Top News

ယူအက်စ်အိုးပင်းပြိုင်ပွဲတွင် ကမ္ဘာ့အဆင့် (၇၈) ဒီမီထရော့ဗ်ကို ဖက်ဒါရာ မထင်မှတ်ဘဲ ရှုံးနိမ့်

24htopnews | October 30, 2024 6:12 AM CST

ဂရင်းစလင်းချန်ပီယံဆု အကြိမ် ၂၀ ရရှိထားသည့် ၀ါရင့်ဆွစ်ဇာလန်တင်းနစ်သမား ရော်ဂျာဖက်ဒါရာသည် ယူအက်စ်အိုးပင်းဂရင်းစလင်းပြိုင်ပွဲ ကွာတားဖိုင်နယ်တွင် ကမ္ဘာ့အဆင့် (၇၈) ဘူလ်ဂေးရီးယား ကစားသမား ဒီမီထရော့ဗ်ကို မထင်မှတ်ဘဲ ရှုံးနိမ့်ခဲ့ကြောင်း သိရသည်။

ယူအက်စ်အိုးပင်းပြိုင်ပွဲတွင် ချန်ပီယံဆု ငါးကြိမ်ရရှိထားသည့် ဖက်ဒါရာသည် ယခုနှစ် ပြိုင်ပွဲ၌ ဆီဒင် ၃ သတ်မှတ်ခံထားရပြီး ကွာတားဖိုင်နယ်ပွဲစဉ်အဖြစ် ဒီမီထရော့ဗ် (ဆီဒင်မဲ့) နှင့် ယှဉ်ပြိုင်ကစားရာ ငါးပွဲအပြည့် ကစားပြီးနောက် မထင်မှတ်ဘဲ ရှုံးနိမ့်ခဲ့ခြင်းဖြစ်သည်။ ဖက်ဒါရာသည် ပထမပွဲတွင် ၆-၃ ဖြင့် ပွဲပြတ်အနိုင်ရပြီး ပွဲကစားချိန်မှာလည်း ၂၉ မိနစ်သာကြာမြင့်သောကြောင့် ဆီမီးဖိုင်နယ်သို့ အလွယ် တကူတက်ရောက်နိုင် ဖွယ်ရှိကြောင်း သုံးသပ်မှုများရှိခဲ့သည်။

သို့သော် ဒုတိယပွဲတွင် ဒီမီထရော့ဗ်က ၆-၄ ဖြင့်လည်းကောင်း၊ တတိယပွဲတွင် ဖက်ဒါရာက ၆-၃ ဖြင့်လည်းကောင်း၊ စတုတ္ထပွဲတွင် ဒီမီထရော့ဗ်က ၆-၄ ဖြင့်လည်း ကောင်း အပြန်အလှန်အနိုင်ရသောကြောင့် နောက်ဆုံး ပွဲအထိ ဆက်လက်ယှဉ်ပြိုင်ခဲ့ရသည်။ ပဥ္စမပွဲတွင်မူ ဒီမီထရော့ဗ်က ဖက်ဒါရာ၏ စပေးဘောအလှည့် နှစ်ကြိမ်ဆက်တိုက် အနိုင်ယူကာ ၄-၀ ဖြင့် ဦးဆောင်နိုင်ခဲ့ပြီး ပွဲအပြီးတွင်လည်း ၆-၂ ဖြင့် အနိုင်ရခဲ့သည်။

သို့ဖြစ်ရာ ဒီမီထရော့ဗ် (၂၈ နှစ်) အနေဖြင့် ၁၉၉၁ ခုနှစ်နောက်ပိုင်း ၂၈ နှစ်အတွင်း ယူအက်စ်အိုးပင်း ဆီမီးဖိုင်နယ်သို့တက်ရောက်ဖူးသူများအနက် ကမ္ဘာ့အဆင့်ရပ်တည်မှု အနိမ့်ဆုံးကစားသမားအဖြစ် မှတ်တမ်းဝင် ခဲ့ကြောင်း သိရသည်။ ဒီမီထရော့ဗ်သည် ဆီမီးဖိုင်နယ်တွင် ရုရှားကစားသမား မက်ဗီဒက်ဗ် (ဆီဒင် ၅) နှင့် ယှဉ်ပြိုင်ရမည်ဖြစ်သည်။