Top News

မန္တလေးတွင်ယမန်နေ့ကပေါက်ကွဲမှုဖြစ်ပွားခဲ့သော ရပ်ကျေးရုံး၌ မပေါက်ကွဲသေးသည့် လက်ပစ်ဗုံးတစ်လုံးကို ယနေ့ တွေ့ရှိခဲ့ရ

24htopnews | November 1, 2024 12:12 AM CST

မန္တလေးတိုင်း၊ ပြည်ကြီးတံခွန်မြို့နယ်၊ (ဇ)ရပ်ကွက်၊ ၅၆ လမ်းနှင့် ၁၃၃ လမ်းထောင့်ရှိ ရပ်ကျေးရုံးတွင် ယမန်နေ့ အောက်တိုဘာ ၃၀ ရက်ညပိုင်းက ပေါက်ကွဲမှုဖြစ်ပွားခဲ့ပြီး ယနေ့ အောက်တိုဘာ ၃၁ ရက်နံနက်ပိုင်းတွင် မပေါက်ကွဲသေးသည့် လက်ပစ်ဗုံးတစ်လုံးတွေ့ရှိခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။

ရပ်ကျေးရုံးပတ်ဝန်းကျင်အား ရုံးအကူဝန်ထမ်းတစ်ဦးမှ ယနေ့ အောက်တိုဘာ ၃၁ ရက်နံနက် ၇ နာရီကျော်ခန့်ကသန့်ရှင်းရေးပြုလုပ်စဥ် မပေါက်ကွဲသေးသည့် MG-1 အမျိုးအစား လက်ပစ်ဗုံးတစ်လုံးကိုတွေ့ရှိခဲ့ခြင်းဖြစ်ကြောင်း သိရသည်။

” သန့်ရှင်းရေးလုပ်နေတုန်း ရပ်ကျေးရုံးအဆောက်အဦရဲ့အနောက်ဖက်မှာတွေ့တာပါ။ လုံ ခြုံရေးအဖွဲ့ဝင်တွေလာပြီးစစ်ဆေးခဲ့ကြပါတယ်။ အန္တရာယ်မရှိဘူးလို့ ပြောတယ်”ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။

အဆိုပါ လက်ပစ်ဗုံးအား သက်ဆိုင်ရာ မိုင်းရှင်းလင်းရေးအဖွဲ့မှ စစ်ဆေးမှုများပြုလုပ်ပြီးနောက် သိမ်းဆည်းသွားခဲ့ကြောင်းလည်း သိရသည်။

ယမန်နေ့ အောက်တိုဘာ ၃၀ ရက်ည ၆ နာရီကျော်ခန့်က ယင်း ရပ်ကျေးရုံးသို့ ကလစ်ဆိုင်ကယ်မောင်းနှင်လာသော အမျိုးသား(၂)ဦးမှ လက်လုပ်မိုင်းဖြင့် ပစ်ပေါက်ခဲ့မှုကြောင့် ပေါက်ကွဲမှုဖြစ်ပွားကာ ကလေးငယ်(၁)ဦးနှင့်အမျိုးသား (၁)ဦးတို့တွင် မိုင်းစထိမှန်ဒဏ်ရာများရရှိ၍ ရုံးအနီးရှိကား(၂)စီးတွင်လည်း ပျက်စီးမှုအချို့ဖြစ်ပေါ်ခဲ့ကြောင်း သိရသည်။