရသည်။