ချီဖွေမြို့ အနောက်ဘက်ကမ်းရှိ မုတ်သုံတော ကမ်းခြေမှာ တရားမဝင် ရွှေတူးဖော်မှုများ ရပ်ဆိုင်းပေးရန် ချီဖွေဒေသခံများက ဒီဇင်ဘာ ၁၀ ရက်တွင် မြစ်ကြီးနားမြို့ရှိ သတင်းမီဒီယာများနှင့် တွေ့ဆုံကာ ရှင်းလင်း ပြောကြားခဲ့သည်။
ယင်းရွှေတူးဖော်သည့် နေရာမှာ ချီဖွေမြို့သို့ လာရောက် လည်ပတ်သူများ အပန်းဖြေသည့် မုတ်သုံတော (ဒေသအခေါ်) ဂျန်ယော်မှာ အမြဲစိမ်းလမ်းနေသည့် ကျွန်းငယ်လေးသဖွယ် ဖြစ်နေသဖြင့် ပင်လယ်ကမ်းခြေ အပန်းဖြေစခန်းကဲ့သို့ ဖြစ်နေသည့်နေရာ ဖြစ်သဖြင့် ဒေသခံများက စိတ်မကောင်း ဖြစ်နေကြောင်း လောင်ဗျစ်ခေါင်လူမှုအဖွဲ့က ဆိုသည်။
လောင်ဗျစ်ခေါင် လူမှုဖွံ့ဖြိုးရေးအဖွဲ့ အတွင်းရေးမှူး ဦးလာချိဒ်လွမ်းဇောင်းက “မုတ်သုံတောကို ၂၀၁၄ ခုနှစ်လောက် လုပ်ပြီးပြီ။ လွန်ခဲ့တဲ့ နှစ်နှစ်လောက်က နားသွားပြီး အခုပြန်လုပ်နေတယ်။ ကေအိုင်အေ ထိန်းချုပ်တဲ့ နယ်မြေဆိုတော့ သူတို့ဦးစီးပြီးလုပ်တဲ့ သဘောပါ။ ကျွန်တော်တို့ကတော့ အစိုးရဘက်ကို ကန့်ကွက်ပေးဖို့ စာတင်သွားမှာပါ။ မူလအတိုင်း မရှိတော့ပေမယ့် ကျန်တဲ့နေရာကို ကျန်နေစေချင်သေးတယ်။ ဧကပေါင်း ဆယ်ချီပြီး တူးသွားပြီလေ။ စာပေယဉ်ကျေးမှုအဖွဲ့ ရန်ပုံငွေဆိုပြီး သတင်းတွေ ထွက်နေလို့ ကျွန်တော်တို့ လာချိဒ်စာပေ ယဉ်ကျေးမှု မပါဘူးဆိုပြီး စာနဲ့လည်း ထုတ်ပြန်ပါပြီ” ဟု ပြောကြားသည်။
လက်ရှိတွင် မုတ်သုံတောမှာ အားလုံးနီးပါး ရွှေတူးဖော်မှုများကြောင့် ပျောက်ကွယ်လုနီး ဖြစ်နေပြီး ယင်းဖြစ်စဉ်များကို အစိုးရနှင့် အခြားအဖွဲ့အစည်းများကို ကာကွယ်စောင့်ရှောက်နိုင်ဖို့ စာပေးပို့ တိုင်ကြားတာတွေ လုပ်ဆောင်သွားမည် ဖြစ်ကြောင်း သိရသည်။
“ကျွန်တော်တို့ လက်ထက်မှာ မထိန်းနိုင်ခဲ့တာ စိတ်မကောင်းဘူး။ ကျန်တာကတော့ ထိန်းသိမ်းထားစေချင်တယ်” လို့ ဦးလွန်းဇောင်းက ဆိုသည်။
လက်ရှိတွင် ချီဖွေဒေသသို့ ဆန်၊ လောင်စာဆီ ကန့်သတ်မှုများ ရှိနေသော်လည်း ရွှေဖောင်တွင် အသုံးပြုသည့် လောင်စာဆီများမှာ စစ်ဆေးရေးဂိတ် အသီးသီးကို ကျော်ဖြတ်လာသည့် ဆီများဖြစ်ကြောင်း ဒေသခံများက ဆိုသည်။
ကချင်ပြည်နယ် အစိုးရအဖွဲ့က မြစ်ချောင်းများအတွင်း ရွှေနှင့်သတ္တု တူးဖော်မှုများကို ဥပဒေကြောင်းအရ တရားဝင် တူးဖော်ခွင့် လုံးဝချထားပေးခြင်း မရှိဘဲ တရားဥပဒေ မစိုးမိုးနိုင်သည့် နေရာများတွင်သာ တရားမဝင် ခိုးတူးနေမှုများ ရှိနေခြင်းဖြစ်ကြောင်း၊ ငြိမ်းချမ်းရေးရရှိပြီး ပူးပေါင်းဆောင်ရွက်မှုများ ရှိမှာသာ ယင်းလုပ်ငန်းများကို ထိန်းသိမ်းကာကွယ် နိုင်မည်ဖြစ်ကြောင်း၊ လက်လှမ်းမီသည့် နေရာများတွင် တရားမဝင် ရွှေတူးဖော်နေမှုများကို ဖမ်းဆီးထိန်းသိမ်းမှုများ ပြုလုပ်နေကြောင်း ပြောကြားထားသည်။
-
မြန်မာနှင့် လက်ဘနွန်အသင်း၏ ခြေစမ်းပွဲလက်မှတ်များ ရောင်းချနေပြီး ရုပ်သံမှ တိုက်ရိုက်ပြသမည်
-
တက်ကျမ်းစာပေ
-
အာရှအားကစားပြိုင်ပွဲ၏ အမျိုးသားဘောလုံးပြိုင်ပွဲတွင် ဂျပန်ကို မြန်မာအသင်း (၇)ဂိုးပြတ်အရေးနိမ့်
-
သထုံမြို့နယ် အနန်းပင်ကျေးရွာအနီး သထုံ - ပေါင် ခရိုင်ချင်းဆက်လမ်းတွင် မော်တော်ယာဉ်တစ်စီးအရှိန်လွန်တိမ်းမှောက်မှုကြောင့် လူ ၂၀ ဦးထက်မနည်း ထိခိုက်ဒဏ်ရာရ
-
မြန်မာနိုင်ငံ အလယ်ပိုင်းဒေသ ငါးခုတွင် ရာသီဥတု ပြောင်းလဲမှုများနှင့် မြေဆီလွှာ တိုက်စားမှု လျှော့ချရန်အတွက် ရေဝေရေလဲ နေရာငယ်များတွင် ဒေသနှင့် ကိုက်ညီသည့်သစ်ပင်များ စိုက်ပျိုးထိန်းသိမ်းမှု ပြုလုပ်
