Top News

■ ရေဘေးအတွက် ရီးယဲလ်အသင်း ယူရို(၁)သန်း လှူဒါန်း

24htopnews | November 1, 2024 5:12 PM CST

ရီးယဲလ်အသင်းသည် ဗလင်စီယာဒေသတွင် ဖြစ်ပွားနေသည့် ရေဘေးအတွက် ယူရို(၁) သန်း လှူဒါန်းခဲ့ကြောင်း သိရသည်။

စပိန်နိုင်ငံ ဗလင်စီယာဒေသတွင် ရေကြီးရေလျှံမှုများ ဖြစ်ပေါ်နေရာ အနည်းဆုံးလူ(၁၅၀) ခန့် သေဆုံးခဲ့ပြီး လူပေါင်းများစွာ ရေဘေးဒုက္ခ နှင့် ရင်ဆိုင်နေရသည်။

ထို့ကြောင့် ရီးယဲလ်အသင်းက အရေးပေါ်ကူညီမှုများ လုပ်ဆောင်နိုင်ရန်အတွက် ယူရို(၁)သန်း လှူဒါန်းခဲ့ခြင်းဖြစ်ကြောင်း သိရသည်။

ရီးယဲလ်အသင်းသည် လာမည့်စနေနေ့တွင် လာလီဂါပွဲစဉ်(၁၂)အဖြစ် ဗလင်စီယာအသင်းနှင့် ယှဉ်ပြိုင်ရမည်ဖြစ်ရာ အဆိုပါပွဲကိုလည်း ရေဘေးကြောင့် ရွှေ့ဆိုင်းလိုက်ကြောင်းသိရသည်။

စပိန်ဘောလုံးအဖွဲ့ချုပ်(RFEF) သည် သက်ဆိုင်ရာလိဂ်ပြိုင်ပွဲတာဝန်ရှိသူများ၏ တောင်းဆိုမှုကြောင့် လာမည့်ရက်သတ္တပတ်အတွင်း ဗလင်စီယာဒေသ၌ ယှဉ်ပြိုင်ကစားရန် စီစဉ်ထားသော ဘောလုံးပွဲစဉ်အားလုံးကို ရွှေ့ဆိုင်းပေးရန် ဆုံးဖြတ်ခဲ့ကြောင်း သိရသည်။

ထို့ ကြောင့် လာလီဂါပွဲစဉ်(၁၂)တွင် ဗလင်စီယာ - ရီးယဲလ်ပွဲနှင့်အတူ ဗီလာရီးယဲလ် - ဗယ်လက်ကာနိုပွဲကိုလည်း ရွှေ့ဆိုင်းခဲ့သည်။

ဆီဂန်ဒါပြိုင်ပွဲ မှ ပွဲစဉ်(၃)ပွဲကိုလည်း ရွှေ့ဆိုင်းခဲ့ပြီး အမျိုးသမီးလိဂ်ပြိုင်ပွဲမှ ပွဲစဉ်(၂)ပွဲကိုလည်း ရွှေ့ဆိုင်းခဲ့ကြောင်း သိရသည်။

ယှဉ်ပြိုင်ကစားသည့်ပွဲများ၌ ဝမ်းနည်းခြင်းအထိမ်းအမှတ်အဖြစ် တစ်မိနစ် ငြိမ်သက်သွားမည်ဟုလည်း သိရသည်။